Zokhudza screen reader

Sankhani chinenero

Pitani ku menyu yachiwiri

Pitani ku mitu ya nkhani

Pitani ku nkhani yake

Mboni za Yehova

Chichewa

Baibulo la pa Intaneti

BAIBULO LA DZIKO LATSOPANO LA MALEMBA OPATULIKA

Masalimo 17:1-15

Pemphero la Davide. 17  Imvani dandaulo lolungama, inu Yehova. Mvetserani kulira kwanga kochonderera.+ Tcherani khutu ku pemphero langa limene likutuluka pamilomo yopanda chinyengo.+   Chiweruzo changa chichokere kwa inu.+ Maso anu aone kuwongoka mtima kwanga.+   Mwasanthula mtima wanga, mwandifufuza usiku,+ Ndipo mwandiyenga. Mudzaona kuti sindinaganizire kuchita choipa chilichonse.+ Pakamwa panga sipadzaphwanya malamulo.+   Kunena za ntchito za anthu, Ndakhala wosamala mwa kusunga mawu a pakamwa panu, kuti ndisatengere njira ya wachifwamba.+   Mapazi anga ayendebe m’njira zanu,+ Mmene sadzapunthwa ngakhale pang’ono.+   Ine ndikuitana pa inu, chifukwa mudzandiyankha, inu Mulungu.+ Tcherani khutu kwa ine. Imvani mawu anga.+   Sonyezani kukoma mtima kosatha mwa kuchita zodabwitsa,+ inu Mpulumutsi wa anthu othawira kwa inu, Amene akuthawa anthu ogalukira dzanja lanu lamanja.+   Ndisungeni monga mwana wa diso,+ Ndibiseni mumthunzi wa mapiko anu,+   Chifukwa cha anthu oipa amene akundipondereza. Adani a moyo wanga atsala pang’ono kundipeza.+ 10  Mitima yawo siimva chisoni,*+ Ndipo amalankhula modzikuza ndi pakamwa pawo.+ 11  Tsopano adaniwo atizungulira, kulikonse kumene tingapite.+ Akutiyang’anitsitsa kuti atigwetse.+ 12  Aliyense wa iwo akuoneka ngati mkango umene ukufunitsitsa kukhadzula nyama.+ Akuonekanso ngati mkango wamphamvu umene wabisalira nyama. 13  Nyamukani, inu Yehova, yang’anizanani naye maso ndi maso woipayo.+ M’gonjetseni. Pulumutsani moyo wanga kwa woipayo ndi lupanga lanu.+ 14  Ndipulumutseni kwa anthu ndi dzanja lanu, inu Yehova,+ Ndipulumutseni kwa anthu a m’nthawi* ino,+ amene gawo lawo lili m’moyo uno.+ Anthu amene mimba zawo mwazidzaza ndi chuma chanu chobisika,+ Amene ali ndi ana aamuna ochuluka,+ Ndipo amakundikira ana awo chuma.+ 15  Koma ine ndidzaona nkhope yanu m’chilungamo.+ Podzuka, ndidzakhutira pokuonani.+

Mawu a M'munsi

Mawu ake enieni, “adzikuta ndi mafuta awo omwe.”
Onani Matanthauzo a Mawu Ena.