JOHN éí Gujarat, Indiadi kééhojitʼı̨́. 1950ʼsgo hazhéʼé éí Jiihóvah Yá Dahalneʼé silı̨́ı̨́ʼ. Ndi John dóó bił hajííjééʼígíí áádóó hamá éí Roman Catholics danilı̨́. Yéigo bedaʼoodląʼ niłdzil. Éí biniinaa hazhéʼé beʼoodląʼ bikʼijįʼ dajílı̨́.

Łahádą́ą́ʼ, John bizhéʼé éí há brother léiʼ bił yá aníjíjahígíí naaltsoos bichʼįʼ dííłtsos hodííniid. Áko abínígo, John éí tóshjeeh bidáaʼgi bee hálázhoozh nízaadgóó jizhgish. Hazhéʼé bikʼeh hojíłʼı̨́ jinízingo, áko hálázhoozh diłgo naʼatʼą́hí bikʼíjisdiz dóó brother naaltsoos bichʼįʼ níjístsooz.

Brother bighan léiʼgi John níyá, éí beʼasdzą́ą́ naaltsoos baazhníłtsooz. Éí Jiihóvah Yá Dahalneʼé jílı̨́. John bílázhoozh yiyiiłtsą́ągo, níká iishyeed hodííniid. First-aid kit néidiiʼą́, jizhgizhígíí há tánéízgiz, dóó hazhóʼó yikʼínáʼazdiz. Áádóó John dééh sidooígíí yá áyiilaa. Tʼáá akǫ́ǫ́ jizdáago Diyin Bizaad nizhónígo yee hachʼįʼ yáłtiʼ.

Asdzą́ą́ ayóó joobaʼgo biniinaa, John łahgóó átʼéego Jiihóvah Yá Dahalneʼé yaa nitsídeezkééz. Jiihóvah Yá Dahalneʼé dóó Catholic Church éí tʼáá ałʼąą átʼéego yee daʼoodlą́ągo bił bééhózin. Áko naakigo yee naʼídíiłkid: Jesus éísh God nilı̨́? Áádóó Daʼoodlánígíísh Mary yichʼįʼ sodadoolzin doo? Asdzą́ą́ éí Gujarati bizaad bił bééhózin áko yínaʼádíłkid yę́ę John tʼáá bí bizaad bee ííshjání áyiilaa. Éí Diyin Bizaad biiʼ ánínígíí ííshjání áyiilaa dóó naaltsoos “This Good News of the Kingdom” yee níłtsooz.

John naaltsoos ałtso yiyííłtaʼgo, tʼáá aaníí ákótʼé niizı̨́ı̨́ʼ. Ééʼ neishoodii yichʼįʼ níyá dóó tʼáá éí naakigo yee naʼázhdíiłkid. Ééʼ neishoodii yéigo báhóóchįįd dóó Diyin Bizaad hachʼįʼ ayííłhan. Hachʼįʼ hadoolghaazhgo ání: “Séítan sínílı̨́ı̨́ʼ! Diyin Bizaad biiʼ háadish Jesus doo God nilı̨́į da níigo shichʼįʼ ííshjání ánílééh. Háadish Mary doo bichʼįʼ sodiilzin da níigo shichʼįʼ ííshjání ánílééh. Shichʼįʼ ííshjání ánílééh!” Ééʼ neishoodii áátʼįįdígíí John yikʼee deesyiz. John áyidííniid: “Tsʼídá doo Catholic Churchgóó náádeeshdáał da.” Tʼáadoo akǫ́ǫ́ nináájisdzaa da!

John éí Jiihóvah Yá Dahalneʼé bił Diyin Bizaad bíhojoołʼaah ńtʼééʼ. Bíhojoołʼą́ʼígíí hoł nilı̨́įgo biniinaa Jiihóvah bá nijilʼaʼígíí baa nízhdiidzá. Wónáásgóó, łaʼ hakʼéí tʼáá ákódaadzaa. Ląʼí nááhaidóó, John bílázhoozh sid bąąhígíí, asdzání ajoobaʼ yee yénálniih. Éí binahjįʼ hweʼiinaʼ tʼáá átʼé bee Jiihóvah yá naasʼaʼ.—2 Corinthians 6:4, 6