DOREEN éí bá hastiin Wesley índída 54 binááhai, ńtʼééʼ bitsiighąąʼ bąąh tumor tsı̨́įłgo nooséeł lá, biʼdooʼniidgo bikʼee jideesyiz. * Azeeʼííłʼíní éí tʼáá díkwíhí nee nínáádidooził hodííniid. Doreen kójíní: “Díí doo yinishdlą́ą da, shił ahádingo díkwíí shı̨́ı̨́ damóo azlı̨́ı̨́ʼ. Nihí yeeʼ doo ánihiʼdilʼı̨́į da nisin. Díí doo ndi neíyíníshłíi da.”

Doreen tsídeezkéezígi átʼéego ániitʼéii łeh. Naałniih adiyoołhéełii tʼáá áníiltso tʼáá hooshchʼįʼ nihainítʼįįh. Ayóóʼííníiʼníinii naałniih adiyoołhéełii bidílnahgo éí łaʼ, shí baa áháshyą́ą doo niizįįhgo ádeidítʼááh. Ndi, kótʼéhígíí baa áháyą́ągi nantłʼago átʼé. Akʼéí dajílínígíí haʼátʼíí bee ąą ádahojilyą́ą doo? Haitʼéego bichʼįʼ hadaʼjólníi doo? Iiná nidootʼihjįʼ ahoolzhiizhgo, haʼátʼíí naawólníi doo? Ndi áłtsé éí naałniih adiyoołhéełii diné bidílnahgo baa áháyą́ągi ayóó nantłʼago átʼéegi baa nídadíitʼįįł.

KÓHOONÍÍŁ

Azeeʼ aa ádaalneʼjí baa óltaʼígíí éí daʼninénę́ęgi azeeʼ bidíʼdóołniiłii dahólǫ́ǫgo ádeeleʼ. Ałkʼidą́ą́ʼ éí diné tʼáá díkwíhí bee ninádahahááh ńtʼééʼ. Naałniih dóó diné yéigo atétʼįįhgo tʼáadoo hodinaʼí bitsʼą́ą́dóó daatsaah. Azeeʼálʼı̨́ı̨́góó danízaad, dóó akʼéí łaʼ tʼáá hooghangi ádaa áhályą́ągo ájídin łeh ńtʼééʼ.

Naałniih naʼałtseedii idílnahgo, azeeʼ bee akʼehodidoodleełii dahólǫ́ǫgo ádaalneʼ, áko tʼáá nízaadgóó jiináa łeh. Naałniih tʼáadoo hodinaʼí naʼaltseedii yę́ę éí kʼad haashı̨́ı̨́ nízahjįʼ tʼáá bikʼé hodidleeh. Ákótʼée ndi éí doo ąąh nídoodzih da. Kótʼéego nízaadgóó bił joogáałgo éí tʼáá yéigo hatsʼíís yąąh dahwiidoołʼaał. Łaʼda kótʼéego biniinaa bitsʼíís baa dahooʼaahgo, baa áháyą́ągi nantłʼa łeh.

Áko díí biniinaa éí hooghangi diné ádin nidahaleʼ yę́ę kʼad éí ląʼí tʼóó azeeʼálʼı̨́įdi beʼiinaʼ  nidahatʼééh. Iiná nidootʼihjįʼ hodeeshzhiizhgo atsʼíís átʼée dooleełígi ląʼí diné doo hazhóʼó bił béédahózin da. Áádóó anááł daʼdootsaałgi doo ląʼí hanááł łaʼda daaztsą́ą da. Ádin jidooleełígi átʼéego doo bééhózingóó biniinaa, akʼéí jílínígíí ąą áhojilyą́ą doogi bééjíldzid łeh. Áko haʼátʼíí áká adoolwoł?

BINAHOZHDOOʼAAŁ

Doreen ádzaa yę́ęgi átʼéego, diné ląʼí kótʼéego bichʼįʼ chʼídahwiitʼaahgo yínííł daaleeh. Azhą́ ákótʼéego yínííł, náhádzid, dóó cha bił hooʼą́ ndi haitʼéego biniyé hashtʼezhʼdidoonííł? God bá naalʼaʼí łaʼ kóníigo sodoolzin: “Nihijéí dahodooyąąłígíí biniyé nihí dayéełkaahii dayíníiltaʼgo bínanihiníłtin.” (Psalm 90:12) Haitʼéego lá baa honiidzą́ągo díí shikʼéí bíyoołkááł niʼníłdįįjįʼ bíká anáshwoʼ doo diníigo Jiihóvah bichʼįʼ sodilzin doo.

Díí hazhóʼó binahatʼáa doo. Bąą dahooʼaʼígíí tʼahdii tʼáá yáłtiʼgo índa baa nídadíitʼįįł nízingo, éí doo akʼihazhdoodzih jizlı̨́ı̨́ʼgóó háí há sizı̨́į doo nízinígi bił baa nídazhdóotʼįįł. Ájídingo náhwiidiiyoolnaałgi, azeeʼálʼı̨́ı̨́góó daatsʼí dooleełgi, doodaiiʼ ałʼąą ádaatʼéii azeeʼ ąą ádoolníiłgi tʼáadoo bichʼįʼ tʼą́ą́ʼ dajílínígo bił baa nídazhdóotʼįįł. Áko bąą dahooʼaʼígíí doo ádá hadoozih silı̨́ı̨́ʼgóó, doo saad hólǫ́ǫ da doo, índa doo ádeeshníił da ńtʼééʼ lá, doo hwiindzin da doo. Tʼáá ákǫ́ǫ́ tsı̨́įłgo dóó tʼáadoo bichʼįʼ tʼą́ą́ʼ dajílínígo baa náhátʼı̨́įgo éí bąą dahooʼaʼígíí baa áháyą́ą dooígi hazhóʼó baa nitsáhákees doo. “Kótʼéego níinii ádingi biniyé ádahatʼíinii tʼóó ąąh nidahwiiłkaad,” ní Diyin Bizaad.—Proverbs 15:22.

ÁKÁ ADIILWOŁGI

Ąą áhályáanii éí bąą dahooʼaʼígíí haʼólníigo ájósin doo. Ayóóʼádanííníiʼní dóó kǫ́ǫ́ nił dahoniidlǫ́ bijiníi doo. Díí haitʼéego bił ííshjání óolzin doo? Éí yee yichʼįʼ haʼólníi dooígíí índa bił yáʼátʼéhígíí naaltsoos bichʼįʼ jółtaʼ, doodaiiʼ bá hojitaał doo. Bílaʼ jótąʼgo índa hazhóʼógo bichʼįʼ yájíłtiʼgo yee haʼólníi łeh.

Éí naa náánádzá bijiníi doo. Łaʼ baa háneʼgo éí: “Iiná niitʼéehgo éí azhdiitsʼaʼgi tsʼídá ákéeʼdi hąą náádiilyé hání. Azhą́ ałhosh nahalin ndi, tʼah adiitsʼaʼgoda átʼé, áko saad bee yátiʼgi baa jistiʼ doo.”

Tsʼídá yéigo achʼįʼ hodiiʼnáahgo, sohodizin bee haʼahóní, áko sodadoolzin. Diyin Bizaad łahgo  yaa halneʼ, éí yilʼaadii Paul dóó yił naakaiígíí ayóó átʼéego tiʼdahojiyooníihgo hwee daʼiinaʼ yę́ę doo bééhózin da hwiniidzı̨́ı̨́ʼ. Áko haʼátʼíí bíká chodajoosʼįįd? Paul éí bikʼis náyookąąhgo ííłní: “Nihí ałdóʼ nihisodizin bee nihíká anáhjah.”—2 Corinthians 1:8-11.

TʼÁÁ AANÍÍ ÁÁNÍIŁGO BAA NITSÍNÍKEES

Bąą dahooʼaʼígíí ájídin jidooleełgi ayóó yínííł yisʼą́. Háálá anoonééł góneʼ yeeʼ nihá adahwiiztʼiʼ hwiindzin ndi, doo bił ánihiʼdilyaa da. (Romans 5:12) Diyin Bizaad éí anoonééł anaʼí átʼé yiłní. (1 Corinthians 15:26) Áko díí doo dazdootsaał da jinízinígi éí tʼáadoo átʼéhí da.

Ákondi, hweʼiinaʼ nidootʼihjįʼ hodeeshzhiizhgo éí akʼéí dajílínígíí hoł daayéeʼ ndi, biniyé hashtʼeʼádazdólzin doo. “ Iiná Nidootʼihjįʼ Ahoolzhiizhgo” bikááʼígíí éí ájídin jidooleełjįʼ hodeeshzhiizhgo hatsʼíís átʼée dooleełgi dabikááʼ. Ndi, doo tʼáá átʼé kótʼéego ádooníił da, índa doo kótʼéego ałkééʼ áhodooníił da. Iiná niitʼéehgo éí łaʼ kótʼéego nidootʼih.

Bąą dahooʼaʼ yę́ę nitsʼą́ą́ʼ ádin silı̨́įʼgo, nikʼis níká adeeshwoł nił nínę́ę bíká hodíílnih. Ąą áhályáanii yę́ę índa akʼéí danílínígíí éí díí bąą dahooʼaʼ yę́ę bikʼi hooldoh, dóó kʼad doo bichʼįʼ nahwiiʼnáa da, bidiiʼníi doo. Bílaʼashdlaʼii Áyiilaii bibee ayóóʼóʼóʼní yee ánihiłníigo “daneeznáanii éí tʼáadoo bił béédahóziní da.”—Ecclesiastes 9:5.

AYÓÓ ÁTʼÉEGO ĄĄ ÁHÁLYÁANII

Łaʼda bíniʼ níká análwoʼ

Akʼéí bąą dahooʼaahgo baa áháyą́ągi índa ájídin bikééʼdóó God baʼííníidlíi doo. God éí saad bee yádaatiʼii dóó áká análwoʼii bee haʼíinilníigo ánihósin. Doreen ání: “Łaʼda níká iishyeed shił níigi tʼáadoo nahjįʼ kwíishłaa da. Ayóó átʼéego diné nihíká ííjéeʼgi baa ahééh niidzin. Shahastiin dóó shí éí tʼáadoo bahatʼaadí Jiihóvah kónihiłní, ‘Nihíká adeeshwoł biniyé kǫ́ǫ́ nihił honishłǫ́.’ Díí doo beidiyeeshnah da.”

Tʼáá aaníí Jiihóvah ayóó átʼéego Ąą Áhályáanii nílı̨́. Ánihiilaii nilı̨́įgi éí diniiʼniihgi dóó cha niidlı̨́įgi bił bééhózin. Bee áká aʼdoowołii dóó saad bee haʼahóníinii łaʼda yee nihíká adoolwołgi Jiihóvah yíneelʼą́ dóó íinízin. Ndi, biláahgo yee nihíká adoolwołii éí anoonééł ádingo íidoolííł índa tsʼídá tʼóó ahayóí diné ádaadinę́ę ninéididoołjah. (John 5:28, 29; Revelation 21:3, 4) Ákohgo tʼáá áníiltso éí yilʼaadii Paul ánínę́ęgi ádadiiʼníi doo: “Aniné nílíinii, nizǫ́ǫ́zshąʼ éí háájí? Jishchááʼ nílíinii, bee nihikʼeh dídlíiniishąʼ éí háájí?”—1 Corinthians 15:55.

^ par. 2 Doo tʼáá aaníí díí daházhiʼ da.