God yee ádee hahaasdzíiʼii tʼáá aaníí ádooníiłgoósh yiniidlą́ą doo? Jesus éí tʼáá aaníí ádoonííł nízin ńtʼééʼ, áádóó dabíistsʼą́ą́ʼ yę́ę binaʼnitin dayoodlą́ągo áyiilaa. Dził binániigi naneeztą́ą́ʼ yę́ęgi Matthew 5:18 áníigo kótʼéego hajoodzííʼ: “Tʼáá aaníí ánihidishní, yádiłhił índa nahasdzáán bił yóóʼahóóyáá [ládą́ą́ʼ, NW] tʼááłáhígo dah alzhin áádóó tʼááłáhígo adeesdzo nidi bee hazʼáanii bitsʼą́ą́dóó doo bił yóóʼahodoogáał da, nidi ałtso bohoolyaago índa.”

Hííbrewjí saad bee naadzooígíí łaʼ tsʼídá áłtsʼíísígíí éí י (yod), díí Tetragrammaton Diyin Jiihóvah bízhiʼ dólzinii, tsʼídá áłtsé bee yisdzohgo ályaa. * Áádóó bee hazʼáanii yíndaʼniłtinii dóó Férisiiz éí God bibee hazʼáanii saad biih naaznilígíí dóó saad bee naadzooígíí “tʼááłáhígo adeesdzo” ndi ayóó ílı̨́įgo yaa nitsídaakees.

Jesus éí yáʼąąshii dóó nahasdzáán bił yóóʼahóóyáá ládą́ą́ʼ níi ndi, God bibee hazʼáanii biiʼ tʼáá áłtsʼíísíjįʼ adeesdzoígíí doo bił yóóʼahodoogáał da, ndi tʼáá aaníí ádoonííł. Ákondi Diyin Bizaad áníigo éí yáʼąąshii dóó nahasdzáán doo bił yóóʼahodoogáał da. (Psalm 78:69) Áko díí bidziilgo bee haʼódziihígíí áníigo God bibee hazʼáanii biiʼ tʼáá áłtsʼíísíjįʼ adeesdzoígíí tʼáá aaníí ádoonííł.

Áłtsʼíísígo adeesdzoígíísh Diyin Jiihóvah bił nilı̨́? Aooʼ, ákójítʼé. Díí baa nitsíníkees: Ałkʼidą́ą́ʼ Ízrel dineʼé yę́ę, Atisʼadeesdzá bijı̨́ dibé yázhí nááhániih yę́ęígíí bitsʼin doo łaʼ kʼídadoohtih da, dahodooʼniid. (Exodus 12:46) Díí áłtsʼíísígo bee hazʼáanii átʼé hwiindzin. Dibé yázhí bitsʼin tʼááká kʼídaootííh lágo dahodooʼniidígi, bikʼidazhdiitą́ą́sh? Nda shı̨́ı̨́. Diyin Jiihóvah tʼáá íídą́ą́ʼ bił bééhózingo díí éí tʼáá bilą́ąjįʼ baa chʼíhootʼáanii átʼéego Mesáíyah tsin bąą biʼdiisyı̨́įgo bitsʼin doo łaʼ kʼídootih da.—Psalm 34:20; John 19:32, 33, 36.

Jesus yee haadzííʼígíí haʼátʼíí yee nanihinitin? Tʼáá íiyisíí éí yiniidlą́ągo tsʼídá tʼáá níléí ádaałtsʼíísíjįʼ Diyin Jiihóvah yee ádee hahaasdzíiʼii tʼáá aaníí ádadoonííł. Dooládóʼ shı̨́įda, Hííbrewjí saad bee naadzooígíí tsʼídá áłtsʼíísí ndi, adziilgo ánáʼoodlííł!

^ par. 3 Gríikjí saad bee naadzooígíí tsʼídá áłtsʼíísígíí éí iota, díí Hííbrewjí saad bee naadzooígíí י (yod), kʼasdą́ą́ʼ bił aheełtʼé. Mózes éí God bibee hazʼáanii tʼáá Hííbrewjí saad bee ályaa yę́ęgi átʼéego áádóó tʼáá éí saad bee náás yiltsʼiłgo, díí Hííbrewjí saad bee yisdzoh yę́ęígíí daatsʼí éí Jesus áhyiłníí ńtʼééʼ.