IINÁ HÓZHǪ́ NÁHÁSDLĮ́Į́ʼ! Ánihiilaii éí hoolʼáágóó iiná nihaidooléełgo yee nihichʼįʼ ádee haadzííʼ. Éí tʼáá kweʼé nahasdzáán bikáaʼgi dah hiniiʼnáa doo nihiłní. Ákondi, díí éí tʼóó ahayóí diné doo dayoodlą́ą da. ‘Tʼáá áníiltso niheʼiinaʼ nidahatʼééh,’ dóó ‘niheʼiinaʼ éí tʼáá ákótʼéhígo ályaa,’ daaní. Łaʼ éí deiitsaahdóó bikʼijįʼ yáʼąąshgo yiidleeh áadi náádahiniiʼnáa dooleełgo ánihiʼdiilyaa danízin. Nishąʼ, haitʼéego baa nitsíníkees?

Díí táaʼgo Diyin Bizaad yaa néiitʼínígíí áłtsé baa nitsíníkees doo: Diné nilíinii haitʼéego hadilyaa? God éí nahasdzáán dóó bílaʼashdlaʼii haʼátʼíísh biniyé áyiilaa? Áádóó haitʼéegoshąʼ anoonééł bílaʼashdlaʼii bídéétʼiʼ silı̨́ı̨́ʼ?

DINÉ NILÍINII HADILYAAÍGÍÍ

God éí tʼáá ałtsoní nahasdzáán bikáaʼgi ádaalyaaígíí doo bílaʼashdlaʼii bił ahíłtʼéégóó áyiilaa da. Haitʼéego shąʼ? Diyin Bizaad áníigo éí bílaʼashdlaʼii God “biníjíłtʼéego” hadilyaa ní. (Genesis 1:​26, 27) Díísh haitʼéego áhyiłní? Éí God átʼéhígíí átʼéego dahiniiʼnáa doogo áhyiłní. Bílaʼashdlaʼii éí God bí ayóóʼóʼóʼníinii dóó tʼáá ákogi éʼétʼéii yee hináa doogo bee yílyá.

Bílaʼashdlaʼii éí nitsíkees dóó hazhóʼó nahaʼáa dooleełgo bąąh niilyá. Áádóó God éí bídin niidlı̨́į dooleełgo baa íhwiidiilʼááł dóó yáʼádaatʼéehii tʼéiyá baa ahééh niidzin doogo ánihiʼdiilyaa. Éí biniinaa yá adahwiisʼáágóó hólónígíí, nahasdzáán bee hadilyaaígíí, nidaashchʼąąʼígíí, naaltsoos deiyíníiltaʼígíí, dóó sin dah ádaatʼéii ayóó baa ahééh niidzin. Aláahgo ílínígíí éí bílaʼashdlaʼii ábiilaii yichʼįʼ naháłáa dooleełgo ábiʼdiilyaa. Éí biniinaa nahasdzáán bikáaʼgi hadadilyaaígíí dóó bílaʼashdlaʼii, doo ahąą nijóónííł átʼée da.

Díí baa nitsíníkees doo: Hazhóʼó nitsáhákees dóó naanish ałʼąą ádaatʼéhígíí jiichįįh jidooleełgo God nihainílá. Nizhónígo hódzą́ bee hojíyą́ągo jinooséełgoósh God tʼóó kóníshgháníjįʼ hijináa dooleełgo áhodoolííł? Éí bílaʼashdlaʼii tʼáá bí tʼéiyá hazhóʼó nitsídaakees dóó naanish yáʼátʼéehii bee hólǫ́ǫ doogo God nahasdzáán bikáaʼgi hoolʼáágóó bił dahózhǫ́ǫgo dahiináa doo biniyé áyiilaa.

GOD ÍINÍZINÍGÍÍ

Łaʼ diné éí bílaʼashdlaʼii nahasdzáán bikáaʼgi hoolʼáágóó doo dahináa da doo daaní. Éí bílaʼashdlaʼii ná bóhontáahgo bitah hadlaahígíí éí yáʼąąshdi hoolʼáágóó God yił dahiináa doo danízin.  Díí nitsáhákees, tʼáá aaníigo ládą́ą́ʼ, doo yáʼáshǫ́ǫ́góó hoogáłígíí God bitsʼą́ą́dóó átʼée doo. Ákondi God éí doo ákójítʼée da. Diyin Bizaad áníigo éí: “Háálá yee átʼéii tʼáá ałtso tʼáadoo átʼéhí da; Diyin God éí tʼáá aaníí baʼahódlíii nilı̨́ áádóó doo ákwii éʼétʼéii bąąh ádin; tʼáá ákogi átʼéii índa tʼáá ákóneʼ átʼéii nilı̨́.”—Deuteronomy 32:4.

God nahasdzáán biniyé áyiilaaígíí éí Diyin Bizaad ííshjání ííłʼı̨́. Kóní: “Yáʼąąsh bił hiníláii éí Bóhólníihii [Jiihóvah] bí, nidi nahasdzáán éí dadineʼé badaʼáłchíní yeidiníʼą́.” (Psalm 115:16) God éí nahasdzáán nihighan ayóí áhonóolingo nihá áyiilaa, áádóó doo bídin hóyééʼgóó hoolʼáágóó bikááʼ dahiniiʼnáa doo biniyé nihaa deetʼą́.—Genesis 2:​8, 9.

“Yáʼąąsh bił hiníláii éí Bóhólnííhii [Jiihóvah] bí, nidi nahasdzáán éí dadineʼé badaʼáłchíní yeidiníʼą́.”—Psalm 115:16

God bílaʼashdlaʼii biniyé áyiilaaígíí ałdóʼ Diyin Bizaad ííshjání ííłʼı̨́. Éí áłtsé hastiin dóó asdzání áyiilaaígíí kwíidííniid, “Nahasdzáán bikááʼgóó nihinołtʼeehgo kʼeeʼąą dínóhtʼįįh, . . . índa nahasdzáán bikáaʼgi dahináago naaldeehii tʼáá ałtso bee nihídahólníih doo.” (Genesis 1:28) God bóhojółníihgo tʼéiyá, Ádam dóó Íiv dóó baʼáłchíní ałkééʼ daʼahéelchíłígíí éí hoolʼáágóó nahasdzáán baa ádahojilyą́ągo bikáaʼgi dahijiináa doo ńtʼééʼ, yáʼąąshdi éí ndagaʼ.

HAʼÁTʼÍÍSH BINIINAA NIIʼNÉ?

Haʼátʼíísh biniinaa niheʼiinaʼ nidahatʼééh? Diyin Bizaad éí łaʼ God yá naalʼaʼí nilı̨́ı̨́ ńtʼéeʼgo yaa halneʼ, doo yáʼáshxǫ́ǫ́góó ádiilyaaígíí biniinaa Séítan the Devil jizlı̨́ı̨́ʼ, éí nahasdzáán biniyé ályaa yę́ę yidoołchxǫǫłgo yaa nídiidzá. Daash hóótʼįįd?

Séítan éí Ádam dóó Íiv God yikʼijįʼ dooleełgo yá hodeezʼą́. Bí áníílá God éí haʼátʼíí shı̨́ı̨́ yáʼádaatʼéehii dóó doo yáʼádaatʼéehii tʼáá nihí bee nihíhólníih dooleeł yę́ę niʼ, nihitsʼą́ąjįʼ kóyósin. Séítan yikʼeh hółʼįįdgo God yikʼijįʼ náhaazhʼáázh. Éí biniinaa hweʼiinaʼ ninítʼiʼ, God nahoneeztą́ą́ʼ yę́ę bohoolyaa. Nahasdzáán ayóí áhonóolingo hoolʼáágóó hijináa dooleeł yę́ę yóóʼajííłdéél.—Genesis 2:17; 3:​1-6; 5:5.

Ádam dóó Íiv ájíítʼįįdígíí bílaʼashdlaʼii nilíinii dííshjı̨́įdi tʼahdii yee nítʼı̨́. Diyin Bizaad ání: “Diné tʼááłazhdiltʼéhígíí hwee nahasdzáán bikáaʼgi ádił niʼiidzííh hazlı̨́ı̨́ʼ. Áko bąąhági átʼéii bee aniné hazlı̨́įʼgo nihokááʼ dineʼé tʼáá ałtso daniné silı̨́ı̨́ʼ, háálá tʼáá ádzíłtso ádił nidaʼdziisdzííʼ.” (Romans 5:12) Niheʼiinaʼ nidahatʼéhígíí éí God doo yee nihoníʼą́ą da. Niʼiidzííh dóó anoonééł éí danihizhéʼé yę́ę bitsʼą́ą́dę́ę́ʼ nihihodiiłtʼiʼgo biniinaa daniiʼné.

NAHASDZÁÁN BIKÁAʼGI HOOLʼÁÁGÓÓ HINIIʼNÁA DOOGO ÁTʼÉ

Íídendi ádahóótʼįįd yę́ę éí nahasdzáán dóó bílaʼashdlaʼii biniyéii ádaalyaa yę́ę éí God íinízinígíí doo łah átʼéego ánááyiidlaa da. God bí ayóóʼóʼóʼní dóó bí tʼáá ákogi átʼéego éí niʼiidzííh dóó anoonééł biyiʼdę́ę́ʼ nihéédidoochił nihóʼní. Yilʼaadii Paul díí yaa chʼíhoníʼą́: “Háálá Diyin God bichʼįʼ ádił niʼiidzííh éí aniné niyiilé, nidi Jesus Christ nihiBóhólníihii bee Diyin God éí iiná doo ninítʼiʼii tʼáá jííkʼe nihainílá.” (Romans 6:23) Jó, “God éí nihokááʼ dineʼé tʼáá íiyisí ayóóʼájóʼníigo bąą haYeʼ [Jesus Christ] tʼááłáʼí há yizhchínígíí baazhníłtı̨́, áko tʼáá háiida boodlą́ągo baa dzólíhígíí éí doo ádoodįįł da, nidi iiná doo ninítʼiʼii bee hólǫ́ǫ dooleeł.” (John 3:16) Ádam tʼáá ałtso yóóʼayííłdéél yę́ę, Jesus beʼiinaʼ ninéidiníʼánígíí yee nátʼą́ą́ʼ nináyiisniiʼ. *

Hodíínááʼígo nahasdzáán ayóí áhonóolingo God yee ádee haadzííʼ yę́ę bihodoolnííł. Jesus yee naʼneeztą́ą́ʼ yę́ę bikʼeh dahoniilʼı̨́įgo áadi dahiniiʼnáa doo: “Áhoołtsʼóózígo yah ahóótʼiʼí góneʼ yah ahohkááh, háálá atíʼoolníiłjįʼ hóteelgo yah ahóótʼiʼ áádóó hóteelgo bichʼįʼ honítʼiʼ, áko diné ląʼí ákóneʼ yah ahikááh. “Háálá iináajįʼ áhoołtsʼóózígo yah ahóótʼiʼ áádóó áhoołtsʼóózígo bichʼįʼ honítʼiʼ, áko tʼáá díkwíí éí yikʼídahakááh.” (Matthew 7:​13, 14) Nahasdzáán bikáaʼgi hoolʼáágóó hinishnáa dooleeł jinízingo éí tʼáá hó háálá kʼé silá. Áko, nish éí haa díínííł?

^ par. 17 Nihikʼé nináʼílyáagi haitʼéego nihíká adoolwołgi łaʼ shił béénááhodoodzįįł nínízingo éí www.jw.org online góneʼ áádóó naaltsoos Diyin Bizaad Nanihinitingo Átʼé Jiihóvah Yá Dahalneʼé ádayiilaaígíí bíhooʼaah 5 góneʼ dínííłʼįįł.