JANUARY 2017 biiʼ ndaʼałkaahii éí nihookáaʼgi nihodoogáałjįʼ bichʼįʼ hoolzhish daaní. Nihodoogááł bichʼįʼ hoolzhishgo éí náʼoolkiłí nahalin, “Ayóó Áhodooníiłgo Bichʼįʼ Oolkił” * yee dayózhí. (Footnote níníłʼı̨́.) Tłʼéʼííłníiʼgo oolkił, áajįʼ nihodoogááł daaní. January 2017go 30 seconds náásjigo ándayiidlaa. Kʼad naakidóó nááʼáłníiʼjįʼ dah alzhin, tłʼéʼííłníiʼgo bichʼįʼ oolkił. Díí ndaʼałkaahii nihodoogááł kodę́ę́ʼ bichʼįʼ hoolzhish daaní!

Ndaʼałkaahii 2018 yihahgo ałhínáánéiikaigo nihodoogááł kodę́ę́ʼ bichʼįʼ hoolzhish yaa nináádeidootʼįįł. Ayóó Áhodooníiłgo Bichʼįʼ Oolkiłígíí, éísh nihodoogááł kodę́ę́ʼ bichʼįʼ hoolzhish ííshjání íidoolííł? Haitʼéego baa nitsíníkees? Tʼóósh baaʼihgo nihił hodeeyá? Díí naʼídíkidígíí yéigo nanitłʼah shı̨́ı̨́ nínízin. Ndaʼałkaahii díí nihodoogááłígíí doo bił ałghaʼdaʼditʼáah da. Diné tʼóó ahayóigo doo kodę́ę́ʼ hoolzhishgóó yaa nitsídaakees.

Mííl ánéelą́ąʼgo, nihá yáʼáhootʼéehgo áhodoonííł bichʼįʼ yoołkáałgo dayoodlą́. Łaʼ ádaaníigo, nahasdzáán hoolʼáágóó siʼą́ągo, bílaʼashdlaʼii bikááʼ kéédahatʼı̨́į doo. Éí nihichʼįʼ ííshjání íidoolíiłgo átʼé. Áádóó anáádadiʼní, niheʼiinaʼ yáʼátʼééh nídadoodleeł. Díísh tʼáá aaníí deiniidlą́? Tʼáásh aaníí tʼóó baaʼihgo nihił hodeeyá?

^ par. 3 Ndaʼałkaahii éí bilagáana kʼehjí “The Doomsday Clock” deiłní.