Tʼah ashkii yázhí nílı̨́įgo Sámuel níbaal biiʼ hodílzingi haghan dóó nijilnish ńtʼééʼ. Ákweʼé God bichʼįʼ hodílzingo ahínáʼiildah. Haash yitʼéego Sámuel níbaal siʼánígi nihoʼdeeltı̨́? Sámuel bimá Hánnah áłtsé baa íhwidiilʼááł.

Hánnah éí chʼééh awééʼ jinízin ndi, doo hwee hóleʼ átʼée da. Áko jichago Jiihóvah níjookąąhgo shíká anilyeed bijiníigo bichʼįʼ sozdoolzin. Ashkii shéłchı̨́įgo éí níbaal biiʼ hodílzingóó biʼdeeshni, áadi bighango naalnish dooleeł jiníigo yee ádee haadzííʼ. Jiihóvah hasodizin yidiiztsʼą́ą́ʼ, áko ashkii jischı̨́ áádóó Sámuel bee jíízhiʼ. Áko tʼáá bee ádee hadzoodzííʼ yę́ęgi átʼéego ájiidzaa. Sámuel tááʼ doodaiiʼ dı̨́ı̨́ʼ binááhaigo níbaal siʼánígi God bá nijilʼaʼ doo biniyé ákǫ́ǫ́ bił jiníʼáázh.

Íílai éí níbaal siʼánígi aláahgo náaʼiiłniihii jílı̨́. Éí God bidááhdóó álą́ąjįʼ diné bá jizı̨́. Hayeʼ naakigo ákweʼé bił nijilnish. Shą́ą́ʼ béénílniihgo éí God biníbaal biiʼ hodílzingi, éí God bikin biiʼ sohodizinii átʼé. Ákweʼé yáʼádaatʼéehii tʼéiyá óʼooníiłgo bee hazʼą́. Ndi Íílai biyeʼ nidiltʼéego éí tʼóó baaʼihígi áátʼįįłgo yaa naaʼaash. Sámuel éí díí baa jooʼashígíí yooʼı̨́. Íílai biyeʼ nidiltʼéego áátʼįįdígíísh Sámuel ałdóʼ ákójíítʼįįd?— Ndagaʼ, Sámuel éí bimá dóó bizhéʼé tʼáá ákogi ádaatʼéii yee nabineeztą́ʼígíí tʼéiyá bikʼeh ájoonííł.

Íílaishąʼ tʼáá áłah hayeʼ haazhdoolííł ńtʼééʼ?— Tʼáá ákǫ́ǫ́ atízhdoolííł ńtʼééʼ. God bikin biiʼ hodílzingi nijilnishgo doo bá hojisʼą́ą da doo ńtʼééʼ. Íílai tʼáadoo ákójiidzaaígíí biniinaa tʼáá ájíłtso Jiihóvah hachʼįʼ báhóóchįįd. Éí biniinaa Jiihóvah atídahodeeshlííł niizı̨́ı̨́ʼ.

Sámuel éí Jiihóvah ádííniidígíí Íílai bee bił hojoolneʼ

Sámuel łah tłʼéeʼgo ajiłhoshgo, háíshı̨́ı̨́ hózhíigo jidiiztsʼą́ą́ʼ: ‘Sámuel!’ hodííniid, áádóó Íílai bichʼįʼ jílwod, ńtʼééʼ Íílai áháłní: ‘Doo níízhiʼ da.’ Naakidi ákónáánádzaa. Áádóó bikʼijįʼ ákónáánádzaago Íílai éí Sámuel ííłní, iinééʼ náádisínítsʼą́ąʼgo kódidííniił bił ní: ‘Tʼáá shǫǫdí, Jiihóvah, hanidziih; íísístsʼą́ą́ʼ.’ Áko Sámuel éí díí biʼjiilaa. Áádóó Jiihóvah áháłní: ‘Díí Íílai bee  bił hodíílnih, haghądóó tʼóó baaʼihígi baa jookahígíí biniinaa atídahodeeshlííł.’ Sámuel éí Íílai bee bił hozhdoolnihígíísh bá nanitłʼa nínízin?— Aooʼ. Sámuel éí tʼáá íiyisíí hoł yééʼ ndi, Jiihóvah áhodííniidígíí bikʼeh hojííłʼįįd. Jiihóvah ádííniidígíí éí tʼáá aaníí ákóhóótʼįįd. Íílai tʼáá áłah biyeʼ biʼdiisyı̨́, Íílai ałdóʼ ájídin.

Sámuel éí beʼiilʼı̨́į doogi nizhónígo nihá íʼiilaa. Azhą́ shı̨́ı̨́ binaagóó doo yáʼádaatʼéehii baa ooldahgo yooʼı̨́ı̨́ ndi, bí éí tʼáá ákogi ádaatʼéii áátʼįįd. Nishąʼ? Sámuel nahalingo tʼáásh ákogi ádaatʼéii tʼéiyá áánííł doo? Ákwíindzaago éí Jiihóvah, nimá dóó nizhéʼé bił da hózhǫ́ǫgo ádíílííł.

DIYIN GOD BIZAAD BIIʼ YÍDÍÍŁTA

  • 1 Samuel 2:22-26; 3:1-21