Haʼátʼíísh biniinaa diné Jeremáíyah yichʼįʼ bádahachįʼ?

Jiihóvah éí Jeremáíyah yisdá yííłtı̨́

Diné éí Jiihóvah bee bichʼįʼ yádeeltiʼgo, łahda tʼóó nihaa daadloh łeh. Doodaiiʼ tʼóó nihichʼįʼ bádahachįįh. Áko éí biniinaa God baa yádeiltiʼígíí tʼóó niʼ kódadiilnííł daniidzįįh. Łahdaásh ákwíí nínízin łeh?— Diné léiʼ tʼah ániid nijigháago, Jiihóvah ayóíʼájóʼníigo baa nahojilneʼígíí tʼóó kʼasdą́ą́ʼ niʼ kójiilaa níigo Diyin God Bizaad yaa halneʼ. Éí Jeremáíyah wolyé, kodóó baa íhwidiilʼááł.

Jeremáíyah tʼah ániid nijigháago Jiihóvah áháłní, Ízrel dineʼé bichʼįʼ hadíídzih, doo yáʼádaashxóonii baa ndaahkaaígíí niʼ kódaahłééh. Díí ákó bizhdidooniiłgi Jeremáíyah há nanitłʼa, dóó bikʼee hoł yééʼ. Éí biniinaa Jiihóvah kóbizhdííniid: ‘Ádideeshniiłgi doo shił bééhózin da, tʼah ashkii nishłı̨́.’ Ńtʼééʼ Jiihóvah áháłní: ‘Tʼáadoo náníldzidí. Níká adeeshwoł.’

 Áko Jeremáíyah diné bichʼįʼ hadzoodzííʼ, doo yáʼádaashxóonii baa ndaahkaaígíí doo niʼ kódaahłééhgóó bikʼee tidaʼhwiidoohnih. Jeremáíyah ádííniidígíísh diné yikʼeh dahóółʼįįd nínízin?— Ndagaʼ. Łaʼ tʼóó baa adaʼniidloʼ doodaiiʼ łaʼ éí bichʼįʼ bádahóóchįįd. Nááná łáʼ éí dahodiyiilyééł daniidzı̨́ı̨́ʼ! Ákoshąʼ Jeremáíyah haʼátʼíí niizı̨́ı̨́ʼ?— Níjísdzíidgo kózhdííniid: ‘Kʼad éí Jiihóvah doo baa yánáánáshtiʼ da dooleeł.’ Ákoósh tʼáá aanii Jeremáíyah tʼóó ákójiidzaa?— Ndagaʼ, tʼáadoo da. Jiihóvah ayóíʼájóʼnínígíí biniinaa tʼáá baa yájoołtih. Áko éí biniinaa Jiihóvah yisdá hóółtı̨́.

Hastóí doo yáʼádaashóonii léiʼ, łah Jeremáíyah éí ahoodzą́ą́ góyaa hashtłʼish yiih dah hwiisxan. Tó dóó chʼiyáán tʼáágééd. Díí hastóí éí Jeremáíyah tʼáá ákóyaaí dazhdootsaał dah hóʼní. Ndi Jiihóvah háká elwodgo ahoodzą́ą́dę́ę́ʼ yisdá hóółtı̨́!

Jeremáíyah áátʼįįdígíí haʼátʼíísh bitsʼą́ą́dóó bíhwiidííłʼááł?— Azhą́ shı̨́ı̨́ łahda Jeremáíyah nínáldzííh ńtʼééʼ ndi, Jiihóvah baa nahojilneʼígíí tʼáadoo niʼ kójiilaa da. Jiihóvah baa yáníłtiʼgo diné naa daadloh doo, doodaiiʼ nichʼįʼda bádahodoochįįł. Biniinaada baa yádíníizįįł, doodaiiʼ bikʼee nídííldzííł. Ákondi, Jiihóvah baa yáníłtiʼígíí tʼááká niʼ kóólééh lágo. Jeremáíyah yíká eelwodígi átʼéego, Jiihóvah éí tʼáá áłahjįʼ níká análwoʼ doo.

DIYIN GOD BIZAAD BIIʼ YÍDÍÍŁTA

  • Jeremiah 1:4-8; 20:7-9; 26:8-19, 24; 38:6-13