Jéfthahshąʼ haʼátʼíí Jiihóvah yichʼįʼ yee ádee hahadziih?

Tʼáá nináháhááh bikʼeh Jéfthah bitsiʼ dabikʼis baa nídaakah

Naʼashchʼąąʼígi atʼéédísh yííníʼı̨́?— Díí atʼééd éí hastiin léiʼ Jéfthah wolyéego bitsiʼ. Diyin God Bizaad éí díí atʼééd bízhiʼígíí doo yee nihił halneʼ da. Ndi nihił bééhózingo éí bizhéʼé dóó Jiihóvah bił hózhǫ́ǫgo ájiilaa. Díí atʼééd dóó bizhéʼé Jéfthah baa íhwidiilʼááł.

Jéfthah éí hastiin yáʼátʼééhii jílı̨́, dóó tʼáá áłahájįʼ hatsiʼ Jiihóvah bee nijinitingo bá náhwijiiłʼaah ńtʼééʼ. Áádóó ałdóʼ díí diné ayóó bidziilgo yáʼátʼéehgo naʼaʼeeshii nilı̨́. Éí binahjįʼ Ízrel dineʼé ádabiłní nihííʼishgo, nihee daʼanaʼí bił daʼahiigą́ą doo.

Jéfthah éí akʼeh dadidiidleeł níigo God yichʼįʼ sodoolzin. Jéfthah éí Jiihóvah díí yee yichʼįʼ ádee haadzííʼ. Akʼeh dadiidlı̨́ı̨́ʼ ládą́ą́ʼ éí anaaʼdę́ę́ʼ nídzídzáago tsʼídá áłtsé shichʼįʼ chʼíníyáhígíí éí Jiihóvah bí jidooleeł jidííniid. Áko áłtsé hachʼįʼ chʼíníyáhígíí éí níbaal  biiʼ hodílzingi hweʼiinaʼ ninítʼiʼjįʼ hojílǫ́ǫgo ákweʼé nijilnish doo. Íídą́ą́ʼ níbaal biiʼ hodílzingi diné áłah nídaadleehgo God bikʼeh hóʼı̨́įgo yichʼįʼ dahodísin. Áko ńtʼééʼ Jéfthah éí akʼeh deesdlı̨́ı̨́ʼ! Jéfthah bighandi nádzáago, háíshąʼ áłtsé bighandę́ę́ʼ bichʼįʼ chʼíníyá?—

Aooʼ, hatsiʼ áłtsé hachʼįʼ chʼíníyá! Tʼáá éí tʼéiyá hweʼawééʼ. Áko kʼad Jéfthah éí hatsiʼ níbaal biiʼ hodílzingóó biʼjidoołnihígíí biniinaa baa yínííł jizlı̨́ı̨́ʼ. Ndi béénílniih shą́ą́ʼ Jéfthah tʼáá íídą́ą́ʼ éí Jiihóvah yichʼįʼ yee ádee haadzííʼ. Tʼáá akǫ́ǫ́ hatsiʼ áháłní, ‘Shizhéʼé, tʼáá íídą́ą́ʼ Jiihóvah bichʼįʼ bee ádee háínídzíʼígíí tʼáá ákótʼéego beʼdíílííł.’

Jéfthah yee ádee haadzíʼígíí shı̨́ı̨́ nanitłʼa ndi hatsiʼ yeʼiilaa

Jéfthah bitsiʼ ałdóʼ yínííł silı̨́ı̨́ʼ. Jó éí níbaal biiʼ hodílzingi, hahastiin dóó haʼáłchíní doo hwee hodooleeł da. Ndi hazhéʼé yee ádee haadzíʼígíí hwił nilı̨́, dóó Jiihóvah bił hózhǫ́ǫgo ájósin doo jinízin. Éí hazhéʼé yee ádee haadzíʼígíí, azhdooyeh dóó haʼáłchíní hwee hodooleełígíí biláahgo hwił nilı̨́. Áko haghan bitsʼą́ąjįʼ dashdiiyá. Áádóó níbaal biiʼ hodílzindi nijilnishgo ahoolzhiizh.

Díí atʼééd ádzaaígíí hazhéʼé dóó Jiihóvah bił hózhǫ́ǫgo ájiilaaísh nínízin?— Aooʼ, tʼáá áłah bił hojííshǫǫd! Akʼeh honíłʼı̨́įgo dóó Jiihóvah ayóíʼííníʼníigo éí Jéfthah bitsiʼgi ánítʼée doo. Áko nimá, nizhéʼé dóó Jiihóvah yéigo bił dahózhǫ́ǫgo ádíílííł.

DIYIN GOD BIZAAD BIIʼ YÍDÍÍŁTA

  • Deuteronomy 6:6, 7

  • Judges 11:30-40

  • 1 Corinthians 7:37, 38