Jáshowa éí Ízrel dineʼé yooʼishgo Kéínan dineʼé yikʼeh dadeesdlı̨́ı̨́ʼ. Jiihóvah éí ándahwiiʼaahii danilínígíí, hodineʼé atídabiʼdilʼínígíí há yisdá yidoonił biniyé óhólnííh yaah niinílá

ÍZREL dineʼé tʼahdoo Kéínan biih jinééhgóó, Jiihóvah éí Éíbraham díí kéyah nadaʼáłchíní daa bííʼ dooleeł yidííniid. Áko Jáshowa ooʼishgo, Ízrel dineʼé kéyah hó dadooleełgo baa hoolzhiizh.

God éí Kéínan dineʼé áhoʼdidooldįįłgo há nihoníʼą́. Háálá Kéínangi naʼageh baaʼihígíí bee tsiʼjookahgo bee dahojííłchxǫʼ. Áádóó ałdóʼ doo dajisteeʼgóó nidaʼjiłtseedgo baa jookah. Éí bąą Ízrel dineʼé éí Kéínan biiʼ kin naaznilígíí ałtso ádaazhdoołdįįł.

Áłtsé éí tʼahdoo Kéínan biih jikááhgóó, Jáshowa éí naalchiʼí nidiltʼéego Jérikogóó ayííłʼaʼ. Ákweʼé asdzání léiʼ Réíhab wolyéego bighangi dzizkéé ńtʼééʼ. Azhą́ shı̨́ı̨́ éí Ízrel dineʼé nilı̨́įgo hoł bééhózin ndi haghangi baa áhojilyą́ą́ ńtʼééʼ. Réíhab éí Ízrel bidiyin God joodlą́, háálá éí bidineʼé yisdá yíínilgo baa hozdiiztsʼą́ą́ʼ. Áko naalchiʼí nidiltʼéego díí bee shichʼįʼ ádee hadoohdzih hodííniid, éí shí dóó bił dashighanígíí yisdá nihidiʼdooʼnił.

Tʼahádóó Ízrel dineʼé Kéínan biih jookaigo, Jériko bikʼijįʼ dajizlı̨́ı̨́ʼ. Ákweʼé Jiihóvah Jériko binaa ahééʼítłʼinii naaʼayííłkaad. Áádóó Jáshowa bisiláo tsı̨́įłgo yah ííjéeʼgo ákwii kéédahatʼíinii, índa tʼáá ałtso biiʼ dahólóonii ádeesdįįd. Réíhab dóó bighandóóígíí tʼéiyá yisdáákai. Áádóó kéyah hóóʼ dadooleeł haʼńínę́ę, 6 nááhaijįʼ bitah naa níjooʼnéełgo ląʼígo kéyah aghadahozhdeestʼą́. Éí bikéédóó Ízrel dineʼé díí kéyah bitaa dadeestʼą́.

Jáshowa éí ląʼí nááhai diyin bá nijilʼaʼgo, áádóó diné áłah ájiilaa. Tʼáá níléédę́ę́ʼ danihizhéʼé yę́ę Jiihóvah bił hólǫ́ǫgo hoolzhiizh jiníigo bił ííshjání ájiilaa. Dóó hazhóʼó Jiihóvah bá nidaałʼaʼ níigo náyooskan. Jáshowa dóó hastóí yił nidaalʼaʼ yę́ę ádajídindóó bikʼijįʼ, Ízrel dineʼé Jiihóvah yitsʼą́ąjįʼ diyin tʼóó bedaʼalyaaígíí yichʼįʼ dahdiikai. Dóó Jiihóvah bibee hazʼáanii doo bikʼeh dahojíłʼı̨́ı̨́góó 300dóó baʼaan nááhai. Ákwii nahalzhiishgo éí Ízrel dineʼé bidaʼanaʼí, Filístiya dineʼé ałdóʼ, atídabiłʼı̨́įgo Jiihóvah tʼóó yaa hodiníʼą́. Ákondi Ízrel dineʼé Jiihóvah nídayoozkan, áádóó éí yisdá hodoonił biniyé 12go ándahwiiʼaahiiígíí há bikʼidahodiiniiʼ.

Éí díí Ándahwiiʼaahii danilínígíí naaltsoos Judges biiʼ baa haneʼ. Éí Áthniyel bee hahoolzhiizh, áádóó Sámson diné ayóó ábóodziilii jílı̨́ı̨́ ńtéeʼii bee nihoolzhiizh. Naaltsoos Judges bóhoneedlı̨́įgo haneʼ bikʼiniiʼnilígíí éí díí ííshjání ánáyoodlííł: Jiihóvah bikʼeh hóʼı̨́įgo éí hózhǫ́ǫ́jí honítʼiʼ, doo akʼeh hóʼı̨́ı̨́góogo éí yéego áchʼįʼ nahwiiʼná.

—Naaltsoos Joshua; Judges; Leviticus wóltaʼii 18:24 dóó 25 biiʼ baa haneʼ.