1. Náasdi ádahootʼée dooígíí haʼátʼíí bitsʼą́ą́dę́ę́ʼ baa ídahwiidiilʼááł?

NÍŁCHʼI naalkidí doodaiiʼ níłchʼi bee haneʼii biiʼdę́ę́ʼ dahaneʼ dinitsʼaʼgo kwíinínízinísh łeh, ‘Haʼátʼéégóósh nihił hodeeyá?’ Tʼáá íiyisíí bíighahí átʼéego áhoonííł dóó diné ndaʼahiiltseed, áko nihodoogáał doogo bichʼįʼ hoolzhish hwiinidzin. Díísh tʼáá aaníí? Náasdi ádahootʼée dooleełígíí, bee bééhózinii hólǫ́ǫgoósh átʼé? Aooʼ. Náasdi ádahodooníłígíí bílaʼashdlaʼii doo bił bééhózin da, Jiihóvah tʼéiyá. Bí Bizaad biiʼdę́ę́ʼ náasdi nihił áhootʼé dooígíí dóó nahasdzáán átʼé dooígi yee nihił halneʼ.​—Isaiah 46:10; James 4:14.

2, 3. Jesus bídahoołʼaahii haʼátʼíí yíndahódééłkid, áádóó haitʼéego bił nahojólneʼ?

2 Diyin Bizaad biiʼdę́ę́ʼ nihodoogááł níigo baa ííníłtaʼgo éí nahasdzáán bił nihodoogáał doo níi da, ndi éí doo yáʼádaashxóonii ndootʼihgo áhyiłní. God biNahatʼaʼ éí nahasdzáán yikʼi hooʼáał doo níigo Jesus yee naʼneeztą́ą́ʼ. (Luke 4:43) Jesus bídahoołʼaahii éí God biNahatʼaʼ hahgo hadootʼih danízin ńtʼééʼ, áko nidahódééłkid: “Baa chʼíhwííníʼánígíishąʼ hahgo ádahodoonííł, bee nihił hólneʼ, áádóó náádíídáłígíí, índa nihoolzhíshígíishąʼ haʼátʼíí bee bééhózin doo?” (Matthew 24:3) Jesus éí kweʼé yoołkáałgo áhodoonííł tʼáadoo yidííniid da, ndi kóhootʼée doo níigo yee yił hoolneʼ. Díí kʼad áhoonííł.

3 Nihodoogááł bichʼįʼ hoolzhishgo bee béédahózinii  kʼad bíhwiidiilʼááł. Áłtsé éí yáʼąąshdi anaaʼ hazlı̨́ı̨́ʼ yę́ę baa íhwiidiilʼááł, áko éí binahjįʼ haʼátʼíí biniyé nahasdzáán bikááʼ, doo yáʼáshǫ́ǫ́góó hazʼánígíí nihił bééhodoozįįł.

YÁʼĄĄSHDI ANAAʼ HAZLĮ́Į́ʼ

4, 5. (a) Yáʼąąshdi Jesus Naatʼáanii ábiʼdiilyaago, haa hóótʼįįd? (b) Séítan bidah ahoolghango, Revelation 12:12 haa hodoonííł ní?

4 Bíhooʼaah 8 góneʼ éí 1914 yę́ędą́ą́ʼ yáʼąąshdi Jesus Naatʼáanii ábiʼdiilyaago baa ídahwiilʼą́ą́ʼ. (Daniel 7:13, 14) Revelation ání: “Yáʼąąshdi anaaʼ hazlı̨́ı̨́ʼ! Máíkel [Jesus] áádóó bidiyingo nidaalʼaʼí éí naʼashǫ́ʼiitsoh [Séítan] yił daʼahigą́ą́ nítʼééʼ, áko naʼashǫ́ʼiitsoh áádóó bindaalʼaʼí hoł daʼahoogą́ąʼgo” bikʼeh hodeesdlı̨́ı̨́ʼ.  * Áádóó Séítan dóó bándaalʼaʼí nahasdzáán bikáajįʼ adabidiistłʼííd. Áko diyingo ndaalʼaʼí ayóó átʼéego bił dahóozhǫǫd! Ndi nahasdzáán bikáaʼgi shąʼ? Diyin Bizaad ání, Séítan dóó bándaalʼaʼí nahasdzáán bikáajįʼ adabidiistłʼíídóó bílaʼashdlaʼii ayóó átʼéego bichʼįʼ dahodiisnááʼ. Háálá tʼóó kónígháníjįʼ Séítan baa hodeetʼą́ągo bił bééhózingo biniinaa báháchįʼ.​—Revelation 12:7, 9, 12.

5 Séítan éí nahasdzáán bikááʼ ayóó átʼéego achʼįʼ nahwiiʼnáago áyoolííł. Séítan báháchįʼ, háálá nahasdzáán bikááʼ baa joogáłígíí God hatsʼą́ą́ʼ niʼkwíidoolííł. Nihoogháahjįʼ ayííłką́ągo kóhootʼée doo níigo Jesus yaa haadzííʼ yę́ę dadíníilʼįįł.​—Endnote 24 níníłʼı̨́.

NIHOOGHÁAHJĮʼ

6, 7. Jesus éí anaaʼ dóó hodichin yee haadzííʼ yę́ę, haitʼéego bihoolyaa?

6 Anaaʼ. Jesus ání: Ałʼąą dineʼé ałkʼinéiijah doo,  áádóó nahatʼá bił nahazʼáanii índa náánáłaʼ nahatʼá bił nahazʼáanii ałkʼinéiijah doo. (Matthew 24:7) Dííshjı̨́ı̨́góó tʼóó ahayóí diné, anaaʼ dahólǫ́ǫ́góó nidabiʼditseed, níléídę́ę́ʼ éí doo ayóó ákótʼée da ńtʼééʼ. Worldwatch Institute wolyéego ání, 1914dóó wóshdę́ę́ʼ, anaaʼ dahólǫ́ǫ́góó 100,000,000dóó baʼaan diné ndabiʼdiztseed. Níléídę́ę́ʼ 1,900 nááhaijįʼ diné doo ląʼí naaztseed da, ákondi kʼad 100 nááhaijįʼ (1900-2000) táadi ánánéelą́ąʼdi diné naaztseed. Anaaʼ bitsʼą́ą́dóó ayóó átʼéego diné bikʼéé bichʼįʼ nidahwiiʼná!

7 Dahodichin. Jesus ání: “Łahgóó dahodichin doo.” (Matthew 24:7) Azhą́ shı̨́ı̨́ chʼiyáán tʼóó ahayóí dahólǫ́ǫ ndi, ląʼí diné chʼiyáán biʼoh neelʼą́. Diné éí chʼiyáán nahidoonihgi yiʼoh daneelʼą́ dóó kéyah bikááʼ kʼididoolyéełgi ádaadin. Ląʼí diné, tʼááłaʼí béeso tʼáá bichʼįʼígo ádeiłʼı̨́įgo yikiin dahiiná. World Health Organization wolyéhígíí ání, tʼáá nináháhááh bikʼeh áłchíní tʼóó  ahayóí daniné, íiyisíí biniinaaígíí éí bitah yáʼádahootʼéeh dooleeł yę́ę, chʼiyáán yáʼádaatʼéehii bá ádaadin.

8, 9. Jesus éí niʼ nídahidiʼnááh dóó naałniih yee haadzííʼ, haitʼéego bohoolnííł?

8 Niʼ nídahidiʼnááh. Jesus ání: “ayóó átʼéego niʼ nídahidiʼnáah doo.” (Luke 21:11) Díí tʼáá ninááhai bikʼeh naólní. 1900 yihahdóó wóshdę́ę́ʼ, niʼ nídahidiʼnáahgo bitsʼą́ą́dóó 2,000,000dóó baʼaan diné noonééł. Azhą́ shı̨́ı̨́ niʼ nídahidiʼnáahii bee naʼałkahii ádaalyaa ndi, tʼahdii tʼóó ahayóí diné niʼ nídahidiʼnáahii bitsʼą́ą́dóó noonééł.

9 Nidahałniih. Jesus éí nidahałniih doo níigo yee haadzííʼ. Naałniih nidaʼałtseedii éí tsı̨́įłgo kʼeeʼąą doolzhishgo tʼóó ahayóí diné neidoołtsił. (Luke 21:11) Azeeʼ ííłʼíní éí ląʼí naałniih ałʼąą ádaatʼéii bichʼįʼ azeeʼ ąąh ádeiłʼı̨́į ndi, naałniih tʼahdii dahólǫ́. Díí bichʼįʼ azeeʼ bá ádaadin. Tʼáá nináháhááh bikʼeh diné míiltsoh biláahdi, ndaałniih tuberculosis,  malaria, dóó cholera nidaʼbiłtseedgo baa dahaneʼ. Doo díí tʼéiyá ndaałniih da. 30go ndaałniih łaʼ náádahódlǫ́ǫgo azeeʼ ííłʼíní bił béédahoyoozįįh, éí díí łaʼ tʼóó náás deiyíłnííh.

NIHOOGHÁAHJĮʼ DINÉ KÓDAATʼÉE DOO

10. 2 Timothy 3:1-5 haitʼéego bohoolyaa?

10 2 Timothy 3:1-5 ání: “Nihoogháahjįʼ yoołkáałgo yéego achʼįʼ nahwiiʼnáa doo.” Nihoogháahjįʼ bee níłką́ągo diné ląʼí kódaatʼée doo níigo Paul yaa chʼíhoníʼą́.

  • tʼáá bí tʼéí ádaa nitsídaakees doo

  • béeso ayóóʼádayóʼníi doo

  • bimá dóó bizhéʼé doo yikʼeh dahółʼı̨́į da doo

  • bindaʼadloʼ doo

  • doo ayóóʼádaʼóʼníi da doo

  • naʼageh yee tsiʼnaaldeeh doo

  • báádahadzidgo atídaʼałʼı̨́į doo

  • God biláahdi honeenida ayóóʼádayóʼníi doo

  • God ayóóʼádayóʼní ádahodilʼı̨́, ndi doo hakʼehgóó ádeeshníił da danízin

11. Psalm 92:7 éí diné doo ákwii ádaaníiłii, haa bidiʼdoolnííł ní?

 11 Diné bił kééhonítʼínígíísh kódaatʼé? Nahasdzáán bikááʼ diné kódaatʼéhígíí kʼeeʼąą deeshzhiizh. Ákótʼée ndi God éí díí hashtʼeidoolííł. God kóní: “Diné doo ákwii ádaaníiłii kʼeeʼąą dilzhishgo, éí hoolʼáágóó ábidiʼdooldįįłgo átʼé.”​—Psalm 92:7.

NIHOOGHÁAHJĮʼ NIZHÓNÍGO HANEʼ

12, 13. Jiihóvah haʼátʼíí yee nanihinitin?

12 Diyin Bizaad ání, nihoogháahjįʼ ayííłką́ągo ayóó átʼéego achʼįʼ nahwiiʼnáago hazʼą́ą doo. Ákondi Diyin Bizaad ání, yáʼátʼéehgo hazʼą́ą doo.

God biNahatʼaʼ éí “nahasdzáán nidahoneesʼą́ą́góó, ałʼąą dineʼé tʼáá ałtso . . . bee hoł dahodoonih.”​—Matthew 24:14

13 Diyin Bizaad bikʼidiʼdootı̨́ı̨́ł. Daniel éí nihodoogááłígíí yaa hoolneʼ. Éí kóní: “Ił ééhózin kʼeeʼąą yilzhish dooleeł.” (Daniel 12:4) 1914dóó wóshdę́ę́ʼ, God éí bidineʼé yíká eelwodgo Diyin Bizaad hazhóʼó yikʼidaʼdiitą́. Éí bízhiʼ ayóó átʼéegi, nahasdzáán yiniyé áyiilaagi, nihikʼé nináʼílyáagi, deetsaahgo háájí yiidleehgi, dóó nááʼdiijeehgi hazhóʼó bikʼidaʼdiitą́. God biNahatʼaʼ tʼéiyá tʼáá ałtsoní nihá hashtʼeidoolííł. Ił hózhǫ́ índa God bił hózhǫ́ǫgo ííníilzin dooígi ałdóʼ baa íhwiidiilʼááł. Áko God bidineʼé yíhoołʼą́ą́ʼígíí haitʼéego chodayoołʼı̨́? Diyin Bizaad yee nihił hodoolnih.​—Endnotes 21 dóó 25 níníłʼı̨́.

14. God biNahatʼaʼ baa haneʼ, háadi índa háí bił dahaneʼ?

14 Nahasdzáán bikááʼ naʼnitin. Nihoogháahjįʼ ahoolzhiizhígíí Jesus yee nitʼı̨́įgo kóní, “Yáʼąąshii bee bóhólníihgo bił hazʼáanii [God biNahatʼaʼ] baa haneʼ yáʼátʼéehii nahasdzáán nidahoneesʼą́ą́góó, ałʼąą dineʼé tʼáá ałtso . . . bee hoł dahodoonih.” (Matthew 24:3, 14) Díí éí 230dóó baʼaan dakéyahgóó índa  700dóó baʼaan saad ałʼąą ádaatʼéego God biNahatʼaʼ baa nahaneʼ. Jiihóvah Yá Dahalneʼé éí nahasdzáán bikááʼ “ałʼąą dineʼé bił dah nidahazʼą́ą́dę́ę́ʼ tʼáá ałtso,” God biNahatʼaʼ índa haitʼéego bílaʼashdlaʼii bíká adoolwołgi diné yee ndeinitin. (Revelation 7:9) Doo éí bikʼé bichʼįʼ ndaʼiilyée da. Jesus ádííniid yę́ęgi átʼéego, dabijoodla índa atídabiʼdilʼı̨́į doo. Ndi díí nahaneʼ doo łaʼda niʼíidoolíił da.​—Luke 21:17.

ÁKO HAA DÍÍNÍÍŁ?

15. (a) Haʼátʼíí biniyé nihoogháahjįʼ hoolzhishgo yiinídlą́? (b) Jiihóvah yikʼeh ádaatʼéii índa doo yikʼeh ádaatʼéii haa dadoolnííł?

15 Nihoogháahjįʼísh hoolzhish nínízin? Diyin Bizaad tʼóó ahayóígóó yaa chʼíhwiizʼánę́ę bohoolnííł. Díí dahwiilneʼígíí Jiihóvah niʼkwíidoolíiłgo bichʼįʼ hoolzhish, áádóó nihodoogááł. (Matthew 24:14) Nihodoogááł, haʼátʼíí óolyé? Éí Armagédan bee, God éí doo yáʼádaashóonii ałtso nahjįʼ kwíidoolííł. Jiihóvah éí Jesus dóó diyingo ndaalʼaʼí choidooʼįįłgo doo akʼeh honishʼı̨́į da doo danízinígíí ádeidoołdįįł. (2 Thessalonians 1:6-9) Áko Séítan dóó bá ndaalʼaʼí yił, diné doo yóóʼiiniiʼaah da doo. God bikʼeh áníshtʼée doo danízinígíí dóó biNahatʼaʼ bił yáʼátʼéehii, éí God yee ádee hahaasdzííʼ yę́ę binááł bohodoolnííł.​—Revelation 20:1-3; 21:3-5.

16. Nihoogháahjįʼ hoolzhish, áko haa díínííł?

16 Séítan hooʼááłígíí ndootʼihgo bichʼįʼ hoolzhish. ‘Ákoshąʼ shí éí haa deeshnííł?’ Diyin Bizaad yéigo bíhoołʼaah. (John 17:3) Jiihóvah Yá Dahalneʼé tʼáá damóo náʼoodleeł áłah nídaadleeh, ákwii Diyin Bizaad bikʼidiʼdootı̨́įłgi bíhooʼaah. Ákwii áłah náʼádleehgi nánídááh. (Hebrews 10:24, 25 yíníłtaʼ.) Áádóó ákweʼé  bíhwiiniłʼą́ą́ʼígíí bikʼeh ááníił doo. Ákónítʼı̨́įgo éí Jiihóvah bił kʼé ahidiʼníigi bidziilgo ná ánáyoodlíił doo.​—James 4:8.

17. Haʼátʼíí biniinaa nihoníyáago diné yikʼeh tsídadidoolyis?

17 Paul ání, “tłʼéeʼgo aniʼįįhii yígháhígi átʼéego,” éí tʼáadoo naólníní yę́ę góneʼ doo yáʼádaashóonii ádooldįįł níigo ání. (1 Thessalonians 5:2) Jesus éí kóhootʼée doo níigo yaa chʼíhoníʼą́, nihoogháahjįʼ ahoolzhiizhgo ląʼí shíísh shikʼehdii danízin doo. Jesus ání: Níyáago, “Nóah bíyoołkááł yę́ędą́ą́ʼ áhootʼéhígi áhootʼée doo. Háálá éí yoołkááł yę́ędą́ą́ʼ tʼah doo tó yiląąhgóó Nóah tsinaaʼeeł yiih yíyáajįʼ diné daʼayą́ áádóó daʼadlą́ áádóó nidaʼayeh índa ahaa dahaʼnííł nítʼééʼ, áko tó dooląąłígíí doo bił béédahózingóó tó yíląąd áádóó ábiʼniiłdįįdgo índa bił béédahoozin,” áko tsʼídá ákóhootʼée doo.​—Matthew 24:37-39.

18. Jesus éí haʼátʼíí yéigo baa nitsídeiikees doo nihiłní?

18 Jesus ánínę́ęgi átʼéego, diné daʼayą́, daʼadlą́ índa iiná bidaʼdiiłʼáh, díí tʼáadoo nihiiʼ daahéłí, nihiłní. Tʼáadoo hooyání nihodoogááł dóó nahasdzáán bikááʼ tʼáá ádzíłtso kéédahojitʼínígíí díí hakʼi hwiidooleeł. “Éí bąą tʼáá áłahjįʼ hadaʼísídółʼı̨́ı̨́ʼ índa sodadołzin, éí danihidziilgo ádanihiʼdiʼdoolníiłgo díí ádahodooníłígíí tʼáá ałtso bitsʼąą dadoohdzih,” áko Jesus bidááhdę́ę́ʼ deidoohsįįł. (Luke 21:34-36) Haʼátʼíí biniinaa díí Jesus ánínígíí yéigo baa nitsídeiikees doo? Jó, nihodoogááłígíí bichʼįʼ hoolzhish. Jiihóvah dóó Jesus yikʼeh hołʼínígíí tʼéiyá yisdádoogááł áádóó ániidígo nááhodeesdzáago iiná doo ninítʼiʼii bee hólǫ́ǫgo atah kééhojitʼı̨́į doo.​—John 3:16; 2 Peter 3:13.

^ par. 4 Jesus Christ éí Máíkel ałdóʼ bee biʼdójí. Endnote 23 níníłʼı̨́.