BÍHWIIDOOʼÁŁÍGÍÍ 10
Jesus Tʼáá Áłahájįʼ Akʼeh Hółʼı̨́ı̨́ Ńtʼééʼ
Nimá dóó nizhéʼé bikʼeh honíłʼínígi, łahdaásh nanitłʼa łeh?— Łahda éí nanitłʼa łeh. Jesus éí Jiihóvah dóó bimá dóó bizhéʼé yikʼeh hóółʼįįdígíísh nił bééhózin?— Nimá dóó nizhéʼé bikʼeh honíłʼı̨́įgo nanitłʼa shı̨́ı̨́ ndi, Jesus áátʼįįdígíí binahjįʼ níká análwoʼ doo. Díí éí baa íhwidiilʼááł.
Jesus tʼahdoo nahasdzáán bikáajįʼ yíghááh yę́ędą́ą́ʼ, Bizhéʼé Jiihóvah yáʼąąshdi yił hólǫ́ǫ́ ńtʼééʼ. Jesus éí nahasdzáán bikáaʼgi bimá dóó bizhéʼé ałdóʼ hólǫ́ǫ́ ńtʼééʼ. Éí Jóseph dóó Mary wolyé. Haash yitʼéego Jóseph dóó Mary, Jesus bimá dóó bizhéʼé silı̨́ı̨́ʼ nínízin?—
Jiihóvah yáʼąąshdę́ę́ʼ Jesus bibee iiná Mary hodoołchííł biniyé yiih hóółtı̨́. Éí nahasdzáán bikááʼ jiináa doo biniyé. Díí tsʼídá God tʼéiyá ákótʼéego áʼdoolííł! Awééʼ bimá yiiʼ noosééłígi átʼéego Jesus éí Mary yiiʼ dínéesą́. Náhástʼéí nídeezidgo Jesus biʼdizhchı̨́. Kótʼéego nahasdzáán bikáaʼgi Mary dóó bahastiin Jóseph yił, Jesus bimá dóó bizhéʼé jizlı̨́ı̨́ʼ.
Jesus índa naaki tsʼáadah binááhaigo, bił dabighanígíí Jerúsalemgóó Atisʼadeesdzá wolyéhígíí biniyé ahínáʼiildahgóó jíkai. Díí Atisʼadeesdzáhígíí, éí Ízrel dineʼé Ííjipdę́ę́ʼ yisdá biʼdooʼnilgo chʼéébiʼdeetʼeezh yę́ę bééhániih biniyé ánáʼálʼįįh ńtʼééʼ. Ákweʼé ahíʼiildeeʼgo Jesus éí hazhéʼé Jiihóvah ayóíʼájóʼnínígi ííshjání ájiilaa. Áko nátʼą́ą́ʼ haghangóó níjookahgo, Jóseph dóó Mary, Jesus chʼééh bíká nazhneeztą́ą́ʼ. Háadish naagháá lá nínízin?—
Haʼátʼíísh biniyé Jesus kin biiʼ sohodizin góneʼ sidá?
Jóseph dóó Mary tsı̨́įłgo nátʼą́ą́ʼ Jerúsalemgóó Jesus bíká anázhníítą́ą́ʼ. Chʼééh hazhnitáago tʼáá íiyisíí yéigo baa hániʼ. Ńtʼééʼ tááʼ yiską́ągo kin biiʼ sohodizin bił hazʼą́ą́ góneʼ bikʼí jiníʼáázh! Haʼátʼíí biniyé Jesus kin biiʼ sohodizin góneʼ sidá nínízin?— Jó, ákweʼé Hazhéʼé Jiihóvah baa íhwiizhdoołʼááł biniyé. Jiihóvah éí ayóíʼájóʼní, dóó bił hózhǫ́ǫgo íínísin doogi bíhwiizhdoołʼááł jinízin. Hastiin jizlı̨́įʼjįʼ, Jesus tʼáá áłahájįʼ Jiihóvah yikʼeh hółʼı̨́ı̨́ ńtʼééʼ. Azhą́ shı̨́ı̨́ há nanitłʼa ndi Jesus akʼeh hojííłʼįįd, áko éí bikʼee tiʼhojoozniiʼ. Jesus bimá dóó bizhéʼésh ałdóʼ yikʼeh hóółʼįįd?— Aooʼ, Diyin God Bizaad éí akʼeh hojííłʼįįd ní.
Jesus áátʼįįdígíí haʼátʼíísh bitsʼą́ą́dóó bíhwiiniłʼą́ą́ʼ?— Azhą́ shı̨́ı̨́ nanitłʼa ndi nimá dóó nizhéʼé éí tʼáá íiyisíí bikʼeh honíłʼı̨́į doo. Niísh éí ákódíínííł?—
