Jiihóvah Yá Dahalneʼé biKingdom Hall naaznilgóó God bízhiʼ dílzinígíí bee biʼdójí. Biniinaa éí hashtʼe dadíníilzin, nizhónígo siʼą́ dóó nidaʼiichxǫǫhgóó hashtʼéé daalneʼígi atah áká anéiilwoʼ. Díí tʼáá ákónéehee nihaa yílyá dóó binahjįʼ niheʼoodląʼ dadíníilzin. Tʼáá ájíłtso daʼjítah doogo átʼé.

Áłah náʼádleeh bikéédóó anánílwoʼgo łaʼ hashtʼéé hoołʼįįh. Áłah náʼádleeh bikéédóó, Kingdom Hallgi yah anájahígíí bił dahózhǫ́ǫgo áłchʼídígo hashtʼéé dahoołʼįįh. Tʼááłáhádi damóo náʼádleeh bikʼeh, hazhóʼó hashtʼéé halʼįįh. Hashtʼe dadoolníłígíí naaltsoos bikááʼ nídaháasdzohgo éí hastóí oodlání yá naazíinii doodaiiʼ naalʼaʼí ádabiʼdilyaaígíí bikʼehgo hashtʼéé halʼįįh. Hashtʼe hadoolnííł hwiindzingo, adeishwoł nízinígíí nahodooshoh, neʼgóó tááhodoogis, doodaiiʼ tsʼiilzéí ayiiłtʼoodí yee náʼdiyoolah, łeezh tʼááʼałtsoní bąąh yidootʼoł, bikááʼdahʼasdáhí hashtʼeʼ nizhdoonił. Áádóó yah ańdaʼaldah góneʼ táláwosh bee hozhdoochʼish, tsésǫʼ dóó biiʼadéestʼı̨́ı̨́ʼ bizhʼdoołjoł, tsʼiilzéí chʼíhizhdoojih, chʼéʼédą́ą́ʼdóó hozhdidooshǫǫł. Tʼáá nináháhááh bikʼeh, łáʼ ajı̨́ bá náhootʼaahgo hazhóʼó tʼááʼátʼé hashtʼéé hoolʼįįh. Nihaʼáłchíní bił hashtʼe dahwiilʼı̨́įgo éí niheʼoodląʼ binahjįʼ áłah nídeidleehgi bił danilı̨́į doo.​—Ecclesiastes 5:1.

Haʼátʼííshı̨́ı̨́ hashtʼéé dadoolníiłgi anánílwoʼ. Tʼáá nináháhááh bikʼeh Kingdom Hall wóneʼdóó tłʼóoʼjįʼ hazhóʼó nánílʼįįh. Áko díí néélʼı̨́ʼígíí binahjįʼ nidaʼiichxǫǫhgóó tʼáá ahą́ą́h hashtʼéé daalneʼ, éí tʼáadoo biniyéhígóó ąą hadaajil bitsʼąą áhátʼı̨́ biniyé. (2 Chronicles 24:13; 34:10) Kingdom Hall nizhónígo hashtʼe hólzingi dóó baa áháyą́ągo éí ákweʼé hazhóʼó God dadíníilzin. Atah anéiilwoʼgo éí Jiihóvah ayóíʼííníiʼní dóó niheʼoodląʼ binahjįʼ áłah nídeidleehgi nihił nilı̨́įgo bee bééhózin. (Psalm 122:1) Áko díí binahjįʼ ákweʼé diné kéédahatʼínígíí ałdóʼ bił yáʼádaatʼééhgo áyiiłʼįįh.​—2 Corinthians 6:3.

• Niheʼoodląʼ binahjįʼ áłah nídeidleehgi haʼátʼíísh biniyé hashtʼe halʼínígi tʼáadoo baa nídayiiʼnahá doo?

• Haʼátʼíísh bikʼeh éʼélʼı̨́įgo Kingdom Hallgi hashtʼe hólzin?