Aa aʼááh jinízin éí “náánáłaʼ bichʼįʼ nahwiiʼnáago baa ákozhnízingo hó ałdóʼ bee hachʼįʼ hodiiʼná. Éí íiyisíí diné átʼéegi shił bééhodoozįįł jinízin łeh.” Mental-health expert Dr. Rick Hanson ání “aa aʼááh niidzinígíí tʼáá bił nihiʼ dizhchı̨́.”

BAA NITSÍNÍKEES: Haʼátʼíí biniyé aa aʼááh niidzin? Diyin Bizaad ání, diné éí God tʼáá bináłtʼéego áyiilaa. (Genesis 1:26) God nitsékeesígíí beʼiilʼı̨́įgo náánáłahjįʼ bíká adiilwoł. Ajoobaʼ náánáłahjįʼ bee bíká iilyeedgo éí Jiihóvah bee ajoobaʼígíí ííshjání ííníilzin.—Proverbs 14:31.

God éí nihaa aʼááh nízin índa nihichʼįʼ nahwiiʼnánígíí doo bił yáʼátʼéeh da. Ízrel dineʼé éí Ííjipdi naalteʼé dajílı̨́įgo hachʼįʼ nidahwiisʼnááʼ áádóó 40 nááhai honoojítah góneʼé chʼíjíkai, Diyin Bizaad ání: “Tʼáá ałtso yikʼee tiʼdahoozniiʼígíí bikʼee tiʼhodzoozniiʼ.” (Isaiah 63:9) God éí doo tʼóó bichʼįʼ nidahwiiʼnánígíí yaa ákonízin da. Tʼáá íiyisíí bichʼįʼ nidahwiiʼnánígíí yooʼı̨́. Áko ání, “Yikʼee tiʼdahooníhígíí shił bééhózin.” (Exodus 3:7) Áádóó God ání, ‘Tʼáá háiida nideelchidígíí éí shinázhiin bizhdeelchid nahalin.’ (Zechariah 2:8) Háiida nihichʼįʼ nidahwiiʼnáago tʼáá nihígi átʼéego bijéí neezgai.

Diyin Bizaad tʼáá íiyisíí nihíká adoolwoł azhą́ shı̨́ı̨́ bíighahí íítʼįįd ndi, áádóó God doo shika adoolwoł da niidzin ndi, “God éí nihijéí biláahdi ayóó átʼéii nilı̨́įgo nihił béédahodoozįįł, háálá tʼáá ałtsoní bił bééhózin.” (1 John 3:​19, 20) Tʼáá nihí ádééhoniilzinígíí biláahdi God éí ayóó nihee hósin. Baa nitsíikeesígíí bił bééhózin. Tʼáá íiyisíí nihaa aʼááh nízin.

 Diyin Bizaad bee hasihii

• “Bóhólníihii [Jiihóvah] bichʼįʼ ádidííniił áádóó nichʼįʼ hadoodzih; néinikąąhgo nichʼįʼ hadoodzihgo ándidooniił, Kǫ́ǫ́ honishłǫ́.”—ISAIAH 58:9.

• “Háálá nihá baa nitsískeesii éí shił bééhózin; kʼadę́ę bíighah daʼohłeehgo bee nihił chodahooʼı̨́į dooleeł biniyé doo yáʼátʼéehii doo nihá baa nitsískees da, nidi bee achʼįʼ hózhóonii nihá baa nitsískees, ní Bóhólníihii [Jiihóvah]. Áko índa nídashiidoohkąął, áádóó shichʼįʼ sodadidoołzįįłgo nihidideestsʼı̨́ı̨́ł.”—JEREMIAH 29:​11, 12.

• “Shinákʼeeshtoʼ nitózis biiʼ hashtʼeʼnihízííd. Éí ninaaltsoos biyiʼ ádaalyaa.”—PSALM 56:8.

Nihił béédahózingo God nihaa joobaʼgo nihichʼįʼ nahwiiʼnáago nihíká análwoʼísh? Maria ákódzaa baa nitsíníkees:

“Iiná nantłʼago baa ákoniizı̨́ı̨́ʼ, shiyáázh 18 binááhaigo tsʼídá yéigo cancer bee bichʼįʼ nahwiisʼnááʼ naaki nááhai kótʼéego bichʼįʼ nahwiiʼná ádin silı̨́ı̨́ʼ. Tʼáadoo shiyáázh yíká eelwodgo biniinaa Jiihóvah bichʼįʼ sháháchįʼ!

“Hastą́ą́ nááhaigo, áłah náʼádleehdi shikʼis łaʼ shíistsʼą́ą́ʼ tʼáá ałtso shidiiłʼaahii bee bił hwiishneʼ Jiihóvah doo ayóóʼáshóʼníi da bidishní. Diyin Bizaad biyiʼdóó łaʼ yee shichʼįʼ haadzííʼ tʼáá íiyisíí shidiisnááʼ. Éí 1 John 3:​19, 20 ánínígíí: ‘God éí nihijéí biláahdi ayóó átʼéii nilı̨́įgo nihił béédahodoozįįł, háálá tʼáá ałtsoní bił bééhózin.’ Bee nihichʼįʼ anáhóótʼiʼígíí Jiihóvah tʼáá íídą́ą́ʼ bił bééhózin.

“Tʼáá íiyisíí tséchįʼ tʼah ndi shiiʼ hadeezbin! Psalm 94:19 yííłtaʼ, éí ání: ‘Shijéí biʼdiiłʼáhígíí ląʼí yileehgo nitsʼą́ą́dóó bee hadaʼahóníinii . . . tʼáá íiyisí yił náhooshǫǫł.’ Díí saad éí shá ályaa niizı̨́ı̨́ʼ! Jiihóvah bichʼįʼ yáshtiʼ bee shichʼįʼ anáhóótʼiʼígíí yaa ákonízin.”

Dooládóʼ baa ahééh hasin da God nihaa ákonízin dóó nanihiiłná! Ndi haʼátʼíí biniinaa achʼįʼ nahwiiʼná tʼóó ahayóí? Godísh nihichʼįʼ nahwiiłná? Achʼįʼ nahwiiʼná Godísh niidoołtʼih? Díí ndaʼídíkidígíí baa nídadíitʼįįł.