Jiihóvah biNahatʼaʼ nihookáaʼgi hootʼááł bibaʼígíí éí Psalm 72:7gi áníigo “tʼáá ałtsogóó hashtʼehodítʼée doo.” Hahgo éí God biNahatʼaʼ nahasdzáán yikʼi hooʼáał doo? Haitʼéego aʼhodoonííł? God biNahatʼaʼ haitʼéego nihíká adoolwoł?

God biNahatʼaʼ kʼadę́ę baa hoolzhiizh bee bééhózinígíí éí Diyin Bizaad tʼáá bítséedi yaa hólneʼ. Éí nahasdzáán tʼáá siʼą́ą́ ńtʼééʼ anaaʼ, dahodichin, naałniih, niʼ nídahidiʼnááh dóó bąąhági átʼéii kʼeeʼąą deeshzhiizh doo.—Matthew 24:​3, 7, 12; Luke 21:11; Revelation 6:​2-8.

Diyin Bizaad łaʼ yaa chʼínáhoníʼą́, “Nihoogháahjįʼ yoołkáałgo yéego achʼįʼ nahwiiʼnáa doo. Háálá diné ayóóʼádadóʼníi doo, béeso yíchą́deídéelniʼ doo, . . . bishchíinii doo yikʼeh dahółʼı̨́į da doo, doo ahééh danízin da doo, doo bił dahodiyin da doo, doo ayóóʼádaʼóʼníi da doo, doo achʼįʼ bá nídahójǫǫh ádaatʼée da doo, tʼáá ádzaagóó aa nidahalneʼ doo, naʼageh yee tsiʼnaaldeeh doo, báádahadzid doo, yáʼádaatʼéehii deijoołáa doo, . . . ayóó áníshtʼé danízin doo, Diyin God ayóóʼádayóʼníi doo yę́ęgi honeenida yíchą́dayídéelniʼ doo.” (2 Timothy 3:​1-4) Ła díí ádaatʼéego baa ákodaniizı̨́ı̨́ʼ, dóó dííshjı̨́įdi tʼóó ahayóí ákódaatʼé.

1914 yihahdóó wóshdę́ę́ʼ díí bohoolnííł. Bílaʼashdlaʼii ałkʼidą́ą́ʼ ádahóótʼįįdgo yaa dahaneʼígíí, dóó akʼedaʼałchíigo dahalneʼii, dóó nahatʼaʼ siláagi naatʼáanii danilínígíí, éí łaʼ áhoodzaa daaní. Peter Munch éí Danish dineʼé nilı̨́įgo éí ałkʼidą́ą́ʼ ádahóótʼįįdígíí yaa halneʼgo yikʼeʼashchı̨́. Éí ání: “1914go anaaʼ hazlı̨́įʼgo bílaʼashdlaʼii łah átʼéego bił hooʼaʼ. Náás yiikah yę́ę, bikʼeʼíyéeʼii, akʼeʼdiniih, doo hasihgo hazʼą́ éí doo yáʼátʼéehii bikʼi dahóleʼ.”

Díí éí bohoolníłígíí éí yéego deeyolgo bikééʼdóó hodéesyélígíí nahalin. God biNahatʼaʼ nahasdzáán yikʼi hooʼáałgo bichʼįʼ hoolzhish. Éí Jesus yee nihił halneʼgo ání: “Áádóó yáʼąąshii bee bóhólníihgo bił hazʼáanii baa Haneʼ Yáʼátʼéehii nahasdzáán nidahoneesʼą́ą́góó, ałʼąą dineʼé tʼáá ałtso bee hwéédahodoozįįł biniyé bee hoł dahodoonih, áko áadi índa nihodoogááł.”—Matthew 24:14.

Jiihóvah Yá dahalneʼé éí yáʼátʼéehgo haneʼígíí íiyisíí yaa dahalneʼ. Éí binaaltsoos, Bee Haʼídéesʼı̨́įʼii—Jiihóvah biNahatʼaʼ Yaa Halneʼ. Díí naaltsoos, éí God biNahatʼaʼ bee bílaʼashdlaʼii dóó nahasdzáán nizhóní yá iidoolíłígíí yaa nátʼı̨́.

Dı̨́ı̨́ʼ ílı̨́įgo baa ndadiitʼįįł:

1. God biNahatʼaʼ biyaagi éí bílaʼashdlaʼii binahatʼaʼ siláagi naatʼáanii danilínígíí doo nihokááʼ bídadéétʼiʼígíí doo hólǫ́ǫ da doo.

2. Nihokááʼ binahatʼaʼ naatʼáanii danilínígíí éí náásgóó dahwéeʼaah doo biniyé God biNahatʼaʼ yichʼįʼ nidadooltí.—Psalm 2:​2-9.

3. God biNahatʼaʼ éí nihokááʼ binahatʼaʼ ałtso íidoołdįįł. (Daniel 2:44; Revelation 19:​17-21) Díí anaaʼ hodooleełígíí éí Armagédan wolyé.—Revelation 16:​14, 16.

4. God biNahatʼaʼ yikʼeh dahółʼínígíí éí Armagédan bitsʼą́ą́dóó yisdádookahgo nahasdzáán hodéezyéelgi kéédahatʼı̨́į doo. Bílaʼashdlaʼii miiltsoh biláahgo dah yinéłígíí Diyin Bizaad éí “doo yóołtaʼ ánéelą́ąʼgo tʼóó ahayóí áłah nilı̨́įgo” yee yózhí.—Revelation 7:​9, 10, 13, 14.

God biNahatʼaʼ biyaadóó kééhojitʼı̨́į doogo éí bídadéétʼiʼígíí áłtsé baa íhoozhdoołʼaał. Jesus, God yichʼįʼ sodoolzingo ání, “Áko iiná doo ninítʼiʼii éí díí, ní tʼéiyá tʼáá aaníí Diyin God nílı̨́įgo néédahodoosįįł, índa Jesus Christ yiníłʼaʼígíí ałdóʼ yéédahodoosįįł.”—John 17:3.

Bílaʼashdlaʼii Jiihóvah yéédahosįįhgo ląʼígóó yee bíká adadoolwoł. Áłtsé éí Jiihóvah dayoodlánígíí bidziilgo áyiiłʼįįh dóó Jiihóvah biNahatʼaʼ tʼáá bahatʼaadí hólǫ́ǫgo éí náasdi nahasdzáán yikʼi hooʼáałgo bichʼįʼ hoolzhishígíí dayoodlą́. (Hebrews 11:1) Naaki góneʼ éí Jiihóvah dóó yił kéédahohtʼíinii ayóóʼádayóʼnínígíí éí noosééł, dóó Jiihóvah ayóóʼádayóʼnínígíí biniinaa yikʼeh dahółʼı̨́. Jesus ání, “Tʼáá diné hachʼįʼ ádaaníił leʼ danohsinígi átʼéego, nihí ałdóʼ tʼáá ákótʼéego bichʼįʼ ádaahnííł.” Díí biniinaa yił kéédahohtʼíinii ayóóʼádayóʼní.—Luke 6:31.

Azhéʼé ayóóʼóʼóʼnínígíí átʼéego, Ánihiilaii éí yáʼátʼéehii nihá yinízin. Éí Diyin Bizaad “tʼáá aaníí iináanii” yaa yáłtiʼígíí nihee hólǫ́ǫ doo nízin. (1 Timothy 6:19) Dííshjı̨́įdi éí nihee ádin. Ndi báhádzidgi dahiiná. God biNahatʼaʼ biyaadóó “tʼáá aaníí iináanii” yiiʼ kéédahatʼínígíí haitʼéego bá hoodooʼaałígíí baa nídadíítʼįįł.