Revelation 16:1-21
16 Nítʼééʼ kin biiʼ sohodizin biyiʼdę́ę́ʼ iinééʼ ayóó íitsʼaʼgo diyingo nidaalʼaʼí tsostsʼidígíí kwííłníigo disétsʼą́ą́ʼ, Nihílááh, Diyin God tʼóó báhádzidgo bibee atéʼélʼíinii tsostsʼidgo łeetsʼaaʼ biyiʼígíí nahasdzáán bikááʼgóó yadaahkaah.
2 Áko diyingo naalʼaʼí átséhígíí dah diiyáago bileetsʼaaʼ biyiʼígíí nahasdzáán bikááʼgóó yayiiką́, áko diné éí naaldlooshii naayééʼ nilíinii bibee íʼdiidlííd bee bídaʼdiidlidii áádóó tʼáá éí beʼelyaago yichʼįʼ nidahałáii łóód dííłdzidii áádóó báhádzidii baa níłniiʼ.
3 Diyingo naalʼaʼí naaki góneʼígíí bileetsʼaaʼ biyiʼígíí tónteel biyiʼjįʼ yayiiką́, áko diné daaztsáanii bidił nahalin silı̨́įʼgo tónteel biyiʼdi dahináanii ałtso daneezná.
4 Diyingo naalʼaʼí tááʼ góneʼígíí bileetsʼaaʼ biyiʼígíí tooh danílíinii áádóó tó hadaazlíinii biyiʼjįʼ yayiiką́, áko dił nídaasdlı̨́ı̨́ʼ.
5 Áádóó diyingo naalʼaʼí tó bee bóhólnííh nilíinii kóníigo disétsʼą́ą́ʼ, Diyin nílíinii, honílóonii índa hoolʼáádę́ę́ʼ honílóonii, tsʼídá tʼáá ákogi ánítʼéego díí bee ánihwiyíʼaah.
6 Éí Diyin God bidiyı̨́ı̨́ʼ índa Diyin God yá dahalneʼii yę́ę dabidił bąąh hadaazlı̨́įgo ádajileʼgo dazníłtseed, áko dił dazhdoodlı̨́ı̨́ł biniyé haa dííníʼą́. Háálá éí bíká ádajíítʼįįd!
7 Áádóó bikááʼ nááʼiiniihí biyiʼdę́ę́ʼ kóníigo disétsʼą́ą́ʼ, Bóhólníihii Diyin God Aláahgo Ayóóʼánóodziilii, tʼáá aaníígóó índa tsʼídá tʼáá ákogi átʼéego bee ánihwiyíʼaah!
8 Diyingo naalʼaʼí dı̨́ı̨́ʼ góneʼígíí bileetsʼaaʼ biyiʼígíí jı̨́honaaʼéí bikáaʼjįʼ yayiiką́, áko kǫʼ yee diné yizées doogo baa deetʼą́.
9 Áko tʼáá íiyisí honiigaígíí bee diné daachʼilgo Diyin God díí bee achʼįʼ nidahwiiłnáanii bee hóhólníihii házhiʼ dayíídzííʼ, áádóó tʼáadoo łahgo átʼéego Diyin God yichʼįʼ tsíńdadeezkéezgo yaa dahaznih da.
10 Diyingo naalʼaʼí ashdlaʼ góneʼígíí bileetsʼaaʼ biyiʼígíí naaldlooshii naayééʼ nilíinii bibikááʼdóó nahatʼáii bikáaʼjįʼ yayiiką́, áko bee bóhólníihgo bił hazʼą́ągi bił chahóółhéél. Diné tʼáá íiyisí bił dahoneezgaigo bitsooʼ deiʼaał,
11 áádóó bił dahoneezgaígíí áádóó dabilódígíí biniinaa Diyin God yáʼąąshdi hólóonii dayíídzííʼ, índa yaa nidaaskaii tʼáadoo łahgo átʼéego tsíńdadeezkéezgo Diyin God yichʼįʼ ninákai da.
12 Diyingo naalʼaʼí hastą́ą́h góneʼígíí bileetsʼaaʼ biyiʼígíí Yufréítiiz wolyéego tooh ayóó átʼé nílínígíí biyiʼjįʼ yayiiką́, áko haʼaʼaahdę́ę́ʼ aláahgo naatʼáanii danilíinii bibaʼ atiin hashtʼehodoolníłígíí biniyé tooh nílı̨́ı̨́ nítʼéʼígi náhooltsei.
13 Nítʼééʼ naʼashǫ́ʼiitsoh bizééʼdę́ę́ʼ áádóó naaldlooshii naayééʼ nilíinii bizééʼdę́ę́ʼ índa tʼóó áhodilʼı̨́įgo halneʼii bizééʼdę́ę́ʼ níłchʼi danchxǫ́ʼígíí táaʼgo chʼał nahalingo hadahazleʼgo yiiłtsą́.
14 Éidí níłchʼi bidaʼiiníziinii álílee kʼehgo bee éédahózinii ádayoolíiłii ádaatʼé. Nahasdzáán tʼáá siʼą́ą́ nítʼééʼ bikááʼgóó aláahgo naatʼáanii danilíinii éí Diyin God Aláahgo Ayóóʼábóodziilii ayóó átʼéego bikʼeh haʼdooʼáałdi ałkʼi iidoojahgo áłah ádahodoolííł biniyé yaa hakááh.
15 Jóʼakon, aniʼįįhiigi átʼéego nishááh! Doo ałhoshii áádóó biʼééʼ yaa áhályáanii éí bikʼihojidlí, áko doo tʼáá łichíʼígo naagháa da índa doo tʼóó baa yáhodoosįįł da.
16 Áko Hííbrew bizaad kʼehjí Armagédan* hoolyéegi áłah ádahoolaa.
17 Diyingo naalʼaʼí tsostsʼid góneʼígíí bileetsʼaaʼ biyiʼígíí níłchʼi bił ahiidziihígíí bitahgóó yayiiką́, áko kin biiʼ sohodizin biiʼ bikááʼdóó nahatʼáii bitsʼą́ą́dóó iinééʼ ayóó íitsʼaʼgo, Kʼad ałtso ádzaa! níigo haadzííʼ.
18 Áko atsiniltłʼish anídahataʼ nítʼééʼ, áádóó ayóó íitsʼaʼgo dahodiistsʼą́ą́ʼ, áádóó daʼdiʼní índa ayóó átʼéego niʼ nahaasnááʼ. Nahasdzáán bikáaʼgi diné hazlı̨́ı̨́ʼdóó wóshdę́ę́ʼ tʼah doo ákóhánéeh da nítʼééʼ. Ayóó átʼéego niʼ nahaasnááʼ.
19 Ayóó átʼéego kin haalʼáhígíí tááʼgóó bił ałtsʼáhóódláád, áádóó ałʼąą dineʼé bił dah nidahazʼą́ą́góó kin hadaasʼáhígíí naaʼadahaasdááz. Áko Diyin God tʼóó báhádzidgo bibee atéʼélʼíinii bee adlání bee sikánígíí Bábilan* ayóó átʼéii yidiyoołdlı̨́įłgo yénáálniiʼ.
20 Tónteel biyiʼdę́ę́ʼ kéyah hadaazʼáhígíí yóóʼadahaasnóód, índa dził naaznilii bił yóóʼadahwiiyá.
21 Yáʼąąshdę́ę́ʼ níló ayóó ádaníłtsogo neeznádiindi daatsʼí dah daʼdiidloh ádaníłdáasgo diné bikʼijįʼ nááłtą́, áko níló bee tʼóó báhádzidgo achʼįʼ nahwiiłnánígíí biniinaa diné éí Diyin God dayíídzííʼ.
Footnotes
^ Palestine éí Ízrel dineʼé bikéyah náhokǫsjígo Megído dah yiskʼid binaagóó Ízrel dineʼé tʼóó ahayóidi biʼanaʼí yił nídaʼahoogą́ą́ʼ. 2Kgs. 23:29; Zech. 12:11.
^ Rome éí Bábilan ałdóʼ hoolyé.
