Díí naʼashchʼąąʼígíísh biiʼ hastóí yííníʼı̨́?— Éí Matthew, Mark, Luke, John, Peter, James, Jude, dóó Paul ádaatʼı̨́. Díí hastóí éí Jesus tʼáá bił ałhąąh dajiináá ńtʼééʼ. Éí Jesus yaa dahalneʼgo akʼedaʼashchı̨́. Díí hastóí baa íhwidiilʼááł.

Díí hastóí táltʼéego éí daalʼaadii dajílı̨́ı̨́ ńtʼééʼ, éí Jesus yił tádookaigo ndahasneʼ. Háiidígíí táaʼgo ádaatʼı̨́ nínízin?— Matthew, John, dóó Peter. Yilʼaadii Matthew dóó John éí Jesus áhą́dígo yééhósin ńtʼééʼ. Áko tʼáá ájíłá Jesus baa hojilneʼgo naaltsoos wóltaʼígíí ájiilaa. Yilʼaadii John éí  Revelation dóó táaʼgo naaltsoos achʼįʼ álʼı̨́įgo ałdóʼ áyiilaa. Éí 1 John, 2 John, dóó 3 John naaltsoos wóltaʼígíí daolyé. Yilʼaadii Peter éí naakigo naaltsoos achʼįʼ álʼı̨́įgo áyiilaa. Éí 1 Peter dóó 2 Peter naaltsoos wóltaʼígíí wolyé. Peter naaki góneʼ naaltsoos áyiilaaígíí éí yáʼąąshdę́ę́ʼ Jiihóvah biYeʼ Jesus kóyidííniid ní: ‘Díí shiYeʼ átʼı̨́. Ayóóʼóóshʼní dóó tʼáá íiyisíí haa shił hózhǫ́.’

Naʼashchʼąąʼígíí biiʼ hastóí níníłʼı̨́, łaʼ éí díí naaltsoos wóltaʼígíí bikʼeʼjishchı̨́įgo ałdóʼ Jesus yee nanihinitin. Mark wolyéhígíí éí Jesus awáalyahgóó biʼdiiltsoodgo ákweʼé tʼáá átʼé áhóótʼįįdígíí bééhózínígo bíínááł. Nááná łaʼígíí éí Luke. Éí azeeʼ ííłʼíní nilı̨́ı̨́ ńtʼééʼ, dóó bééhózínígo Jesus daaztsą́ą́dóó bikʼijįʼ Oodlání silı̨́ı̨́ʼ.

Naʼashchʼąąʼígíí nááníníłʼı̨́. Naakigo hastóí éí Diyin God Bizaad ałdóʼ łaʼ yikʼeʼashchı̨́, éí tʼáá áłah Jesus bitsilí. Bízhiʼísh bééhonísin?— Bízhiʼ éí James dóó Jude. Éí áłtsé Jesus doo yoodlą́ą da ńtʼééʼ. Tsiʼdeeyáá lá nízingo haa nitsídeezkééz. Ndi tʼahídóó Jesus joosdląądgo tʼáá ájíłah Oodlání jizlı̨́ı̨́ʼ.

Naʼashchʼąąʼígíí biiʼ akéeʼdi baa hodoonihígíí éí Paul. Paul ałdóʼ Diyin God Bizaad łaʼ yikʼeʼashchı̨́. Tʼahdoo Oodlání yileeh yę́ędą́ą́ʼ, Saul wolyé ńtʼééʼ. Oodlání danilínígíí ayóó yijoołxá, dóó yichʼįʼ ádánáhálchįįh ńtʼééʼ. Ákondi haʼátʼíísh binahjįʼ Paul Oodlání deeshłeeł jiniizı̨́ı̨́ʼ nínízin?— Paul łah joogááł ńtʼééʼ tʼáadoo hooyání yáʼąąshdę́ę́ʼ łaʼ hadzoodzíiʼgo jidiiztsʼą́ą́ʼ. Éí Jesus átʼı̨́ı̨́ lá! Jesus éí Paul nabízhdééłkid: ‘Haʼátʼíísh biniyé díí dashoodlánígíí ayóó bichʼįʼ náháchįʼ?’ Áko díí binahjįʼ Paul łah átʼéego tsíńdeezkééz, áádóó Oodlání jizlı̨́ı̨́ʼ. Paul éí Diyin God Bizaad 14go naaltsoos wóltaʼígíí ájiilaa. Éí Romans dóó Hebrewsjįʼ.

Diyin God Bizaad tʼáá ákwíí jı̨́ yíníiltaʼ yaʼ?— Áko Diyin God Bizaad yíníiltaʼgo, éí tʼóó ahayóígóó Jesus baa íhwiilʼaah. Jesus hazhóʼó baa íhwiidííłʼááłísh nínízin?—