GE GO ena le ledimo, o ka kwa modumo o mogolo. Na o kile wa go tšhoša?— * Go ba gona, Jesu o bitša barutiwa ba gagwe ba babedi gore ke “Barwa ba Modumo.” Anke re boneng gore ke ka baka la’ng a ba bitša bjalo.

Balatedi ba ba babedi ba Jesu ke Jakobo le Johane. Ke barwarre, barwa ba Tsebedeo le mosadi wa gagwe, Salome. Go bonagala Salome e le ngwanabo mmago Jesu, Maria. Ka gona Jesu, Jakobo le Johane e ka ba e be e le bana ba mmamogolo le mmane e bile ba ka ba ba gotše e le bagwera ba paale.

Tsebedeo ke morei wa dihlapi gotee le Jakobo le Johane. Jakobo le Johane ba gare ga batho ba mathomo bao Jesu a ba kgethago gore e be balatedi ba gagwe. Ge a ba laletša, gateetee ba tlogela kgwebo ya bona ya go rea dihlapi gomme ba a mo latela. Ka morago Jesu o kgetha balatedi ba gagwe ba 12 gore e be baapostola ba gagwe. Jakobo le Johane ke ba bangwe ba bona.

Dikgwedi tše sego kae pele Jesu a bolawa, yena le baapostola ba gagwe ba sepela tikologong ya dithabeng ya Samaria. Leswiswi le thoma go swara gomme ka moka ga bona ba lapile kudu. Eupša Basamaria ba re ga ba nyake gore Jesu le baapostola ba gagwe ba robale motseng wa bona. Na o tseba lebaka?—A re bone.

Jesu le baapostola ba gagwe ke Bajuda, gomme Bajuda ba swara Basamaria gampe. Ke therešo gore Jesu ga se a ka a ba swara gampe. O ba swara ka botho, gomme Jakobo le Johane ba swanetše go dira bjalo le bona. Eupša baapostola bao ba babedi ba galefela Basamaria bao  ba sego ba ba amogela gomme ba botšiša Jesu ba re: ‘Na o nyaka gore re botše mollo gore o fologe gomme o ba bolaye?’ O nagana gore Jesu o itše’ng?— O ba botša gore ba fošitše ka go bolela dilo tše bjalo tše mpe! Jakobo le Johane ba swanetše go ithuta ka mo go oketšegilego ka kgaugelo.

Bothata bjo bongwe bjo bogolo bjoo Jakobo le Johane ba nago le bjona ke gore ba nyaka go ba ba pele, go ba ba bohlokwa kudu. Pejana ga lehu la Jesu, ba ile ba romela mmago bona go yena gore a bolele gore: “Ntšha lentšu la gore mo go barwa ba ba ka ba babedi yo mongwe a dule ka letsogong la gago la le letona gomme yo mongwe ka go la le letshadi Mmušong wa gago.” Go ba gona, ge baapostola ba bangwe ba lesome ba ekwa seo Jakobo le Johane ba se dirilego, ba a galefa. Na le wena o be o tla galefa?—

Go bonagala o be o tla galefa. Ga re rate ge ba bangwe ba nyaka go ba ba pele le go leka go itira ba bohlokwa kudu. Ka morago Jakobo le Johane ba ile ba ithuta kamoo ba bego ba fošitše le kamoo ba bego ba se botho ka gona, gomme ba a fetoga. Ba fetoga baapostola ba nago le lerato kudu le ba botho. Re ka ithuta’ng go se?—

Thuto yeo re swanetšego go ithuta yona go Jesu ke gore le rena re swanetše go bontšhana botho. Jesu o be a swara batho gabotse, go akaretša banna, basadi le bana. Na o tla dula o leka ka thata go gopola mohlala wa gagwe le go o latela?—