Na o ka Bota Keletšo ya Beibele?

‘Na ke swanetše go dumela seo motho yo a mpotšago sona?’ O ka ipotšiša potšišo yeo ge morekiši a leka go go rekišetša koloi yeo e šetšego e dirišitšwe goba ge radipolitiki a dira dikholofetšo e le gore batho ba mo kgethe. Ga o nyake go senya tšhelete goba nako ditšweletšweng le tsebišong yeo e sego bohlokwa.

KA MO go swanago, o ka ipotšiša gore: ‘Na Beibele e na le selo le ge e le sefe se bohlokwa seo nka ithutago sona? Ge e ba ke bala le go ithuta puku yeo, na nka holofela gore nako ya-ka le maiteko di tla putswa?’ Senotlelo sa go hwetša dikarabo tša dipotšišo tšeo se temaneng yeo e hwetšwago ka Beibeleng ka boyona: “Bohlale bo hlatselwa gore bo lokile ke mediro ya bjona.” (Mateo 11:19) Ee, mafelelo ao batho ba a hwetšago ge ba diriša keletšo, goba “bohlale” bja mohuta o itšego, a bontšha ge e ba keletšo e bjalo e e-na le mohola. Se se latelago ke mantšu ao a boletšwego ke batho bao ba ilego ba ipha nako e le gore ba ithute Beibele. Mantšu a bona a tla go thuša go bona ge e ba o swanetše go bala le go ithuta puku yeo ya moswana-noši.

Dipotšišo tša Mabapi le Lehu le Bophelo bja ka Morago ga Lehu

Nakong e itšego e fetilego, mmago Karen o ile a hlokofala. Go tloga bjaneng, Karen yo a dulago United States, o be a dumela gore batho ka moka bao ba lokilego ba ya legodimong ge ba e-hwa. Tumelo ye ga se ya mo homotša gakaalo. O ile a ipotšiša gore: ‘Ka ge mma ga bjale a le legodimong, o ka sebopego sefe? Ge e le gore ke tla ya legodimong, ke tla mo hwetša bjang ge ke fihla? Ge ke e-hwa, na ke tla feleletša ke le felo-tsoko?’

Karen o ile a thoma go ithuta Beibele ka kelohloko le Dihlatse tša Jehofa. O ile a ithuta gore bahu ga ba legodimong eupša go bjalo ka ge eka ba robetše boroko bjo bogolo. Mmoledi 9:5 (PK) e re: “Ga ba tsebe selo.” Lega go le bjalo, go thweng ka go bona mmagwe gape?

Mantšu a a kwagalago ao a tšwago Beibeleng a ile a mo nea khomotšo le kholofelo: “Le se ke la makatšwa ke se, gobane nako e a tla yeo ka yona bohle bao ba lego mabitleng a kgopotšo ba tlago go kwa lentšu la [Kriste] gomme ba tšwa.” (Johane 5:28, 29) Karen o ithutile gore Modimo yo a buduletšego Beibele, o tla tsoša bahu gona mo lefaseng a diriša Morwa wa gagwe. O boletše gore: “Dithuto tša Beibele tša mabapi le lehu le tsogo di tloga di kwagala.”

Ke Tsela Efe ya Borapedi e Nepagetšego?

Ge Angela, ngwanenyana wa kua Romania, a be a e-na le nywaga e 14, moruti wa kereke ya Pentecostal o ile a mo rapelela gore a hwetše moya o mokgethwa gomme a thoma go bolela ka maleme. Lega go le bjalo, batswadi ba gagwe ba ile ba nagana gore dithuto tša kereke ya Pentecostal ga di dumelelane le Beibele. Lapa le ile la kgaotša go ya kerekeng gomme la thoma go ithuta Beibele le Dihlatse tša Jehofa.

Le ge a be a nyamile mathomong, go se go ye kae Angela o ile a bona phapano magareng ga mekgwa ya bodumedi bja gagwe bja pele le dithuto tša Beibele. Ka mohlala, o ile a bala Johane 17:3 yeo e rego: “Se se bolela bophelo bjo bo sa felego, gore ba hwetše tsebo ka wena Modimo a nnoši wa therešo le ka yo o mo romilego, Jesu Kriste.” Angela o ile a lemoga gore bao ba amogelwago ke Modimo ba swanetše gore sa pele  ba ithute ka yena. O ile a botšiša gore: “Nka amogela bjang moya wa Modimo ka tsela e bjalo e kgethegilego mola ke sa tsebe selo ka yena?” Angela o re: “Ke leboga Jehofa ge a nthušitše go hwetša borapedi bja therešo ka Lentšu la gagwe le le buduletšwego.”

Keletšo Yeo e Fetošago Maphelo

Gabriel e lego monna wa kua India o re: “Ke be ke le sefela-pelwana. Ge ke be ke befetšwe, ke be ke goeletša, ke foša selo se sengwe le se sengwe gaešita le go hlasela batho. Thuto ya Beibele e nthušitše go laola kgalefo ya-ka. Ga bjale, gaešita le ge ke befetšwe, ke kgona go iša maswafo fase.”

Gabriel o be a badile ditemana tše bjalo ka Diema 16:32 yeo e rego: “Mokxotleledi ó phala moxale; mo-hula-motse ó phalwa ke mo-fenya-pelo-y’axwe.” Dhiraj e lego monna yo mongwe yo a ilego a fenya go fela pelo o re: “Temana yona yeo e nthušitše go lemoga gore go palelwa ke go laola kgalefo ya-ka ke leswao la bofokodi, mola go kgona go e laola e le bohlatse bja go ba matla.”

Philip e be e le sekebekwa mo Afrika Borwa. Go lwa, go utswa le polelo e bogale e be e le karolo ya bophelo bja gagwe. O feditše nako a le kgolegong ka baka la bosenyi. Eupša go sa šetšwe tsela ya gagwe ya bophelo, Philip o be a kganyoga go tseba Modimo. Ka morago ga go thoma go ithuta Beibele le Dihlatse tša Jehofa, o ile a hlagolela kganyogo ya go hlankela Modimo gomme a dira phetho ya go fetoša bophelo bja gagwe. O ile a tlogela mekgwa ya gagwe e mebe gomme a kgaotša go gwerana le bagwera ba gagwe ba disenyi. Ke ditherešo dife tša Beibele tšeo di mo tutueleditšego go dira diphetogo tše bjalo?

Dihlatse tša Jehofa di mmontšhitše mantšu a Jesu ao a hwetšwago go Johane 6:44. A re: “Ga go motho yo a ka tlago go nna ge a sa gogwe ke Tate yo a nthomilego.” Philip o re: “Jehofa o bone selo se itšego se sebotse go nna gomme a ntliša bathong ba gagwe, borwarre bjo bjo bo kgahlišago.” Le gona, Philip o ile a naganišiša ka dipego tša Beibele tša mabapi le kgaugelo ya Jehofa go badiradibe bao ba itsholago. Philip o re: “Dipego tše di nthušitše go bona teka-tekano ya Jehofa ge a dirišana le batho ba sa phethagalago bao ba itsholago.”—2 Samuele 12:1-14; Psalme 51.

Monna yo e sa lego yo mofsa wa mo-Australia yo a bitšwago Wade o be a e-nwa bjala ka mo go feteletšego, a diriša dihlare-tagi gampe, a petšha gape a e-na le ditswalano tše dintši tše di gobogilego. Lega go le bjalo, ga se a ka a hwetša lethabo. Ka letšatši le lengwe o ile a boledišana le Dihlatse tša Jehofa gomme a dumela go swarelwa thuto e sa lefelelwego ya legae ya Beibele. Ke’ng seo Wade a ithutilego sona?

Wade o re: “Ke ile ka kgahlwa kudu ke tsela yeo Jesu a bego a swara ba bangwe ka yona. O be a swara bohle go akaretša le bana ka botho, kwelobohloko le lerato. Ge ke be ke ithuta ka mo go oketšegilego, ke moo ke bego ke nyaka go swana le yena. Beibele e nthutile kamoo nka bago monna wa kgonthe le kamoo nka kaonefatšago semelo sa-ka ka gona.” Eupša go thweng ka dilo ka moka tše mpe tšeo a bego a di  dira? Wade o tšwela pele ka gore: “Beibele e nthutile gore ge e ba ke sokologa dibeng tša-ka gomme ke fetoša boitshwaro bja-ka, Modimo o tla ntebalela. Ge e le gabotse, nka phela ka mo go sa felego paradeiseng mo lefaseng. Ke na le bokamoso mafelelong!” (Mateo 5:5) Wade o ile a fetoša bophelo bja gagwe gomme ga bjale o rapela Jehofa ka letswalo le le hlwekilego.

Mantšu a o sa tšwago go a bala ke a batho bao ba bego ba nyaka go kaonefatša maphelo a bona. Ba ile ba nyakišiša ka kelohloko ka Beibeleng go bona ge e ba dithuto tša yona di ka ba thuša go rarolla mathata a bona le go araba dipotšišo tša bona. Mafelelo a mabotse ao ba a hweditšego a ba kgodišitše gore ba ka bota tlhahlo e šomago ya Beibele. Le wena o ka e bota.

Mantšu ao a buduletšwego a kgale a balega ka gore: “Lehlôxônôlô le n’e khwetša-bohlale, mo-tlêlwa-ke-temoxô. Mošabô wa bohlale o phala wa lehumô; bo ruiša motho tše di fetišaxo thsipi e khwibidu. Bohlale bo feta le pheta ya thaxa; le talama tša xaxo tšohle xa di bo fihlêle. Bo swere bolelele bya bophelô ka ’atla sa le letona; ka sa ntsôxôšô bo swere khumô le kxodišô. ’Tsela tša byôna ké ’tsela-thatexi; ’me yohle mebila ya byôna ké ya kaxišô. Bohlale ké sehlare sa bophêlô sa ba bo swerexo; wà swara wa tiiša, O tlo ba wa mahlatse.”—Diema 3:13-18.

[Lepokisi/Seswantšho ya seswantšho go letlakala 18]

KAMOO BEIBELE E THUŠITŠEGO MOGOLEGWA KA GONA

Bill, e be e le monna yo a nyetšego e bile a thabile. Eupša pele a ka fetša ngwaga wa pele a le lenyalong, o ile a golegwa ka baka la bobe bjo a bo dirilego nywageng ya pele ga moo.

Ka morago ga ge a kgonne go lebeletšana ka katlego le bophelo bja go hloka tokologo, Bill o ile a dira phetho ya go diriša nywaga ya gagwe a le kgolegong ka tsela e holago. O re: “Ke be ke dula malaong a-ka ke bala le go ithuta Beibele.” Le gona, o be a diriša seo a bego a ithuta sona. “Ke be ke le botho e bile ke e-na le bogwera go bagolegwa bao ke bego ke dula le bona ka seleng, bao ba ilego ba bona gore ga ke nyake go dira dilo tše mpe tšeo ba bego ba di dira. Ge ba bolela ka nna ba be ba re: ‘Bill o nyaka go fetša nako ya gagwe a le mo kgolegong ka tsela ya moswana-noši, ka go tseba Modimo le Beibele. A ka se bakele motho le ge e le ofe mathata.’

“Ka baka la botumo bja-ka, bagolegwa ba bangwe ba be ba ntšhireletša dintweng tša bona le maemong a mangwe a sa kgahlišego. Baleti ba kgolego ba ile ba tla go tlo bona ge e ba nka se bake bothata. Mafelelong ba ile ba mpolelela gore ke hwetše mešomo yeo e bego e ntumelela go šoma kgole le bagolegwa ba bangwe mo e nyakilego go ba letšatši ka moka. Go diriša Beibele bophelong bja-ka e be e le tšhireletšo e kgolo kudu.”

Bill o be a e-ba gona dibokeng tša Dihlatse tša Jehofa tšeo di bego di swarelwa kgolegong gomme ka mafolofolo a botša bagolegwa ba bangwe dilo tšeo a bego a ithuta tšona. O ile a kolobetšwa e le yo mongwe wa Dihlatse tša Jehofa a dutše a le kgolegong. Ge a nagana ka phihlelo ya gagwe o re: “Ke be ke sentše mo e ka bago nywaga e 50 ya bophelo bja-ka, gomme ke be ke nyaka go dira diphetogo. Ke kgodišegile gore tsela e nnoši yeo ka yona mogolegwa a ka dirago seo ke ka go diriša dithuto tša Beibele. Le gona, tsela ya go ithuta Beibele ka mo go nepagetšego ke ka go ithuta le Dihlatse tša Jehofa. Bodumedi bja bona ke bjona feela bjo bo rutago therešo ya Beibele. Go fo ba bjalo.”

Ka ge ga bjale a lokolotšwe kgolegong, Bill o hlankela ka mafolofolo le phuthego ya Dihlatse tša Jehofa kua United States. Yena le mosadi wa gagwe ba tšwela pele go ithuta Lentšu la Modimo le go phela ka dithuto tša lona. Ba tloga ba tšeela godimo kudu mantšu a hwetšwago go Jesaya 48:17, 18 ao a rego: “Morêna Molopolodi w’axo Mokxêthwa wa Isiraele ó re: Nna Morêna Modimo wa xaxo ke Xo ruta tše di Xo holaxo; ke Xo sepediša mo tseleng ye O swanetšexo xo e swara. Mola O ka be O theeditše xe ke Xo laêla, moláô wa xaxo o ka be o swana le noka, xo loka xa xaxo xo ka be xo etša maphoto a lewatlê.”

[Seswantšho go letlakala 16]

Karen, U.S.A.

[Seswantšho go letlakala 16]

Angela, Romania

[Seswantšho go letlakala 17]

Gabriel, India

[Seswantšho go letlakala 17]

Dhiraj, India

[Seswantšho go letlakala 17]

Philip le lapa la gagwe, Afrika Borwa

[Seswantšho go letlakala 17]

Wade, Australia