Ge o be o hlamiwa ka popelong, o thomile bophelo bja gago o le sele e tee e nyenyane yeo e bitšwago zygote yeo e sa kgonego go bonwa ka leihlo la nama. Le ga go le bjalo, dikgwedi nyana ka morago ga moo o ile wa belegwa o le ngwana yo a feletšego. Sele yeo e tee e ile ya fetoga ya ba disele tša ka godimo ga tše 200 tša go fapana ka sebopego, bogolo bja tšona le mešomo yeo di e dirago.

 Nagana ka se: Sele ya zygote e dira DNA e nngwe ya go swana le ya yona gomme ya arogana ka dikarolo tše pedi. Disele tšeo tše pedi di bušeletša seo gantši le gantši. Mathomong, disele tšeo di tšweletšwago di a swana. DNA ya tšona e kgona go dira mehuta e fapafapanego ya disele.

 Beke ka morago ga gore o thome go hlamiwa, disele di arogana ka dikarolo tše pedi. Disele tše dingwe e tlo ba ngwana gomme tše dingwe ya ba placenta le dikarolo tše dingwe tšeo di thušago ngwana go gola.

 Ka beke ya boraro, disele tšeo di dirago ngwana di arogana ka dikarolo tše tharo. Disele tšeo di lego karolong ya ka ntle, di tlo šoma go dira ditšhika, bjoko, molomo, letlalo leo le lego ka ntle le disele tše dingwe. Dikarolo tša disele tša mo gare, di tlo fetoga madi, marapo, dipshio, mešifa le dilo tše dingwe. Disele tšeo di lego karolong ya ka gare di tlo fetoga ditho tša ka gare tša go swana le maswafo, setho sa go swara moroto le karolo e kgolo ya go šila dijo.

 Nakong ya ge mosadi a imile, disele tše dingwe mo ngwaneng di tloga lefelong le lengwe di eya go le lengwe, e le e tee goba e le sehlopha. Disele tše dingwe di a kgobokana gomme tša bopa selo seo se bopegilego go swana le pampiri goba di a kobega gomme tša dira dithapo tše di telele goba mešoba. E le gore dilo tše ka moka di direge, disele di swanetše gore di dirišane. Ka mohlala, ka nako e itšego disele tšeo di bopegilego go swana le pampiri di a kobega gomme tša itira mešoba e menyenyane. Se se direga ka nako e tee mafelong a fapafapanego mo ngwaneng. Ke moka, mešobana ye e ba e metelele, ya tlharologa gomme ya kopana gore e be tshepedišo ya madi mo mmeleng.

 Ge ngwana yo a phetšego gabotse a belegwa, disele tša gagwe tše dibilione di tla be di arotšwe go ya ka mehuta ya tšona mafelong a swanetšego le ka nako e swanetšego.

 O nagana eng? Na bokgoni bja disele bja go dira mešomo e fapafapanego bo no itiragalela? Goba na bo hlamilwe?