Dipeakanyo tša go bula

Kgetha leleme

Eya go menyu wa bobedi

Eya go dikagare

Dihlatse tša Jehofa

Sepedi

Na ke Swanetše go Tlogela Sekolo?

Na ke Swanetše go Tlogela Sekolo?

Seo o swanetšego go nagana ka sona ke se

Molao wa nageng ya geno o nyaka gore barutwana ba tsene sekolo go fihla ka mphato ofe? Na o šetše o fihlile mphatong woo? Ge e ba o hlokomologa keletšo ya Beibele ya gore o “ikokobeletše balaodi ba bagolo” gomme o kgaotša go ithuta pele o fihla mphatong woo, gona o tlogela sekolo.—Baroma 13:1.

Na o fihleletše dipakane tša gago tša thuto? Ke dipakane dife tšeo o nyakago thuto ya gago e go thuša go di fihlelela? Na ga o kgonthišege gore ke dife? O swanetše go di tseba! Go sego bjalo, o swana le motho yo a nametšego terene eupša a sa tsebe moo a nyakago go ya gona. Ka gona, dula fase le batswadi ba gago gomme le ahlaahleng karolo e lego ka mo tlase yeo e rego, “Dipakane tša ka tša Thuto.” Ge e ba o kgaotša go tsena sekolo pele o ka fihlelela dipakane tša thuto tšeo wena le batswadi ba gago le dirilego phetho ya gore o di fihlelele, gona o tlogela sekolo.

Go tlogela sekolo go swana le go fologa terene pele o fihla mo o yago

Go re’ng o ikwa o nyaka go tlogela sekolo? Go ka direga gore a mangwe a mabaka a gago ke gore o nyaka go thuša ba lapa la geno ka tša ditšhelete goba go tsenela modiro wa boithaopi. Mabaka a boithati e ka ba a gore o nyaka go phema ditlhahlobo goba go tšhabela mešomo ya sekolo ya gae. Tlhohlo ke go lemoga seo se tlogago se go šušumeletša go tlogela sekolo—ge e ba ke mabaka a kwagalago goba ke a boithati. Ge e ba o tlogela sekolo e le feela go tšhabela mathata, o tla lebeletšana le a magolo le go feta.

Go tlogela sekolo go swana le go fologa terene pele o fihla mo o yago. O ka ba o se wa dula ka go iketla ka tereneng yeo e bile banamedi ba se na bogwera, eupša ge o ka e fologa e sa sepela, go molaleng gore o ka se fihle moo o yago e bile o ka ikgobatša wa go šiiša. Ka mo go swanago, ge e ba o tlogela sekolo, o tla thatafalelwa kudu ke go hwetša mošomo. Le ge e ba o ka o hwetša, o ka go lefa ganyenyane go fetwa ke woo o bego o ka o hwetša ge nkabe o feditše sekolo.

Go e na le gore o tlogele sekolo, ka go se fele pelo rarolla mathata ao o lebeletšanago le ona sekolong. Ka go dira bjalo, o tla ba le kgotlelelo e bile o tla ba o itokišeleditše gakaone go lebeletšana le mathata a mohuta woo ge o šetše o šoma.

Dipakane tša ka tša Thuto

Lebaka la bohlokwa kudu la go hwetša thuto ke go go lokišeletša go hwetša mošomo woo o tlago go go thuša go iphediša le go hlokomela lapa le ge e le lefe leo o ka feleletšago o na le lona. (2 Bathesalonika 3:10, 12) Na o šetše o phethile gore o nyaka mošomo wa mohuta mang, le kamoo nako yeo o e fetšago o le sekolong e ka go thušago go itokišeletša seo? Go go thuša go bona ge e ba thuto ya gago e go lebiša tseleng e nepagetšego, araba dipotšišo tše di latelago:

  • Bokgoni bja ka ke bofe? (Ka mohlala, na o kgona go dirišana le batho gabotse? Na o thabela go šoma ka diatla, goba go dira dilo goba go di lokiša? Na o na le bokgoni bja go ahlaahla mathata le go a rarolla?)

  • Ke mešomo ya mohuta ofe yeo e tla ntumelelago go diriša bokgoni bja ka?

  • Go na le dibaka dife tša mošomo moo ke dulago gona?

  • Ke eng seo ke ithutelago sona ga bjale seo se tlago go ntokišeletša go hwetša mošomo?

  • Gona bjale ke na le dikgetho dife tša thuto tšeo di ka nthušago go fihlelela dipakane tša ka ka katlego?

Gopola gore pakane ya gago ke go fetša sekolo o hweditše thuto yeo o ka e dirišago. Ka gona, o se ke wa dira dilo ka tsela e feteletšego ke moka wa ba morutwana yo a tsenago sekolo a sa fetše—wa dula setimeleng go ya go ile o tšhabela boikarabelo bja go ba motho yo mogolo.

 

Ithute ka mo go oketšegilego

Dipotšišo tša Bafsa, Bolumo 1

Tše dingwe tša ditaba tšeo di ahlaahlwago ka pukung ye di mabapi le bjala le dihlaretagi, thobalano e gobogilego, go ratana gotee le lefereyo.