Dipeakanyo tša go bula

Kgetha leleme

Eya go menyu wa bobedi

Eya go dikagare

Dihlatse tša Jehofa

Sepedi

BAFSA BA A BOTŠIŠA

Nka Phema Bjang go Nona?

Nka Phema Bjang go Nona?

Beibele e kgothaletša gore re be bao ba “lekanetšego mekgweng.” (1 Timotheo 3:2) Seo se akaretša mekgwa ya gago ya go ja gabotse. Ka gona, go re’ng o sa leke dilo tše di latelago?

Ekwa mpa ya gago. Julia wa nywaga e 19 o re: “Ke be ke tlwaetše go ipotša gore ke tlo ja go fihla mo, eupša ga bjale ke kgaotša go ja ge mpa e tletše.

Phema dijo tšeo di se nago phepo. Peter wa nywaga e 21 o re: “Ka ge ke kgaoditše go nwa dino tše di nago le swikiri kudu, ke fokoditše boima bja mmele wa ka ka dikhilograma tše hlano ka kgwedi feela!

Fetoša mekgwa e mebe ya go ja. Erin wa nywaga e 19 o re: “Ke leka ka gohle go sola gatee feela gomme ke se boele ke nyaka tše dingwe.

Kamoo o ka Atlegago ka Gona: Eja ka nako! Ge o ka se dire bjalo, o tla swarwa ke tlala ke moka wa ja kudu.

Ge e le gabotse, batho ba bangwe bao ba rego: “Ke swanetše go phema go nona,” ga ba itebelele ka tsela e nepagetšego. Ga ba na bothata ka tsela yeo ba lego ka yona. Lega go le bjalo, go thwe’ng ge e ba o nyaka go fokotša boima bja mmele? Bona seo se thušitšego ngwanenyana yo a bitšwago Catherine.

“Ke be ke nonne kudu ge ke be ke le mahlalagading, e lego seo ke bego ke sa se rate. Ke be ke sa rate tsela yeo ke lego ka yona le go ikwa ka yona!

“Nako le nako, ke be ke leka go fokotša mmele ka go ja dijo tše itšego feela, eupša ka morago ga nako ke fo boela ke none. Ka gona ge ke be ke na le nywaga e 15, ke be ke nyaka go dira diphetogo. Ke be ke nyaka go fokotša mmele ka tsela ya maleba—e lego tsela yeo ke tlago go e kgomarela bophelo bja ka ka moka.

“Ke ile ka reka puku yeo e bolelago ka go ja gabotse le mekgwa e mebotse ya go itšhidulla gomme ke ile ka diriša seo ke bego ke se bala. Ke be ke ikemišeditše gore le ge ke be nka itima dilo tšeo ke di ratago goba ka nyamišwa ke yo mongwe, ke be nka se tlogele.

“O a tseba go ile gwa direga’ng? Ke ile ka fokotša mmele! Ka ngwaga o tee feela, ke ile ka fokotša dikhilograma tše 27. Ke na le nywaga e mebedi ke na le mmele wo ke o ratago. Ke be ke sa kgolwe gore se se ka direga!

“Ke nagana gore ga se ka thušwa feela ke go fetoša tsela yeo ke jago ka yona—eupša ke ile ka fetoša tsela ya ka ya bophelo.”—Catherine wa nywaga e 18.