Eya go dikagare

Eya go menyu wa bobedi

Dihlatse tša Jehofa

Sepedi

Go Thwe’ng ge e ba ke Lemaletše go Bogela Diswantšho tša Batho Bao ba sa Aparago?

Go Thwe’ng ge e ba ke Lemaletše go Bogela Diswantšho tša Batho Bao ba sa Aparago?

Seo o ka se dirago

Kwešiša gore diswantšho tše di kgothaletšago bootswa di kotsi kudu. Diswantšho tša batho bao ba sa aparago ke mokgwa wa go goboša selo seo Modimo a se bopetšego gore se hlomphege. Go di kwešiša ka kgopolo ye go tla go thuša gore o ‘hloye se sebe.’—Psalme 97:10.

Ela hloko ditlamorago. Diswantšho tša batho bao ba sa aparago di nyenyefatša batho bao ba tšweleditšwego go tšona. Le gona di theoša seriti sa motho yo a di bogelago. Beibele e bolela ka lebaka leo le kwagalago gore: “Yo bohlale ke yo a bonego kotsi a ikuta.”—Diema 22:3.

Itlame. Monna yo a botegago e lego Jobo o itše: “Ke dirile kholofetšo e tiilego gore le ka mohla nka se lebelele ngwanenyana ka go mo kganyoga.” (Jobo 31:1, Today’s English Version) Tše di latelago ke tše dingwe tša ‘dikholofetšo tše di tiilego’ tšeo o ka di dirago:

  • Nka se diriše Inthanete ge ke le noši.

  • Ke tla tswalela gateetee molaetša goba Wepesaete le ge e le efe yeo e nago le diswantšho tše di gobogilego.

  • Ge nka boela mokgweng wa go di bogela, ke tla boledišana le mogwera yo a godilego tsebong.

Diswantšho tša batho bao ba sa aparago di dira gore motho a di lemalele—ge o di bogela gantšintši, ke moo go bago thata kudu go tlogela go di bogela

Rapela ka taba ye. Mopsalme o ile a lopa Jehofa Modimo ka gore: “Tlogediša mahlo a ka go bona se se hlokago mohola.” (Psalme 119:37) Modimo o nyaka gore o atlege, le gona ge e ba o morapela a ka go nea matla a gore o dire se se nepagetšego!—Bafilipi 4:13

Boledišana le motho yo mongwe. Gantši go kgetha motho yo o ka mo ntšhetšago sa mafahleng ke mogato o bohlokwa wa gore o tlogele mokgwa wo.—Diema 17:17.

Gopola se: Nako e nngwe le e nngwe ge o phemile go bogela diswantšho tša batho bao ba sa aparago, o tloga o fentše. Botša Jehofa Modimo ka phenyo yeo gomme o mo leboge gore o go neile matla. Ka go phema diswantšho tša batho bao ba sa aparago, o thabiša pelo ya gagwe!—Diema 27:11.

 

Ithute ka mo go oketšegilego

BAFSA

Dipotšišo tša Bafsa, Bolumo 1

Tše dingwe tša ditaba tšeo di ahlaahlwago ka pukung ye di mabapi le bjala le dihlaretagi, thobalano e gobogilego, go ratana gotee le lefereyo.