Dipeakanyo tša go bula

Kgetha leleme

Eya go menyu wa bobedi

Eya go dikagare

Dihlatse tša Jehofa

Sepedi

BAFSA BA A BOTŠIŠA

Na ke Loketše go Ratana?

Na ke Loketše go Ratana?

 Go ratana ke’ng?

  • Ka mehla o intšha le motho yo a itšego wa bong bjo bo sa swanego le bja gago. Na le a ratana?

  • Wena le motho yo mongwe wa bong bjo bo fapanego le bja gago le a kgahlegelana. O romela motho yoo melaetša ka founo goba o mo founela makga a mmalwa ka letšatši. Na le a ratana?

  • Ka mehla ge o bokana le bagwera ba gago, wena le motho yo a itšego wa bong bjo bo fapanego le bja gago le dula le le gotee. Na le a ratana?

Ga go pelaelo gore ga se wa ba le bothata bja go araba potšišo ya mathomo. Eupša o ka ba o ile wa ema go se nene pele o ka araba ya bobedi le ya boraro. Ge e le gabotse go ratana ke’ng?

Go ratana ke tiro le ge e le efe ya bogwera ya ge o kgahlegela motho yo a itšego gomme le yena a go kgahlegela.

Ka gona, karabo ya dipotšišo ka moka tše tharo ke ee. Ge e ba wena le mogwera wa gago wa bong bjo bo fapanego le kgahlegelana ka tsela ya lerato e bile le boledišana ka mehla, e ka ba founong goba ge le bonana, phatlalatša goba ka sephiring, seo ke go ratana.

 Morero wa go ratana ke ofe?

Go ratana go swanetše go ba le morero o mobotse, e lego go thuša lesogana le kgarebe go bona ge e ba ba nyaka go nyalana.

Ke therešo gore ba bangwe ba dithaka tša gago ba ka tšea taba ya go ratana gabohwefo. Mohlomongwe ba fo ba ba kgahlwa ke go ba le mogwera yo a itšego wa bong bjo bo fapanego ba se na maikemišetšo a go tsena lenyalong. Le gona ba bangwe ba ka lebelela mogwera yo bjalo e le feela leswao la katlego goba sekgabiši seo ba nyakago go bonwa ba na le sona bathong e le gore ba ikwe ba le bohlokwa.

Lega go le bjalo, gantši ditswalano tše bjalo ke tša nakwana. Ngwanenyana yo a bitšwago Heather o re: “Bafsa ba bantši bao ba ratanago ba arogana ka morago ga beke e tee goba tše pedi. Ba lebelela ditswalano tša lerato e le tša nakwana—moo re ka rego ba itokišeletša tlhalo go e na le lenyalo.”

Ga go na pelaelo gore ge o ratana le motho yo a itšego, o kgoma maikwelo a gagwe. Ka gona kgonthišetša gore maikemišetšo a gago ke a mabotse.—Luka 6:31.

Ge e ba o ratana o se wa ikemišetša go tsena lenyalong, o swana le ngwana yo a bapadišago sebapadišwa se sefsa ke moka a se lahla

Nagana ka se: Na o be o ka rata gore motho yo mongwe a bapale ka maikwelo a gago bjalo ka ge eka ke sebapadišwa seo ngwana a se bapadišago ka nakwana ke moka kapejana a se hlokomologa? Gona o se ke wa swara motho yo mongwe bjalo! Beibele e re lerato “ga le dire tša go leša dihlong.”—1 Bakorinthe 13:4, 5.

Mofsa yo a bitšwago Chelsea o re: “Ka dinako tše dingwe ke ye ke nagane gore motho o swanetše go ratana go fo ithabiša, eupša ga se go ithabiša ge yo mongwe wa lena a tloga a ikemišeditše mola yo mongwe a se a ikemišetša.”

Keletšo: E le gore o itokišeletše go ratana le go tsena lenyalong, bala 2 Petro 1:5-7 ke moka o kgethe seka setee seo o nyakago go šomela go sona. Ka morago ga kgwedi, lekola gore o ithutile gakaakang ka seka seo le kamoo o kaonefaditšego ka gona.

 Na ke godile ka mo go lekanego go ka ratana?

  •  O nagana gore mofsa o swanetše go thoma go ratana a na le nywaga e mekae?

  •  Bjale botšiša yo mongwe wa batswadi ba gago potšišo e swanago.

Go ka direga gore karabo ya gago ga e swane le ya motswadi wa gago, goba e a swana. O ka ba o le gare ga bafsa ba bantši bao ka bohlale ba sa ratanego go fihlela ba gotše ka mo go lekanego gore ba ka itseba kaone.

Se ke seo Danielle wa nywaga e 17 a kgethilego go se dira. O re: “Ge ke lebelela morago nywageng e mebedi e fetilego, seo nkabego ke ile ka se lebelela go yo e tla bago molekane wa ka se fapane kudu le seo nka se lebelelago gona bjale. Ge e le gabotse, gaešita le gona bjale ga ke ikholofele gore nka dira phetho e bjalo. Ge ke bona gore e šetše e le nywaga e mmalwa semelo sa ka se sa fetofetoge, gona ke tla nagana ka go ratana.”

Go na le lebaka le lengwe leo le dirago gore go leta e be gabohlale. Beibele e diriša polelwana “lebaka la bofsa” go hlalosa nako yeo ka yona kganyogo ya go ba le thobalano le maikwelo a lerato e bago tše matla kudu. (1 Bakorinthe 7:36) Go ba le tswalano ya kgauswi le motho yo a itšego wa bong bjo bo fapanego ge o sa dutše o le lebakeng le, go ka gakatša dikganyogo tšeo gomme gwa lebiša boitshwarong bjo bo fošagetšego.

Ke therešo gore dithaka tša gago di ka fo se be le taba le seo. Bontši bja tšona di fagahletše kudu go ba le thobalano. Eupša o ka fenya, e bile o swanetše go fenya tsela e bjalo ya go nagana! (Baroma 12:2) Ge e le gabotse, Beibele e go kgothaletša go “tšhaba boitshwaro bjo bo gobogilego bja thobalano.” (1 Bakorinthe 6:18, New International Version) Ka go leta go fihlela o fetile lebaka la bofsa, o ka ‘efoga bošula.’—Mmoledi 11:10.

 Ke ka baka la’ng ke swanetše go leta pele nka thoma go ratana?

Go gapeletšwa go ratana pele o loketše seo go tla swana le go gapeletšwa go ngwala tlhahlobo ya makgaolakgang ka dithuto tšeo o sego wa ithuta tšona gakaalo. Go molaleng gore seo e tla ba go hloka toka! O hloka nako ya go ithuta dithuto tša gago e le gore o tle o tsebe mathata ao o tlago go lebeletšana le ona tlhahlobong yeo.

Go a swana le ka go ratana.

Go ratana ga se selo seo se swanetšego go tšewa gabohwefo. Ka gona pele ga ge o lokela go ratana le motho yo a itšego, o swanetše go ipha nako ya go ithuta thuto ya bohlokwa kudu, e lego ya kamoo o ka dirago bagwera.

Ka morago ge o hwetša motho yo a go swanetšego, o tla ba o le boemong bjo bobotse bja go aga tswalano e tiilego. Go ba gona, lenyalo le le atlegilego le bopša ke bagwera ba babedi ba paala.

Go leta pele o ratana go ka se šitiše tokologo ya gago. Go e na le moo, go tla go nea tokologo e oketšegilego ya go “thabela bofsa bja gago.” (Mmoledi 11:9) Le gona o tla ba le nako e oketšegilego ya go itokiša ka go kaonefatša semelo sa gago gomme sa bohlokwa le go feta wa aga bomoya bja gago.—Dillo tša Jeremia 3:27.

Gona bjale o ka thabela go ba le batho ba bong bjo bo fapanego le bja gago. Tsela e kaonekaone ya go dira seo ke efe? Ke ka go fetša nako o na le sehlopha seo se rulagantšwego gabotse sa masogana le dikgarebe seo go sona go nago le batho bao ba godilego tsebong. Ngwanenyana yo a bitšwago Tammy o re: “Ke nagana gore go dira bjalo go thabiša kudu. Ke mo gobotse go ba le bagwera ba bantši.” Monica o dumelelana le seo. O re: “Go thabela bogwera le le sehlopha ke kgopolo e botse e le ruri ka gobane o kgona go bona batho ba dimelo tše di sa swanego.”

Ka mo go fapanego, ge e ba o šetša motho yo a itšego ka lepotlapotla, o tla ba o ipakela mathata. Ka gona iketle. Diriša nako ye ya bophelo go ithuta kamoo o ka bago le bagwera le go ba kgomarela. Ka morago ge e ba o kgetha go ratana, o tla ba o itseba gakaone le go tseba seo o se nyakago go molekane wa bophelo ka moka.

 

Ithute ka mo go oketšegilego

Na Motho yo o Ntshwanetše?

Ke bjang o ka phemago go fo kga dilo ka godimo gomme wa lebeledišiša motho yoo o ratanago le yena?