Dipeakanyo tša go bula

Kgetha leleme

Eya go menyu wa bobedi

Eya go dikagare

Dihlatse tša Jehofa

Sepedi

BAFSA BA A BOTŠIŠA

Na ke Phošo Gore Batho ba Bong bjo bo Swanago ba Ratane?

Na ke Phošo Gore Batho ba Bong bjo bo Swanago ba Ratane?

David yo a nago le mengwaga e 23 o re: “Ge ke dutše ke gola, e nngwe ya dilo tše di bego di nthatafalela e be e le go lwantšhana le go ikwa ke kgahlegela batho ba bong bjo bo swanago le bja ka. Ke be ke nagana gore e be e no ba selo sa nakwana, eupša le gona bjale ke sa ikwa ka tsela yeo.”

David ke Mokriste yo a nyakago go kgahliša Modimo. Na a ka kgona go kgahliša Modimo ge e ba a ikwa a kgahlegela batho ba bong bjo bo swanago le bja gagwe? Modimo o lebelela bjang batho bao ba ratanago le batho ba bong bjo bo swanago le bja bona?

 Ke eng seo Beibele e se bolelago?

Tsela yeo batho ba lebelelago batho bao ba ratanago le batho ba bong bjo bo swanago le bja bona e ka fapana go ya ka ditšo goba go ya ka mehla yeo batho ba phelago go yona. Eupša Bakriste ga ba laolwe ke dikgopolo tše di tumilego goba “go išwa kua le kua ke phefo e nngwe le e nngwe ya thuto.” (Baefeso 4:14) Go e na le moo, ba lebelela boitshwaro bja go ratana ga batho ba bong bjo bo swanago (le boitshwaro le ge e le bofe bjo bongwe) ka tsela yeo bo hlaloswago ka Beibeleng.

Melao ya Beibele ya mabapi le go ratana ga batho ba bong bjo bo swanago e kwagala gabotse. Lentšu la Modimo le re:

  • “O se ke wa robala le motho yo motona ka tsela yeo o robalago le mosadi ka yona.”Lefitiko 18:22.

  • “Modimo [o] ba [gafetše] dikganyogong tše di hlabišago dihlong tša go robala ga monna le mosadi, gobane le ba batshadi ba bona ba fetošitše tsela ya bona ya tlhago gore e be e fapanego le tlhago.”Baroma 1:26.

  • “Le se ke la timetšwa. Ge e le diotswa goba barapedi ba medimo ya diswantšho goba dihlotlolo goba banna ba ba boloketšwego merero yeo e sego ya tlhago goba banna ba ba robalago le banna, goba mahodu goba batho ba megabaru goba matagwa goba ba maroga goba bahlakodi ba ka se je bohwa bja mmušo wa Modimo.”1 Bakorinthe 6:9, 10.

Melao ya Modimo e diretšwe batho ka moka, e ka ba bao ba ratago batho ba bong bjo bo swanago le bja bona goba bao ba ratago batho ba bong bjo bo sa swanego le bja bona. Ge e le gabotse, batho ka moka ba swanetše go ba le boitshwaro e le gore ba se ke ba dira dilo tšeo di sa kgahlišego Modimo.Bakolose 3:5.

 Na seo se bolela gore . . . ?

Na seo se bolela gore Beibele e re ruta gore re hloye di-gay?

Aowa. Ge e le gabotse, Beibele ga e re rute gore re hloye motho le ge e le ofe, e ka ba e le gay goba e se yona. Eupša e re botša gore re ‘phegelele khutšo le batho bohle,’ go sa šetšwe tsela yeo ba phelago ka yona. (Baheberu 12:14) Ka gona, ke phošo go tlaiša batho bao ba ratanago le batho ba bong bjo bo swanago le bja bjona, go ba hloya goba go ba swara ka tsela le ge e le efe e mpe.

Na seo se bolela gore Bakriste ba swanetše go lwantšhana le melao yeo e dumelelago batho ba bong bjo bo swanago gore ba nyalane?

Beibele e re botša gore molao wa Modimo ka lenyalo ke gore monna a nyalane le mosadi. (Mateo 19:4-6) Lega go le bjalo, melao ya batho tabeng ya gore batho ba bong bjo bo swanago ba nyalane e theilwe dipolotiking e sego boitshwarong bjo bobotse. Beibele e botša Bakriste gore ba se ke ba thekga dipolotiki. (Johane 18:36) Ka baka leo, ga ba thekge goba ba lwantšhana le melao ya mmušo ya mabapi le go nyalana ga batho ba bong bjo bo swanago goba go ratana ga bona.

 Eupša go thwe’ng ge e ba . . . ?

Eupša go thwe’ng ge e ba gona bjale motho yo mongwe a ratana le motho wa bong bjo bo swanago le bja gagwe? Na motho yoo a ka fetoga?

Ee. Ge e le gabotse, ba bangwe lekgolong la pele la nywaga ba ile ba fetoga! Ka morago ga gore Beibele e bolele gore bao ba ratanago le batho ba bong bjo bo swanago le bja bona ba ka se je bohwa bja Mmušo wa Modimo, e re: “Seo ke se ba bangwe ba lena le bego le le sona.”1 Bakorinthe 6:11.

Na seo se bolela gore batho bao ba tlogetšego go ratana le batho ba bong bjo bo swanago le bja bona, le ganyenyane ga ba sa ikwa ba nyaka go dira dilo tšeo ba bego ba di dira? Aowa. Beibele e re: “Le apare semelo se sefsa seo ka tsebo e nepagetšego se mpshafatšwago.” (Bakolose 3:10) Go dira diphetogo bophelong ga go fele.

Eupša motho a ka dira’ng ge e ba a nyaka go phela ka melao ya Modimo eupša a sa ikwa a rata batho ba bong bjo bo swanago le bja gagwe?

Go no swana le maikwelo le ge e le afe, motho a ka kgetha gore o dira eng ka tsela yeo a ikwago ka yona. Bjang? Beibele e re: “Tšwelang pele le sepela ka moya gomme le ka se ke la phetha kganyogo ya nama le gatee.”Bagalatia 5:16.

Temana yeo ga e re motho a ka se be le kganyogo ya nama. Go e na le moo, ge motho yoo a tiiša tswalano ya gagwe le Modimo ka go dula a bala Beibele le go rapela, a ka kgona go lwantšhana le dikganyogo tše di fošagetšego.

David yoo go boletšwego ka yena mathomong o hweditše gore seo ke therešo—kudukudu ka morago ga gore a botše batswadi ba gagwe bao e lego Bakriste bothata bja gagwe. O re: “Ge nkabe ke ile ka bolela le bona e sa le ka pela, nkabe ke ile ka ipshina ka bofsa bja ka, ka gobane ka morago ga gore ke bolele le bona ke ile ka ikwa ke imologile.”

Ge re phela ka go dumelelana le melao ya Jehofa, re hwetša lethabo. Re kgodišegile gore ‘e lokile, e thabiša pelo,’ e bile “go [e] lota go na le moputso o mogolo.”Psalme 19:8, 11.

Ithute ka mo go oketšegilego

Na Lenyalo e fo ba Tlemo ya Segwera?

Ithute kamoo dikarolo tšeo Modimo a di abetšego monna le mosadi lenyalong di ka ba thušago gore ba atlege le go thaba.