Eya go dikagare

Eya go menyu wa bobedi

Dihlatse tša Jehofa

Sepedi

BAFSA BA A BOTŠIŠA

Na ke Loketše go Tsena Lenyalong?

Na ke Loketše go Tsena Lenyalong?

Pele ga ge o ka araba potšišo ye, o swanetše go itseba gabotse. Ka mohlala, ela hloko dilo tše di latelago:

Ditswalano

O swara bjang batswadi ba gago le bana beno? Na gantši o ba felela pelo, mohlomongwe o diriša mantšu a hlabago goba a go gegea gore ba go kwe? Bona ba ka re’ng ka wena tabeng ye? Tsela yeo o dirišanago le ba lapa leno e bontšha kamoo o tlago go swara molekane wa gago.—Baefeso 4:31.

Pono ya gago

Na o na le pono e nepagetšego goba ga o na kholofelo? Na o na le pono e lekalekanego, goba na ka mehla o gapeletša go dira dilo ka tsela e itšego—ka tsela ya gago? Na o kgona go iša maswafo fase ge o gateletšegile? Na o fela pelo? Go hlagolela dika tšeo di enywago ke moya wa Modimo gona bjale go tla go thuša go itokišeletša go ba monna goba mosadi yo mokaone nakong e tlago.—Bagalatia 5:22, 23.

Ditšhelete

Na o kgona go diriša tšhelete gabotse? Na o phela o le dikolotong? Na o kgona go swarelela mošomong? Ge e ba go se bjalo, ke ka baka la’ng? Na ke ka gobane mošomo ka bowona ke bothata? Na ke mothwadi wa gago? Goba na ke ka gobane o na le mokgwa o itšego woo o swanetšego go o lokiša? Ge e ba o na le bothata bja go diriša tšhelete ya gago, o tla kgona bjang go diriša ya lapa la gago?—1 Timotheo 5:8.

Tswalano ya gago le Modimo

Ge e ba o le yo mongwe wa Dihlatse tša Jehofa, ke’ng seo o se dirago go dula o na le tswalano e botse le Modimo? Na o gata mogato wa pele gore o bale Lentšu la Modimo, o ye bodireding le go tšea karolo dibokeng tša Bokriste? Motho yo o tla tsenago le yena lenyalong o swanelwa ke go hwetša molekane yo a nago le tswalano e tiilego le Modimo.—Mmoledi 4:9, 10.

Ge o ikwešiša gakaone, seo se tla go thuša go hwetša motho yo a tla dirago gore dika tša gago tše dibotse di bonagale go e na le go bea mafokodi a gago nyanyeng.