Dipeakanyo tša go bula

Kgetha leleme

Eya go menyu wa bobedi

Eya go dikagare

Dihlatse tša Jehofa

Sepedi

Nka Dirišana Bjang Gabotse le Morutiši wa ka?

Nka Dirišana Bjang Gabotse le Morutiši wa ka?

Ema gomme o nagane!

Ela hloko phihlelo ya Rachel. Rachel o be a dutše a hwetša dimaraka tša godimo kudu sekolong. Ke moka ge a fihla mphatong wa bohlano, dilo di ile tša fetoga. Rachel o re: “Morutiši wa ka o ile a leka go dira selo le ge e le sefe go dira gore ke palelwe ka klaseng.” Bothata e be e le eng? Morutiši yo o ile a bontšha Rachel le mmagwe gore o be a sa rate bodumedi bja bona.

Barutiši ba swana le maswika ao o a gatago ge o tshela noka, ba go thuša gore o tsebe dilo tšeo o sa di tsebego, eupša ke wena o swanetšego go dira maiteko

Go ile gwa direga’ng? Rachel o re: “Nako le nako ge go bonagala gore morutiši yoo o be a dumelela kgethollo e kgoma tsela yeo a swayago mošomo wa ka wa sekolo, mma o be a tla sepela le nna gomme re boledišane le yena ka taba ye. Mafelelong o ile a kgaotša go ntlaiša.

Ge e ba o lebeletšane le boemo bjo bo swanago, eba le sebete sa go boledišana le batswadi ba gago ka bjona. Ga go na pelaelo gore ba tla thabela go boledišana le morutiši wa gago gomme ge e ba go kgonega le hlogo ya sekolo go rarolla bothata.

Ka ntle le pelaelo, ga se mathata ka moka ao a bago le mafelelo a mabotse. Ka dinako tše dingwe, o swanetše go fo kgotlelela. (Baroma 12:17, 18) Tanya o re: “Yo mongwe wa barutiši ba ka o be a na le pono e fošagetšego ka barutwana ba gagwe. Gantši o be a re roga, a re re ditlaela. Mathomong o be a dira gore ke lle, eupša ke ithutile go se iše maroga a gagwe hlogong. Ke ile ka lebiša tlhokomelo modirong wa ka wa sekolo gomme ka dula ke swaregile ka klaseng ya gagwe. Ka baka leo, ga se a ka a ntshwenya kudu gomme ke ile ka ba yo mongwe wa ba sego kae bao ba ilego ba hwetša dimaraka tša godimo. Ka morago ga nywaga e mebedi morutiši yoo o ile a rakwa.

Therešo e sa fetogego: Ithute kamoo o ka lebeletšanago le morutiši yo thata gomme o tla hwetša thuto ya bohlokwa kudu bophelong, e lego yeo e tlago go go thuša ge o lebeletšane le mongmošomo yo thata. (1 Petro 2:18) Le gona o tla ithuta go tšeela godimo barutiši ba babotse ge o ka ba le bona.