Dipeakanyo tša go bula

Kgetha leleme

Eya go menyu wa bobedi

Eya go dikagare

Dihlatse tša Jehofa

Sepedi

BAFSA BA A BOTŠIŠA

Ke ka Baka La’ng ke Itshega?

Ke ka Baka La’ng ke Itshega?

 Go itshega ke’ng?

Go itshega ke mokgwa wa go lemalela go ikgobatša ka dilo tše bogale. Ke o mongwe wa mekgwa ya go ikgobatša. Mekgwa e mengwe e akaretša go iphiša, go ikgobola goba go ipetha. Sehlogo se se bolela ka go itshega, eupša melao ya motheo yeo e ahlaahlwago mo e akaretša mehuta ka moka ya go ikgobatša.

Dira molekwana wo: Therešo goba Maaka.

  1. Ke banenyana feela bao ba itshegago.

  2. Ge motho a itshega o tshela taelo yeo e lego ka Beibeleng go Lefitiko 19:28, yeo e rego: “Le se ke la itshegaganya mebele ya lena.”

Dikarabo tše di nepagetšego:

  1. Maaka. Gaešita le ge go bonagala mokgwa wo o atile kudu go banenyana, bašemane ba bangwe le bona ba itshega le go ikgobatša ka ditsela tše itšego.

  2. Maaka. Lefitiko 19:28 e šupa go motlwae wa boheitene wa bogologolo, e sego go lemalela go ikgobatša moo go ahlaahlwago sehlogong se. Lega go le bjalo, ke mo go kwagalago go phetha ka gore Mmopi wa rena yo lerato ga a nyake gore re ikgobatše.—1 Bakorinthe 6:12; 2 Bakorinthe 7:1; 1 Johane 4:8.

 Ke ka baka la’ng batho ba itshega?

Dira molekwana wo: Ke lefoko lefe leo o naganago gore le tloga le nepagetše?

Batho ba itshega . . .

  1. ka gobane ba leka go lebeletšana le go tshwenyega maikwelong.

  2. ka gobane ba leka go ipolaya.

Karabo e nepagetšego: A. Batho ba bantši bao ba itshegago ga ba nyake go hwa. Ba fo ba ba nyaka go fediša go tshwenyega ga bona maikwelong.

Ela hloko seo bafsa ba bangwe ba se boletšego ka mokgwa wo wa go itshega.

Celia: “Go be go dira gore ke ikwe ke imologile.”

Tamara: “E be e le setšhabelo sa ka. Bohloko bja mmeleng bo be bo le kaone go feta bja maikwelong.”

Carrie: “Ke be ke hloile go nyama. Go itshega go be go dira gore ke šetše bohloko bjo ke bo kwago mmeleng go e na le go dula ke naganne ka manyami a ka.”

Jerrine: “Nako e nngwe le e nngwe ge ke be ke itshega, ke be ke sa bone seo se diregago go ntikologa, ka go re’alo go be go sa nyakege gore ke lebeletšane le mathata a ka. Ke ile ka thabela go fetoga.”

 Ge e ba o na le bothata bjo, o ka kgaotša bjang?

Go rapela Jehofa Modimo e ka ba mogato o bohlokwa wa go go thuša go kgaotša. Beibele e re: ‘Lahlela dipelaelo tša gago ka moka go yena, gobane o a go hlokomela.’—1 Petro 5:7.

Tšhišinyo: Thoma ka dithapelo tše kopano, mohlomongwe ka go fo botša Jehofa gore: “Ke kgopela thušo.” Ge nako e dutše e eya, o tla kgona go ntšhetša “Modimo wa khomotšo yohle” sa mafahleng.—2 Bakorinthe 1:3, 4.

Thapelo ga se selo sa go go dira gore o ikwe o le kaone. Ke tsela ya kgonthe ya go boledišana le Tatago wa legodimong, yoo a holofetšago gore: “Ruri ke tla go thuša. Ruri ke tla go swara ka go tia ka seatla sa ka sa le letona sa toko.”—Jesaya 41:10.

Ba bantši bao ba bego ba na le bothata bja go itshega ba thušitšwe ke go bolela le motswadi goba motho yo mongwe yo mogolo yoo ba mmotago. Ela hloko mantšu a latelago go tšwa go bafsa ba bararo bao ba ilego ba dira seo.

 Dipotšišo tšeo o ka naganišišago ka tšona

  • O ka ntšhetša mang sa mafahleng ge o šetše o nyaka go hwetša thušo?

  • O ka rapela Jehofa Modimo wa re’ng ka taba ye?

  • Na o ka bolela mekgwa e mebedi (yeo e sa akaretšego go ikgobatša) yeo o ka e dirišago go fokotša kgateletšego le go tshwenyega?