Dipeakanyo tša go bula

Kgetha leleme

Eya go menyu wa bobedi

Eya go dikagare

Dihlatse tša Jehofa

Sepedi

Go Thwe’ng ge e ba ke Hloile Sekolo?

Go Thwe’ng ge e ba ke Hloile Sekolo?

Seo o se hlokago ke se

Pono e botse ka go ithuta. Leka go bona dilo ka mahlakoreng ka moka. Ga se dithuto ka moka tšeo o ithutago tšona tšeo di ka bonagalago di le bohlokwa gona bjale. Lega go le bjalo, go ba le tsebo dithutong tše di fapafapanego go tla kaonefatša kwešišo ya gago ka dilo tšeo di diregago mo lefaseng. Go tla go thuša gore o “[be] dilo tšohle go batho ba mehuta ka moka,” gwa go nea bokgoni bja go boledišana le batho ba ditlogo tše di fapafapanego. (1 Bakorinthe 9:22) Le gona go tla kaonefatša bokgoni bja gago bja go nagana—e lego bokgoni bjoo ge e le gabotse bo tlago go go thuša nakong e tlago.

Go atlega sekolong go ka swana le go bula tsejana sethokgweng se se raraganego—eupša bobedi bja tšona di a kgonega ge o gata megato ya maleba

Pono e botse ka morutiši wa gago. Ge e ba o nagana gore morutiši wa gago o a tšwafiša, lebiša tlhokomelo go seo a se rutago e sego go yena. Gopola gore go ka direga gore morutiši wa gago o rutile dithuto tše di swanago ka makga a mantšintši ka diklaseng tše dingwe. Ka gona, e ka ba tlhohlo go yena gore a dule a na le phišego yeo a bego a na le yona ge a be a thoma go ruta thuto yeo.

Keletšo: Ngwala dintlha, ka tlhompho o kgopele go hwetša tsebišo e oketšegilego gomme o fišegele go ithuta thuto yeo. Phišego ya gago e ka fetela ba bangwe.

Pono e nepagetšego ka bokgoni bjo o nago le bjona. Sekolo se ka utolla ditalente tša gago tšeo di utegilego. Paulo o ile a ngwalela Timotheo gore: “O kgohletše bjalo ka mollo mpho ya Modimo yeo e lego go wena.” (2 Timotheo 1:6) Go molaleng gore Timotheo o be a neilwe mpho ya moya o mokgethwa. Eupša “mpho” yeo a bego a e neilwe e be e swanetše go hlagolelwa e le gore e se ke ya dula e sa dirišwe goba ya hloka mohola. Ke therešo gore bokgoni bja gago bja sekolong ga se wa bo newa ke Modimo ka go lebanya. Lega go le bjalo, o na le ditalente tša moswananoši. Sekolo se ka go thuša go utolla le go oketša bokgoni bjo o bego o sa tsebe gore o na le bjona.