Dipeakanyo tša go bula

Kgetha leleme

Eya go menyu wa bobedi

Eya go dikagare

Dihlatse tša Jehofa

Sepedi

BAFSA BA A BOTŠIŠA

Nka Hlalosa Bjang Ditumelo tša ka ka Thobalano?

Nka Hlalosa Bjang Ditumelo tša ka ka Thobalano?

“O re ga se wa ka wa robala le motho?”

Ge e ba o nyaka go araba ka ee, na o be o ka nyaka go nea karabo yeo ka sebete? Sehlogo se se tla go thuša!

Go ba gona, go robala le motho ga se tsela e nnoši ya tša thobalano. Ba bangwe ba ka bolela gore ga se ba ka ba robala le motho ka ge ba sa ka ba tsena le motho mpeteng—gaešita le ge ba ile ba dira dilo tše dingwe.

Ka mohlala, lentšu “thobalano” le ka šupa go go hupa ditho tša pelego, go tsenya setho sa bonna ka morago goba go tsoša ditho tša pelego tša motho yo mongwe.

Therešo e sa fetogego: Batho bao ba kilego ba ba le thobalano—go akaretša go hupa ditho tša pelego, go tsenya setho sa bonna ka morago goba go tsoša ditho tša pelego tša motho yo mongwe—ba ka se bolele gore bona ga se ba ka ba ba le thobalano.

Beibele e re’ng ka thobalano?

Beibele e bolela gore thobalano e swanetše go dirwa feela ke monna le mosadi bao ba nyalanego. (Diema 5:18) Ka gona, motho yo a nyakago go thabiša Modimo ga se a swanela go robala le motho yo mongwe go fihlela ge a nyetše.—1 Bathesalonika 4:3-5.

Ba bangwe ba re pono yeo ya Beibele e tšwile fešeneng gomme e ka se šome mehleng ye ya rena. Eupša o se lebale gore mehla ye ya rena e tletše tlhalo, boimana bjo bo sa nyakegego le malwetši ao a fetelago ka thobalano. Ruri mehla ye ya rena e ka se nee keletšo le ge le efe e kaone ka boitshwaro!—1 Johane 2:15-17.

 Ge ruri o ka theetša melao ya boitshwaro ya Beibele, o tla lemoga gore e a kwagala. Ka mohlala, a re re motho o go nea diranta tše 10 000 e le mpho. Na o ka foša tšhelete yeo o le ka godimo ga ntlo gore motho yo mongwe le yo mongwe yoo a fetago a e tope?

Go bjalo ge go tliwa tabeng ya thobalano. Sierra wa nywaga e 14 o re: “Ga ke nyake go lahlegelwa ke bokgarebe bja ka go motho yoo mohlomongwe nka se mo gopolego mengwaga e mmalwa go tloga ga bjale.” Tammy wa nywaga e 17, le yena o dumelelana le seo. O re: “Thobalano ke mpho e bohlokwa yeo e sa swanelwago go gatwa ka maoto.

Therešo e sa fetogego: Beibele e beetše bao ba sego ba hlwa ba nyala goba go nyalwa molao wa gore ba se dire thobalano e bile ba dule ba hlwekile.—1 Bakorinthe 6:18; 7:8, 9.

Wena o dumela eng?

  • Na o dumela gore pono ya Beibele ka thobalano e a kwagala goba e a gatelela?

  • Na o dumela gore ga go phošo ge batho ba babedi bao ba rego ba a ratana ba ka ba le thobalano le ge ba sa nyalana?

 Ka morago ga go naganišiša ka taba ye, bafsa ba bantši ba ile ba phetha ka gore go dula ba sa tsenela thobalano le go itshwara ke phetho e kaonekaone. Ga ba itsholele phetho yeo goba go ikwa eka ba fetwa ke monate. Ela hloko seo ba bangwe ba bona ba se boletšego:

  • “Ke thabela gore ke sa le kgarebe! Ke bona go le kaone go phema bohloko bja monagano, bja mmele le bja maikwelo bjoo bo tlišwago ke go tsenela thobalano pele ga nako.”—Emily.

  • “Ke thabela gore ga go motho yoo nkilego ka ratana le yena yoo ga bjale re kgaoganego mola re kile ra robala mmogo, e bile ke thabela gore ke tloga ke kgodišegile gore ga ke na malwetši ao a fetelago ka thobalano.”—Elaine.

  • “Ke kwele banenyana ba bangwe ba dithaka tša ka ba bolela gore ba itsholela gore ba ile ba ba le thobalano gomme ba re ba duma gore nkabe ba ile ba leta, ga ke nyake go ipona ke dirile phošo e swanago le ya bona.”—Vera.

  • “Ke bone batho ba bantši ba kwele bohloko kudu ka ge ba ile ba robala le batho ba bangwe goba ka ge ba ile ba ratana le batho ba bantši. Go ya ka nna, seo ke go itšhulafaletša bophelo.”—Deanne.

Therešo e sa fetogego: O swanetše go tseba seo o se dumelago pele o gatelelwa goba o lekwa gore o be le thobalano.—Jakobo 1:14, 15.

O ka hlalosetša bjang ba bangwe ditumelo tša gago?

O swanetše go re’ng ge motho yo mongwe a go botšiša seo o se dumelago ka thobalano? Gantši go ithekgile ka maemo.

“Ge motho yo mongwe a ka nkwera e le feela go nkweša bohloko, nka se fo ema ka mo lebelela. Nka re: ‘Ga se taba ya gago,’ ke moka ka sepela.”—Corinne.

 “Go a nyamiša gore batho ba bangwe kua sekolong ba fo nyaka go kweša ba bangwe bohloko ba re ba a ithabiša. Ge le nna ba ka mpotšiša ka wona morero woo, nka fo ikhomolela.”—David.

Na o be o tseba? Ka dinako tše dingwe Jesu o be a ‘araba’ batlaiši ba gagwe ka go fo ikhomolela.—Mateo 26:62, 63.

Eupša go thwe’ng ge e ba motho yoo a go botšišago a tloga a nyaka go tseba? Ge e ba o nagana gore motho yoo a ka ba a hlompha Beibele, o ka mmalela temana e bjalo ka 1 Bakorinthe 6:18, yeo e rego motho yo a tsenelago thobalano pele ga nako o direla mmele wa gagwe sebe, goba o a o gobatša.

Go sa šetšwe gore o thoma ka go diriša Beibele goba go se bjalo, o swanetše go tiiša ka ganong. O se lebale gore o na le tokelo ya go ikgantšha ka kgetho ya gago ya go dula o hlwekile boitshwarong.—1 Petro 3:16.

“Go araba ka kgodišego go bontšha gore ga o belaele ditumelo tša gago le gore o dira seo o se dirago ka gobane se lokile, e sego feela ka gobane o boditšwe gore o dire bjalo.”—Jill.

Therešo e sa fetogego: Ge e ba o kgodišegile ka boemo bja gago ka ditaba tša thobalano, o tla kgona go hlalosetša ba bangwe. O ka makatšwa ke tsela yeo ba ka go arabago ka yona. Melinda wa nywaga e 21 o re: “Batho bao ke šomago le bona ba ntheta ka ge ke sa le kgarebe. Ga ba bone seo e le bothata. Ba se tšea e le leswao la gore ke na le boitshwaro le mekgwa e mebotse.”

Temošo! Ge e ba o nyaka thušo ka go tiiša kgodišego ya gago ka thobalano, taonelouta letlakala la go itekola le le rego: “Kamoo o ka Hlalosago Ditumelo tša Gago ka Thobalano.” Le gona, bona puku ya Dipotšišo tša Bafsa le Dikarabo tše Šomago.

  •  Kgaolo 24 ya Bolumo 1 e na le sehlogo se se rego: “Na Thobalano e tla Kaonefatša Tswalano ya Rena?”

  •  Kgaolo 5 ya Bolumo 2 e na le sehlogo se se rego: “Ke ka Baka La’ng o sa Swanela go ba le Thobalano Pele ga Lenyalo?”

“Ke kgahlwa ke tsela yeo puku ya ‘Dipotšišo tša Bafsa’ e beago ditaba ka gona. Ka mohlala, letlakala 187 la Bolumo 1 le hlalosa kamoo go ba le thobalano pele ga lenyalo go swanago le go fa motho pheta ya gago ya go tura mahala. Go bjalo ka go ithekiša ka tšhelete ya tlase. Letlakala 177 le bontšha gore go ba le thobalano pele ga lenyalo go swana le go tšea seswantšho se sebotse gomme wa se dira mmete wa mojako. Sa go nkgahla kudu ke seo se lego go letlakala 54 la Bolumo 2. Mantšu a lego seswantšhong sa letlakala leo a re: ‘Go ba le thobalano pele ga lenyalo go swana le go bula mpho pele o ka e newa.’ Go swana le go utswa selo sa motho yo mongwe—e lego molekane wa gago wa ka moso.”—Victoria.