Dipeakanyo tša go bula

Kgetha leleme

Eya go menyu wa bobedi

Eya go dikagare

Dihlatse tša Jehofa

Sepedi

Nka Hwetša Bjang Dimaraka tše Kaone?

Nka Hwetša Bjang Dimaraka tše Kaone?

Seo o ka se dirago

Nagana gabotse! O se ke wa dumelela boemo bja gago bja kgopolo bo go dira gore o palelwe mošomong wa gago wa sekolo ka go nagana gore o ka se kgone go kaonefatša dithutong tša gago. Ge o tshwenywa ke dikgopolo tše di fošagetšego mabapi le bokgoni bja gago, dira gore di tšeelwe legato ke tše di nepagetšego. Ka mohlala, ge batho (mohlomongwe ka go hloka toka) ba be ba nyatša bokgoni bja Paulo bja go bolela, o ile a araba ka gore: “Gaešita le ge ke se sekgwari polelong, ka kgonthe tsebong gona ke sona.” (2 Bakorinthe 10:10; 11:6) Paulo o be a tseba mafokodi a gagwe. Eupša o be a tseba le dilo tšeo a bego a kgona go di dira. Go thwe’ng ka wena? Ke dilo dife tšeo o kgonago go di dira? Ge e ba o sa di tsebe, ke ka baka la’ng o sa botšiše motho yo mogolo gore a go thuše? Mogwera yo bjalo a ka go thuša go lemoga bokgoni bja gago le gore o bo diriše ka botlalo.

Hlagolela mekgwa e mebotse ya go ithuta. Ga go kgonege gore o atlege sekolong ntle le gore o šome ka thata. Se se šalago ke gore o swanetše go ithuta. Ke therešo gore lentšu leo ka bolona le ka kwagala le sa kgahliše. Eupša go ithuta go a hola. Ge e le gabotse, ka go dira boiteko o ka hwetša go thabiša. Lega go le bjalo, e le gore o hlagolele mekgwa e mebotse ya go ithuta, o swanetše go rulaganya nako ya gago. Gopola gore ge o sa dutše o tsena sekolo, go ithuta go swanetše go tla pele. Ke therešo gore Beibele e re go na le “nako ya go sega” le “nako ya go bina.” (Mmoledi 3:1, 4; 11:9) Ka gona, go swana le bafsa ba bantši, go ka direga gore o nyaka go ba le nako e itšego ya go itapološa. Eupša Mmoledi 11:4 e lemoša ka gore: “Yo a šeditšego phefo a ka se bjale peu; yo a lebeletšego maru a ka se bune.” O ithuta’ng tabeng ye? O ithuta gore o se ke wa dikadika. Ge e ba o ka dira bjalo, go ka se be le mo o yago. Ithute pele, ke moka o itapološe ka morago. O se ke wa tshwenyega—o ka kgona go hwetša nako ya go dira dilo tše ka bobedi!

Go fo swana le ge go kuka ditšhipi go ka go matlafatša mmeleng, mekgwa e mebotse ya go ithuta e ka kaonefatša bokgoni bja gago sekolong