Dipeakanyo tša go bula

Kgetha leleme

Eya go menyu wa bobedi

Eya go dikagare

Dihlatse tša Jehofa

Sepedi

BAFSA BA A BOTŠIŠA

Nka Kgaotša Bjang go Dula ke Nyamile?

Nka Kgaotša Bjang go Dula ke Nyamile?

“Nako le nako ge bagwera ba ka ba sa kgone go lebeletšana le mathata a bona, ke ba thuša go a rarolla le go dira gore ba ikwe ba le kaone. Eupša ka morago ga moo ke ya gae ka tsena ka phapošing ya ka ka lla, gomme se se tsebja ke batho ba sego kae feela.”—Kellie.

“Ge ke nyamile, ga ke nyake motho kgauswi le nna. Ge e ba ke laletšwa felo tsoko, ke itirela mabakanyana a go se ye moo. Ke kgona go fihlela ba lapa lešo gore ke nyamile. Ba nagana gore ga ke na bothata.”—Rick.

Na o kile wa ikwa bjalo ka Kellie goba Rick? Ge e ba go le bjalo, o se ke wa fo kitimela go phetha ka gore o na le bothata. Therešo ke gore motho yo mongwe le yo mongwe o a nyama ka dinako tše dingwe. Gaešita le banna le basadi bao ba botegago ba ka Beibeleng ba ile ba nyama.—1 Samuele 1:6-8; Psalme 35:14.

Ka dinako tše dingwe, o ka tseba gore o nyamišitšwe ke eng; mola ka dinako tše dingwe o ka se tsebe. Anna wa nywaga e 19 o re: “Ga o nyame feela ge o le mathateng. O ka nyama ka nako le ge e le efe, gaešita le ge o se na mathata. Go a makatša, eupša go a direga!”

Go sa šetšwe gore o nyamišitšwe ke eng—goba gaešita le ge o sa tsebe lebaka—o ka dira’ng ge o ikwa o nyamile kudu? Leka go dira se se latelago:

  1. Bolela ka seo. Ge Jobo a be a le mathateng, o itše: “Ke tla bolela ke šulafaletšwe moyeng!”—Jobo 10:1.

    Kellie o re: Go a makatša gore ka morago ga go bolela le motho yo mongwe ke ikwa ke imologile. Mafelelong motho yo mongwe o tseba mathata a ka. Go ba bjalo ka ge eka o theoša thapo gomme a nntšha ka moleteng wo ke bego ke kgakgetšwe ka go wona!

  2. Ngwala ka taba yeo. Ge go nyama go go šulafaletša bophelo, gona leka go ngwala maikwelo a gago fase. Ka dinako tše dingwe, Dafida o ngwadile ka manyami a gagwe dipsalmeng tša gagwe tšeo di buduletšwego. (Psalme 6:6) Go ngwala ka maikwelo a bjalo go ka go thuša go “lota bohlale le tlhaologanyo.”—Diema 3:21.

    Heather o re: “Go ngwala go nthuša go hlaphogelwa. Ge e ba o ka kgona go ngwala mathata a gago le go a rarolla, gona o ka kgona go theoša maswafo.”

  3. Rapela ka taba yeo. Beibele e re ge e ba o rapela ka dilo tšeo di go tshwenyago, ‘khutšo ya Modimo yeo e fetago kwešišo yohle ya batho e tla diša pelo ya gago le matla a gago a monagano.’—Bafilipi 4:6, 7.

    Esther o re: “Ke be ke ipotšiša gore ke nyamišitšwe ke eng, eupša ka se hwetše karabo. Ke ile ka kgopela Jehofa gore a nthuše gore ke thabe. Ke be ke lapišitšwe ke go nyama ntle le lebaka. Mafelelong ke ile ka kgaotša go nyama. O se ke wa tšeela fase matla a thapelo!”

    Ge o ka hwetša thušo gomme le wena wa dira maiteko, o ka tšwa moleteng o mogolo wa manyami

    Tšhišinyo: Diriša Psalme 139:23, 24 e le mohlala wa thapelo ya gago go Jehofa. Tšhollela pelo ya gago go yena, gomme o mo kgopele gore a go thuše go tseba gore o nyamišitšwe ke eng.

Go tlaleletša ditšhišinyong tšeo di boletšwego ka mo godimo, Lentšu la Modimo, Beibele, le lona le ka go thuša. Go nagana ka dikgopolo tše di agago tšeo di ka hwetšwago dipegong tša Beibele go ka fetoša maikwelo a gago.—Psalme 1:1-3.

Ge go Nyama go sa Fele

Ryan o re: “Mesong e mengwe, ke fo duma go se tsoge gore ke pheme go lebeletšana le letšatši le lengwe gape leo le se nago morero.” Ryan o na le kgateletšego e tseneletšego ya monagano gomme ga se yena a nnoši. Dinyakišišo di šišinya gore mo e ka bago mofsa o tee go ba bane o ba le mohuta o itšego wa kgateletšego ya monagano pele e ka ba motho yo mogolo.

O ka tseba bjang gore o na le kgateletšego ya monagano? Maswao a mangwe a akaretša go fetoga kudu ga maikwelo le boitshwaro, go ba tšhikanoši, go se dume go dira selo, go fetoga mo go lemogegago ga mekgwa ya go ja le ya go robala le go ikwa o se sa na mohola goba go ikwa o le molato go sa nyakege.

Ke therešo gore ka dinako tše dingwe mo e ka bago motho yo mongwe le yo mongwe o ba le a mangwe a maswao ao goba letee la wona. Eupša ge e ba maswao ao a tšwela pele a le gona ka dibeke tše mmalwa, go re’ng o sa boledišane le batswadi ba gago gore o ye ngakeng? Ngaka e ka go thuša go bona ge e ba go nyama ga gago go nyaka kalafo.

Ge e ba o na le kgateletšego e tseneletšego ya monagano, seo ga se sa swanela go go leša dihlong. Balwetši ba bantši ba ile ba thoma go ikwa ba le kaone ka morago ga go hwetša kalafo—mohlomongwe ba ile ba thoma go ikwa ba le kaone go feta kamoo ba ilego ba ikwa ka gona ka nako e telele! Go sa šetšwe gore go nyama ga gago go bakwa ke kgateletšego ya monagano goba go se bjalo, gopola mantšu a kgothatšago a Psalme 34:18 ao a rego: “Jehofa o kgauswi le ba dipelo tše di robegilego; o phološa ba meoya e nyamilego o šoro.”

 

Ithute ka mo go oketšegilego

Ke Phelela Eng?

Ke’ng seo se ka dirago gore motho a lebelele lehu e le mogwera?