Dipeakanyo tša go bula

Kgetha leleme

Eya go menyu wa bobedi

Eya go dikagare

Dihlatse tša Jehofa

Sepedi

BAFSA BA A BOTŠIŠA

Na go Bohlokwa Gore ke be le Mekgwa?

Na go Bohlokwa Gore ke be le Mekgwa?

‘Batho ga ba ke ba mpulela mojako; ke ka baka la’ng ke swanetše go ba bulela?’

‘Na ga go na dilo tše dingwe tše bohlokwa tšeo ke swanetšego go tshwenyega ka tšona go e na le gore ke hlwe ke tshwenyegile ka gore “hle,” “ke a leboga” le “tshwarelo hle”?’

‘Ga go bohlokwa gore ke bontšhe mekgwa go bana bešo. Re bana ba motho.’

Na se se boletšwego ka mo godimo ke dilo tše dingwe tšeo o ka di bolelago? Ge e ba o fela o bolela ka mokgwa wo, ruri o fetwa ke mehola ya go ba le mekgwa e mebotse!

 Seo o swanetšego go se tseba ka go ba le mekgwa

Go ba le mekgwa e mebotse go ka kaonefatša dikarolo tše latelago tše tharo tša bophelo bja gago:

  1. Botumo bja gago. Tsela yeo o swarago batho ka yona e ka fetiša pono e botse goba e mpe ka wena. Ge e ba o na le mekgwa e mebotse, go ka direga gore batho ba go lebelele bjalo ka motho yo a godilego le yoo a nago le boikarabelo—le gona le bona ba tla go swara ka mokgwa woo! Lega go le bjalo ge e ba o se na mekgwa, batho ba ka nagana gore ga o na taba le batho ba bangwe e bile o ka feleletša o fetwa le ke dibaka tša go hwetša mošomo. Go etša ge Beibele e bolela gore: “Motho yo sehlogo o itira molahlwa [goba moipolai].”—Diema 11:17.

  2. Bagwera ba gago. Beibele e re: “Aparang lerato gobane ke setlemo se se phethagetšego sa botee.” (Bakolose 3:14) Seo ke sa therešo le go feta ge go tliwa tabeng ya go dira segwera. Batho ba rata go gwerana le batho bao ba nago le mekgwa le bao ba ba swarago gabotse. Go feta moo, ke mang yo a ka nyakago go gwerana le motho yo a se nago mekgwa le yoo a sa kgonego go phedišana le ba bangwe?

  3. Tsela yeo ba bangwe ba go swarago ka yona. Mosetsana yo mongwe yo a bitšwago Jennifer o re: “Ge e ba o dula o le botho, ge nako e dutše e eya, o ka dira gore le motho yo a se nago mekgwa a fetole tsela yeo a go swarago ka yona.” Therešo ke gore ge e ba le wena o se na mekgwa, o ka se kgone go thuša motho yo a se nago mekgwa. Beibele e re: “Kelo yeo le elago ka yona, ba tla le elela ka yona.”—Mateo 7:2.

Therešo e sa fetogego: Letšatši le letšatši re phela le batho ba bangwe. Tsela yeo o phelago le bona ka yona e ka kgoma kamoo batho ba go lebelelago le go go swara ka gona. Taba ye ge e bewa gabonolo, go ba le mekgwa go bohlokwa!

 Kamoo o ka kaonefatšago ka gona

  1. Lekodišiša mekgwa ya gago. Ipotšiše dipotšišo tše bjalo ka: ‘Na ke hlompha batho ba bagolo ge ke bolela le bona? Ke ga kae ge ke bolela ke dirišago mantšu a bjalo ka “hle,” “ke a leboga” goba “tshwarelo hle”? Na ke fela ke šitišwa ke dilo tše di swanago le go bala goba go araba melaetša ya founo ge ke bolela le ba bangwe? Na ke swara batswadi ba ka le bana bešo ka tlhompho goba ke fo ba ke sa bontšhe tlhompho ka gore e le ba ka gae?’

    Beibele e re: “Go bontšhaneng kgodišo, etelelang pele.”—Baroma 12:10.

  2. Ipeele dipakane. Ngwala dikarolo tše tharo tšeo o ka kaonefatšago go tšona. Ka mohlala, Allison, wa mengwaga e 15 o re o nyaka “go ithuta go ba le bokgoni bja go theetša go e na le go bolela kudu.” David wa mengwaga e 19, o re o nyaka go šomela ntlheng ya go tlogela go romela melaetša ka founo ge a dutše a bolela le ba lapa la gabo le bagwera. O re: “Ke go ba le lenyatšo, ge o dira bjalo o tla be o botša ba lapa le bagwera gore go kaone ge ke bolela le batho ba bangwe go e na le go bolela le lena.” Edward wa mengwaga e 17, o re o nyaka go tlogela go tsena batho ba bangwe ganong ge ba bolela. Ge e le Jennifer yo go boletšwego ka yena pejana, o ikemišeditše go šomela tabeng ya go bontšha mekgwa bathong ba bagolo. O re: “Ke be ke tlwaetše go fo dumediša ka go itlhaganela ke kitimetše go ya go bagwera ba ka. Eupša ga bjale ke tloga ke iteka gore ke tsebe batho ba bagolo gakaone. Ruri se se nthušitše kudu gore ke kgone go bontšha mekgwa e mebotse!”

    Beibele e re: “Le se ke la kgahlegela ditaba tša lena feela, eupša le kgahlegele le tša ba bangwe.”—Bafilipi 2:4.

  3. Dula o bona gore o kaonefaditše gakaakaang. Fetša kgwedi o hlahloba tsela yeo o bolelago ka yona goba kamoo boitshwaro bja gago bo lego ka gona dikarolong tšeo o nyakago go kaonefatša go tšona. Ge kgwedi yeo e fela, ipotšiše gore: ‘Go ba ga ka le mekgwa go nthušitše bjang gore ke be motho yo kaone? Ke dikarolong dife moo go sa nyakegago gore ke kaonefatše?’ Ipeele dipakane tše difsa tša go kaonefatša moo o sa šaletšego gona.

    Beibele e re: “Ka mo le nyakago batho ba le dira ka gona, le lena le ba direng ka wona mokgwa woo.”—Luka 6:31.