Dipeakanyo tša go bula

Kgetha leleme

Eya go menyu wa bobedi

Eya go dikagare

Dihlatse tša Jehofa

Sepedi

Nka Dira Bjang Gore Batswadi ba ka ba Mpote?

Nka Dira Bjang Gore Batswadi ba ka ba Mpote?

Seo o ka se dirago

Ela se hloko: Ka kakaretšo, na boitshwaro bja gago bo nea batswadi ba gago lebaka la gore ba se go bote?

Ka mohlala, moapostola Paulo o ngwadile gore: “Re rata go itshwara ka go botega dilong tšohle.” (Baheberu 13:18) Ipotšiše gore: ‘Ke itlhatsetše ke botega gakaaka’ng ge ke be ke botša batswadi ba ka moo ke yago gona le seo ke tla bego ke se dira?’

Kgetha leina ka mo tlase gomme o bale ka seo se ilego sa direga e le ka kgonthe.

 Lori  Beverly

 Lori

Ke be ke romela melaetša ka sephiring ka e-mail go mošemane yo a itšego yo ke bego ke mo rata. Batswadi ba ka ba ile ba tseba ka seo gomme ba mpotša gore ke kgaotše go dira bjalo. Ke ile ka ba holofetša gore ke tla kgaotša eupša ka se kgaotše. Se se ile sa tšwela pele se direga ka lebaka la ngwaga. Ke be ke romela mošemane yoo melaetša, batswadi ba ka ba tsebe ka seo ke moka ke kgopele tshwarelo gomme ke holofetše go kgaotša, eupša ke boeletše seo. Seo se ile sa fihla bokgoleng bja gore batswadi ba ka ba se sa hlwa ba mpota selong le ge e le sefe!

O nagana gore ke ka baka la’ng batswadi ba Lori ba ile ba kgaotša go mmota?

Ge e ba o be o le motswadi wa Lori, nkabe o ile wa dira’ng, gona ka baka la’ng?

Lori o be a swanetše go itshwara bjang ka tsela yeo e bontšhago gore a ka botwa ka morago ga gore batswadi ba gagwe ba boledišane le yena la mathomo ka bothata bjoo?

 Beverly

Batswadi ba ka ba be ba sa bote gore nka itshwara gabotse ge ke le gare ga bašemane, eupša ga bjale ke kwešiša lebaka. Ke be ke bapala ka lerato le bašemane ba mmalwa bao ba bego ba mpheta ka nywaga e mebedi. Le gona, ke be ke fetša diiri tše dintši ke boledišana le bona ka mogala gomme ge re le dipokanong ke be ke tla boledišana le bona feela. Batswadi ba ka ba ile ba nkamoga mogala wa ka lebaka la kgwedi gomme ba be ba gana ke eya mafelong ao bašemane bao ba bego ba eba go ona.

Ge e ba le be le le ba batswadi ba Beverly, nkabe le ile la dira’ng, gona ka baka la’ng?

Na o nagana gore dithibelo tšeo batswadi ba Beverly ba mo neilego tšona di be di le thata? Ge e ba go le bjalo, ke ka baka la’ng?

Beverly o be a ka dira’ng gore batswadi ba gagwe ba mmote gape?

Go Botwa Gape

Seo o ka se dirago

Go fetogela go beng motho yo mogolo yo a botegago go swana le manamelo ao o a namelago, kgato ka kgato, nywageng ya gago ka moka ya mahlalagadi

Sa pele, swaya dikarolo tšeo batswadi ba gago ba se sa go botago go tšona

  • Go boa gae ka nako e beilwego

  • Go phetha dikholofetšo tša ka

  • Go boloka nako

  • Go diriša tšhelete ka bohlale

  • Go phetha mediro ya ka gae

  • Go tsoga ka nako ka ntle le go ngongorega

  • Go hlwekiša phapoši ya ka

  • Go bolela therešo

  • Go diriša mogala goba khomphutha ka tekatekano

  • Go amogela diphošo le go kgopela tshwarelo

  • Tše dingwe

Sa bobedi, dira keno. Ipeele pakane ya go itlhatsela o botega dikarolong tšeo o di swailego. Latela keletšo ya Beibele yeo e rego: “Lahlang semelo sa kgale seo se dumelelanago le tsela ya lena ya pele ya boitshwaro.” (Baefeso 4:22) Ge nako e dutše e eya, batho ka moka, go akaretša le batswadi ba gago, ba tla bona tšwelopele ya gago.—1 Timotheo 4:15.

Sa boraro, bolela le batswadi ba gago ka seo o ikemišeditšego go se dira. Go e na le go ngongorega ka gore ba swanetše go go bota ka mo go oketšegilego, ba botšiše ka tlhompho gore ke eng seo ba naganago gore o swanetše go se dira gore ba go bote.

Temošo: O se ke wa letela gore batswadi ba gago ba fetoše dithibelo tša bona ka pela. Ka ntle le pelaelo ba tla nyaka go kgodišega gore o tla dira ka go dumelelana le dikholofetšo tša gago. Diriša nako ye bakeng sa go itlhatsela o le yo a botegago. Ge nako e dutše e eya, mo gongwe batswadi ba gago ba ka go bota ka mo go oketšegilego le go go nea tokologo e oketšegilego. Se ke se se diragaletšego Beverly yo a tsopotšwego pejana. O re: “Go thata kudu go dira gore batho ba bangwe ba go bote eupša go bonolo kudu go dira gore ba se sa go bota.” O oketša ka gore: “Ga bjale batswadi ba ka ba a mpota gomme seo se a nthabiša!”

Therešo e sa fetogego: Ge o botega kudu, le wena o tla botwa kudu.