Dipeakanyo tša go bula

Kgetha leleme

Eya go menyu wa bobedi

Eya go dikagare

Dihlatse tša Jehofa

Sepedi

BAFSA BA A BOTŠIŠA

Ke Dire’ng ge Batho ba Bangwe ba Bolela ka Nna?

Ke Dire’ng ge Batho ba Bangwe ba Bolela ka Nna?

 Lebaka leo le kwešago bohloko

Lesebo le lengwe le kotsi kudu—ka mohlala, o ka thomeletšwa e le feela gore o senywe leina. Eupša gaešita le ge lesebo leo le se kotsi, le ka kweša bohloko—kudukudu ge le dirwa ke motho yoo o bego o mo tšea e le mogwera!—Psalme 55:12-14.

“Ke ile ka hwetša gore mogwera wa ka o be a ntsheba, a re nna ga ke rate batho. Seo se ile sa nkweša bohloko! Ga ke kwešiše gore go re’ng a ka bolela selo sa mohuta wo.”—Ashley.

Therešo: Go sa šetšwe gore motho yo a go sebago ke mogwera goba go se bjalo, ga go thabiše go kwa gore batho ba bangwe ba go bolela gampe.

 Lesebo—ga se ka mehla o ka kgonago go le thibela

Batho ba ka bolela ka wena ka mabaka a mmalwa, go akaretša ao a latelago:

Ka ge ba go rata. Ka tlhago batho ba rata go bolela ka ba bangwe. Ga go makatše ge re rata go bolela le ba bangwe (le go bolela ka bona). Ge e le gabotse, Beibele e re kgothaletša gore re ‘kgahlegele’ batho ba bangwe go fihla bokgoleng bjo itšego.Bafilipi 2:4.

“Ga go selo sa go kgahliša seo o ka bolelago ka sona go feta go bolela ka batho ba bangwe!”—Bianca.

“Go bolela therešo, ke rata go tseba seo se diregago ka batho ba bangwe gomme ke bolele ka seo le ba bangwe. Ga ke tsebe gore go tlile bjang gore ke be ka tsela ye—ke fo kwa go kgahliša.”—Katie.

Ka ge ba lewa ke bodutu. Mehleng ya Beibele go be go na le batho bao ba bego ba “fetša nako ya bona ba sa dire selo ge e se go laodiša se sengwe goba go theetša selo se sengwe se sefsa.” (Ditiro 17:21) Go sa le bjalo le lehono!

“Ka dinako tše dingwe ge go sa direge selo sa go kgahliša, batho ba itlhamela dilo gore ba kgone go boledišana ka tšona.”—Joanna.

Ka ge ba inyatša. Beibele e na le mabaka a mabotse a go re lemoša ka bothata bja go ipapetša le ba bangwe. (Bagalatia 6:4) Ka maswabi, batho ba bangwe ba lwantšha go inyatša ka go seba ba bangwe.

“Gantši lesebo le lebe le go botša se sengwe ka batho bao ba le thomilego. Gantši le bolela gore ba jela motho yoo ba mo sebago mona. Ba phatlalatša mabarebare gore ba itire ba bakaone, go ikgodiša gore ba kaone go feta motho yoo.”—Phil.

Therešo: Go sa šetšwe gore o a rata goba ga o rate, batho ba tla bolela ka ba bangwe—go akaretša le wena.

 Lesebo—ga se la swanela go go šulafaletša bophelo

Ge e le gabotse, o ka se kgone go thibela gore batho ba bolele ka wena, eupša o ka kgetha tsela yeo o tlago go arabela ka yona. Ge e ba o ekwa gore go tletše mabarebare ka wena, o na le dikgetho tše pedi.

KGETHO YA PELE: A hlokomologe. Gantši go kaone gore o hlokomologe mabarebare—kudukudu ge e ba e le a bošilo. Diriša keletšo ya Beibele e rego: “O se ke wa akgofela go kgopišega moyeng, gobane go kgopišega go agile sehubeng sa ditlaela.”—Mmoledi 7:9.

“Go ile gwa tlala mabarebare a gore ke ratana le mošemane yo mongwe—le mošemane wa gona ke be ke sa mo tsebe! Taba ya gona e ile ya mpolaiša disego.”—Elise.

“Go ba le botumo bjo bobotse go kgona go lwantšha go sebja. Le ge batho ba ka go bolela gampe, ge o na le botumo bjo bobotse, ga se batho ba bantši bao ba tlago go kgolwa seo. Seo o lego sona se tla go ntšha mathateng.”—Allison.

Keletšo: Ngwala (1) seo batho ba se boletšego ka wena le (2) kamoo se dirilego gore o ikwe ka gona. Gateetee ge o se na go ‘bolela o nnoši ka pelong ya gago,’ o ka hwetša go le bonolo gore o hlokomologe taba yeo.—Psalme 4:4.

KGETHO YA BOBEDI: Boledišana le motho yoo a a thomilego. Maemong a mangwe, o ka kwa mabarebare ao a go tshwenya moo o bonago go nyakega gore o boledišane le motho yo a a thomilego.

“Ge o ka ya go batho bao ba go sebilego, ba tla lemoga gore taba ke muši ga e lale. E bile go ka dira gore le kwane gomme le rarolle bothata.”—Elise.

Pele o ka ya go motho yo a go sebilego, ela hloko melao e latelago ya motheo ya Beibele gomme o ipotšiše le dipotšišo tše di latelago.

  • “Ge motho a fetola taba pele a ka ekwa, o bontšha bošilo.” (Diema 18:13) ‘Na ke tseba ditaba ka botlalo? Na ga se gwa direga gore motho yo a mpoditšego ka lesebo le ga se a kwešiša gabotse seo a se kwelego?’

  • ‘Akgofela go kwa, o diege go bolela o be o diege go galefa.’ (Jakobo 1:19) ‘Na ruri ye ke nako e botse ya gore ke ye go motho yo a ntshebilego? Na ke kgodišegile gore ke rarolla taba ye ka tsela ya maleba? Goba na go ka se be kaone gore ke emenyana gore ke theoše maswafo?’

  • “Swarang ba bangwe ka tsela yeo le nyakago ba le swara ka yona.” (Mateo 7:12, NET Bible) ‘Ge nkabe e le nna ke sebilego motho yo, ke be ke tlo nyaka a ntshwara bjang? Ke be nka rata gore re boledišane re le boemong bofe? Ke be ke tla nyaka gore a bolele le nna bjang?’

Keletšo: Pele o boledišana le motho yo a go sebilego, ngwala seo o nyakago go se bolela. Ke moka o emenyana beke goba tše pedi, bala seo o se ngwadilego gomme o bone ge e ba o nyaka go dira diphetogo. Le gona, boledišana le motswadi wa gago goba mogwera ka seo o nyakago go se bolela gomme o kgopele maele.

Therešo: Go swana le dilo tše dingwe bophelong, ga se ka mehla o ka kgonago go laola lesebo. Eupša seo ga se bolele gore o swanetše go dumela lesebo le go šulafaletša bophelo!