Eya go dikagare

Dihlatse tša Jehofa

Kgetha leleme Sepedi

Modimo o Nyaka Gore ke Dire’ng ka Bophelo bja ka?

Modimo o Nyaka Gore ke Dire’ng ka Bophelo bja ka?

Karabo ya Beibele

Modimo o nyaka gore o mo tsebe gakaone, o be mogwera wa gagwe gomme o mo rate le go mo hlankela ka pelo ka moka. (Mateo 22:37, 38; Jakobo 4:8) O ka tseba kamoo o ka dirago thato ya Modimo ka go ithuta ka bophelo le dithuto tša Jesu. (Johane 7:16, 17) Jesu o be a sa fo bolela ka thato ya Modimo feela eupša o be a e phelela. Ge e le gabotse, Jesu o itše morero wa gagwe bophelong e be e ‘se go tlo dira thato ya gagwe, eupša go dira thato ya yo a mo romilego.’—Johane 6:38.

Na Modimo o swanetše go mpotša ka tsela ya mohlolo gore o nyaka ke dira’ng ka bophelo bja ka?

Aowa, ka gobane Beibele e na le molaetša wa Modimo wo o yago go batho. E na le seo o se nyakago e le gore o “hlangwe ka mo go feletšego bakeng sa modiro o mongwe le o mongwe o mobotse.” (2 Timotheo 3:16, 17) Modimo o nyaka gore o diriše Beibele gotee le ‘matla a gago a tlhaologanyo’ gore o ithute seo a nyakago o se dira ka bophelo bja gago.—Baroma 12:1, 2; Baefeso 5:17.

Na ruri nka kgona go dira seo Modimo a se nyakago?

Ee, o ka kgona ka gobane Beibele e re: ‘Ditaelo tša Modimo ga di boima.’ (1 Johane 5:3) Se ga se bolele gore go latela ditaelo tša Modimo go bonolo ka mehla. Eupša o tla holega kudu ge e ba o dira maiteko. Jesu o itše: “Go thaba bao ba kwago lentšu la Modimo gomme ba le boloka!”—Luka 11:28.