Dipeakanyo tša go bula

Kgetha leleme

Eya go menyu wa bobedi

Eya go dikagare

Dihlatse tša Jehofa

Sepedi

Sebe ke Eng?

Sebe ke Eng?

Seo Beibele e se bolelago

Sebe ke tiro, maikwelo goba megopolo yeo e lego kgahlanong le melao ya Modimo. Se se akaretša go roba melao ya Modimo ka go dira selo se se fošagetšego goba seo se sa lokago mahlong a gagwe. (1 Johane 3:4; 5:17) Beibele gape e bolela ka dibe tša go palelwa ke go dira se se lokilego.—Jakobo 4:17.

Malemeng a mathomo ao Beibele e bego e ngwadilwe ka wona, lentšu sebe le bolela go “foša.” Ka mohlala mašole a bogologolo Isiraeleng a be a tlwaetše go diriša diragamabje moo a bego “a sa foše.” Ge polelwana ye e ka fetolelwa ka go lebanya e be e ka bolela gore “go se dire sebe.” (Baahlodi 20:16) Ka gona go dira sebe ke go foša melao ya Modimo e phethagetšego.

Ka ge Modimo e le Mmopi, o na le tokelo ya go beela batho melao. (Kutollo 4:11) Re ikarabela go yena ka dilo tšohle tšeo re di dirago.—Baroma 14:12.

Na go a kgonega gore motho a se ke a dira sebe le gatee?

Aowa. Beibele e re “bohle ba dirile sebe gomme ba hlaelelwa ke letago la Modimo.” (Baroma 3:23; 1 Dikgoši 8:46; Mmoledi 7:20; 1 Johane 1:8) Gore’ng Beibele e bolela ka mokgwa wo?

Mathomong batho ba pele e lego Adama le Efa, ba be ba se na sebe. Se se dirwa ke gore ba bopilwe ba phethagetše, ka seswantšho sa Modimo. (Genesi 1:27) Lega go le bjalo, ba ile ba se sa phethagala ka morago ga go se theetše Modimo. (Genesi 3:5, 6, 17-19) Ge ba be ba eba le bana, ba ile ba fetišetša sebe seo le go se phethagale baneng ba bona e le bohwa. (Baroma 5:12) Go swana le ge Kgoši Dafida wa Isiraele a ile a bolela gore: “Ke belegwe gabohloko ke na le molato.”—Psalme 51:5.

Na dibe tše dingwe ke tše dikgolo go feta tše dingwe?

Ee. Ka mohlala, Beibele e re batho ba Sodoma ya bogologolo e be e le ba “babe, badiradibe ba bagolo” bao dibe tša bona di bego di le “boima kudu.” (Genesi 13:13; 18:20) Ela hloko dintlha tše tše tharo tšeo di bontšhago boima bja sebe.

  1. Bogolo. Beibele e re eletša go phema dibe tše dikgolo tše bjalo ka bootswa, go rapela medimo ya diswantšho, go utswa, botagwa, bohlakodi, go bolaya le go dirišana le meoya. (1 Bakorinthe 6:9-11; Kutollo 21:8) Beibele e bontšha phapano magareng ga dibe tše le dibe tšeo di dirwago go sa naganwa le tšeo di dirwago e se ka maikemišetšo, go swana le dipolelo goba ditiro tšeo di gobatšago ba bangwe. (Diema 12:18; Baefeso 4:31, 32) Lega go le bjalo, Beibele e re kgothaletša go se nyenyefatše sebe, ka ge se se ka dira gore motho a robe melao ya Modimo.—Mateo 5:27, 28.

  2. Maikemišetšo. Dibe tše dingwe di dirwa ka baka la go se tsebe seo Modimo a se nyakago. (Ditiro 17:30; 1 Timotheo 1:13) Le ge dibe tše bjalo di ka se lokafatšwe, Beibele e bontšha phapano magareng ga tšona le dibe tša ka boomo. (Numeri 15:30, 31) Dibe tša ka boomo di tšwa ‘pelong e mpe.’—Jeremia 16:12. 16:12.

  3. Makga ao sebe se dirwago ka wona. Beibele e dira phapano magareng ga sebe seo se dirwago gatee le sebe seo se dirwago gantši. (1 Johane 3:4-8) Bao ba ‘tlwaetšego go dira sebe ka boomo,’ gaešita le ka morago ga go ithuta go dira seo se lokilego, ba tla hwetša kahlolo e boifišago ya Modimo.—Baheberu 10:26, 27.

Bao ba dirilego dibe tše dikgolo ba ka ikwa ba imelwa ke diphošo tšeo. Ka mohlala, Kgoši Dafida o ile a ngwala gore: “Gobane melato ya ka e feta ka godimo ga hlogo ya ka; e nkimela kudu go etša morwalo o boima.” (Psalme 38:4) Lega go le bjalo Beibele e nea kholofelo e rego: “Anke motho yo kgopo a tlogele tsela ya gagwe, le yo kotsi a tlogele menagano ya gagwe; anke a boele go Jehofa yo a tlago go mo gaugela, le go Modimo wa rena ka gobane o tla mo lebalela kudu.”—Jesaya 55:7.

Ithute ka mo go oketšegilego

O ka Ganetša Teko!

O ka thušwa ke megato e meraro gore o be le boikemišetšo.

Na Modimo o tla Nthuša ge ke Rapela?

Na ruri Modimo o tshwenyegile ka mathata a rena?

Melao ya Motheo ya Beibele e re Hola Bjang?

Jesu o hlalositše lebaka leo re hlokago tlhahlo le melao ya motheo e mebedi ya Beibele yeo e lego bohlokwahlokwa.