Eya go dikagare

Eya go menyu wa bobedi

Dihlatse tša Jehofa

Sepedi

Sebata sa Mmala o Mohwibiduhwibidu Seo go Bolelwago ka Sona go Kutollo Kgaolo 17 ke Eng?

Sebata sa Mmala o Mohwibiduhwibidu Seo go Bolelwago ka Sona go Kutollo Kgaolo 17 ke Eng?

Karabo ya Beibele

Sebata sa mmala o mohwibiduhwibidu seo go bolelwago ka sona go Kutollo kgaolo 17, se swantšhetša mokgatlo wo morero wa wona e lego go kopanya ditšhaba tše dingwe le go di emela lefaseng ka moka. Mathomong mokgatlo wo o be o tsebja e le Kgwerano ya Ditšhaba eupša ga bjale ke Ditšhaba tše Kopanego.

Dilo tšeo di ka go thušago go tseba sebata sa mmala o mohwibiduhwibidu

  1. Ke mokgatlo wa dipolotiki. Sebata sa mmala o mohwibiduhwibidu se na le “dihlogo tše šupago” tšeo go thwego di swantšhetša “dithaba tše šupago” le “dikgoši tše šupago” goba mebušo. (Kutollo 17:9, 10) Dithaba le dibata gantši ka Beibeleng di swantšhetša mebušo.Jeremia 51:24, 25; Daniele 2:44, 45; 7:17, 23.

  2. Se šoma go swana le dipolotiki tša lefaseng ka moka. Sebata sa mmala o mohwibiduhwibidu se swana le sebata sa dihlogo tše šupago seo go bolelwago ka sona go Kutollo kgaolo 13, seo se swantšhetšago mekgatlo ya lefaseng ka moka ya dipolotiki. Dibata tše tše pedi di na le dihlogo tše lesome, dinaka tše lesome le maina a maroga. (Kutollo 13:1; 17:3) Go swana ga dibata tše ga se gwa no itiragalela. Sebata sa mmala o mohwibiduhwibidu se swantšhetša goba se emela mekgatlo ya dipolotiki ya lefaseng ka moka.Kutollo 13:15.

  3. Se hwetša matla mebušong e mengwe. Sebata sa mmala o mohwibiduhwibidu “se tšwa go,” goba se bile gona ka baka la mebušo e mengwe.Kutollo 17:11, 17.

  4. Se tsena ditabeng tša dikereke. Babilona o mogolo, e lego madumedi a maaka ao a lego lefaseng ka moka, o dutše godimo ga sebata sa mmala o mohwibiduhwibidu, go bontšha gore sebata se se laolwa ke madumedi.Kutollo 17:3-5.

  5. Ga se hlomphe Modimo. Sebata se se tletše “maina a maroga.”Kutollo 17:3.

  6. Se ile sa se be gona ka nakwana. Sebata sa mmala o mohwibiduhwibidu se be se tlo ba “sekoting,” * goba sa se sa ba gona, ka lebakanyana gomme sa tšwelela gape ka morago.Kutollo 17:8.

Boporofeta bja Beibele bo phethagetše

Bona kamoo mokgatlo wa Kgwerano ya Ditšhaba woo ka morago e bilego Ditšhaba tše Kopanego o ilego wa phethagatša boporofeta bja Beibele bja mabapi le sebata sa mmala o mohwibiduhwibidu.

  1. Ke mokgatlo wa dipolotiki. Mokgatlo wa Ditšhaba tše Kopanego o thekga dipolotiki ka go šireletša “Setho se sengwe le se sengwe sa mokgatlo wo.” *

  2. Se šoma go swana le dipolotiki tša lefaseng ka moka. Ka 2011, naga e nngwe e ile ya ingwadiša mokgatlong wa Ditšhaba tše Kopanego, gomme mokgatlo wo wa ba le dinaga tše 193. Ka baka leo, o ipolela gore o emela dinaga tše dintši kudu lefaseng.

  3. Se hwetša matla mebušong e mengwe. Gore mokgatlo wa Ditšhaba tše Kopanego o be gona, ke ka baka la dinaga tšeo di lego ka tlase ga wona le gona ke tšona di o neago matla.

  4. Se tsena ditabeng tša dikereke. Mokgatlo wa Kgwerano ya Ditšhaba le wa Ditšhaba tše Kopanego e be e dutše e thekgwa ke madumedi a lefaseng ka moka. *

  5. Ga se hlomphe Modimo. Mokgatlo wa Ditšhaba tše Kopanego o hlametšwe gore “go dule go na le khutšo le polokego lefaseng ka moka.” * Le ge go ka bonagala eka go dira se ke taba e botse kudu, ge e le gabotse mokgatlo wo ga o hlomphe Modimo ka gobane o nyaka go dira selo seo Modimo a boletšego gore ke Mmušo wa gagwe feela wo o ka kgonago go se dira.Psalme 46:9; Daniele 2:44.

  6. Se ile sa se be gona ka nakwana. Ka morago ga Ntwa ya Pele ya Lefase, Kgwerano ya Ditšhaba e ile ya hlongwa gore go be le khutšo, eupša e ile ya palelwa ke go thibela kgalefo yeo batho ba bego ba na le yona lefaseng ka moka. E ile ya se sa šoma ge Ntwa ya Bobedi ya Lefase e thoma ka 1939. Ka 1945, ka morago ga gore Ntwa ya Bobedi ya Lefase e fele, go ile gwa hlongwa mokgatlo wa Ditšhaba tše Kopanego. Morero wa wona, mekgwa le tsela yeo o hlamilwego ka yona, di swana kudu le tša Kgwerano ya Ditšhaba.

^ par. 10 Go ya ka Vine’s Expository Dictionary of Old and New Testament Words, lentšu la Segerika leo le fetoletšwego e le “sekoting” le ra gore “mokoti wo o ka se lekanywego.” King James Version e fetoletše lentšu leo e le “mokoti wo o se nago mafelelo.” Ka Beibeleng lentšu le le šupa go lefelo goba boemo bjo bo swanago le ge motho a golegilwe e bile a ka se kgone go dira selo.

^ par. 13 Bala Article 1 ya Charter of the United Nations.

^ par. 16 Ka mohlala, ka 1918 lekgotla leo le bego le emela Maprotestanta a mantši kua Amerika, le ile la bolela gore Kgwerano ya Ditšhaba e be e tlo ba “mokgatlo wa dipolotiki wo o emelago mmušo wa Modimo mo lefaseng.” Ka 1965, baemedi ba bodumedi bja Mabuddha, Makatholika, bo-Orthodox bja ka Bohlabela, Mahindu, Mamoseleme, bodumedi bja Sejuda le Maprotestanta ba ile ba kopana kua San Francisco go thekga le go rapelela Ditšhaba tše Kopanego. Go oketša moo, ka 1979 Mopapa John Paul wa Bobedi o ile a bolela gore mokgatlo wa Ditšhaba tše Kopanego “e tla dula e le mokgatlo o mogolo wa go lwela gore go be le khutšo le toka.”

^ par. 17 Bala Article 2 ya Charter of the United Nations.