Karabo ya Beibele

‘Puku ya bophelo,’ yeo gape e bitšwago “lengwalo la go phuthwa la bophelo” goba “puku ya kgopotšo,” e na le maina a batho bao ba tlago go hwetša mpho ya bophelo bjo bo sa felego. (Kutollo 3:5; 20:12; Maleaki 3:16) Modimo o kgetha maina ao go ithekgile ka gore motho yoo o kwa melao ya gagwe.—Johane 3:16; 1 Johane 5:3.

Modimo o gopola yo mongwe le yo mongwe wa bahlanka ba gagwe ba botegago, bjalo ka ge eka o ngwadile maina a bona ka pukung, ga e sa le go tloga “go theweng ga lefase” la batho. (Kutollo 17:8) Go bonagala monna yo a botegago e lego Abele e bile motho wa mathomo yoo leina la gagwe le ilego la ngwalwa ka pukung ya bophelo. (Baheberu 11:4) Lega go le bjalo, puku ya bophelo ga e fo ba lelokelelo la maina, ka gobane e re bontšha gore Jehofa ke Modimo yo lerato yoo ‘a tsebago ba gagwe.’—2 Timotheo 2:19; 1 Johane 4:8.

Na maina a ka phumolwa ka “pukung ya bophelo”?

Ee. Modimo o boletše ka batho bao ba bego ba sa kwe ba Isiraele ya bogologolo gore: “Mang le mang yo a ntiretšego sebe ke tla mo phumola pukung ya ka.” (Ekisodo 32:33) Eupša ge e ba re botega, maina a rena a tla dula a le ka ‘lengwalong la go phuthwa la bophelo.’—Kutollo 20:12.