Eya go dikagare

Eya go menyu wa bobedi

Dihlatse tša Jehofa

Sepedi

Na Nako ya Rena ya go Hwa e Rulagantšwe e sa le Pele?

Na Nako ya Rena ya go Hwa e Rulagantšwe e sa le Pele?

Karabo ya Beibele

Aowa, ga re na nako e rulagantšwego ya go hwa. Go e na le go thekga tumelo yeo ya tlholelo, Beibele e re lehu gantši le tlišwa ke “ditiragalo tšeo di sa letelwago.”—Mmoledi 9:11.

Na Beibele ga e bolele gore go na le “nako ya go hwa”?

Ee, Mmoledi 3:2 e re: “Go na le nako ya go tswalwa le nako ya go hwa; nako ya go bjala le nako ya go tumola se se bego se bjetšwe.” Lega go le bjalo, taba yeo e dikologilego temana ye e bontšha gore Beibele e hlalosa medikologo e tšwelago pele yeo e tlwaelegilego ya bophelo. (Mmoledi 3:1-8) Modimo ga se a rulaganya nako ya rena ya go hwa go etša ge eka o gapeletša molemi go bjala ka nako e itšego. Go e na le moo, sa bohlokwa ke gore re swanetše go phema go swarega ka dilo tšeo di sego bohlokwa gomme ra hlokomologa Mmopi wa rena.—Mmoledi 3:11; 12:1, 13.

Re ka phela nako e telele

Go sa šetšwe maemo a bophelo a sa tsepamago, ka dinako tše dingwe re ka phela nako e teletšana ge e ba re dira diphetho tše bohlale. Beibele e re: “Molao wa yo bohlale ke mothopo wa bophelo, gore o efoše motho melabeng ya lehu.” (Diema 13:14) Ka mo go swanago, Moshe o boditše Baisiraele gore ba be ba ka phela ‘matšatši a matelele’ ge e ba ba ka lota ditaelo tša Modimo. (Doiteronomio 6:2) Ka mo go fapanego, ka go se šetše re ka fokotša matšatši a rena a bophelo ka ditiro tše mpe goba tšeo e sego tše bohlale.—Mmoledi 7:17.

Go sa šetšwe gore re bohlale goba re šedi gakaaka’ng, re ka se tšhabele lehu. (Baroma 5:12) Lega go le bjalo, boemo bjo bo tla fetoga, ka ge Beibele e holofetša gore “lehu le ka se hlwe le sa ba gona.”—Kutollo 21:4.