Karabo ya Beibele

Aowa, ga se ra swanela go rapela diswantšho. Ge New Catholic Encyclopedia e hlalosa melao yeo Modimo a e neilego setšhaba sa Isiraele, e re: “Go tšwa go dipego tše di fapafapanego tša Beibele, go molaleng gore borapedi bja therešo bja Modimo ga bo diriše diswantšho.” Ela hloko ditemana tše tša Beibele:

  • “O se ke wa itirela seswantšho se se betlilwego goba sebopego sa selo seo se swanago le selo le ge e le sefe seo se lego godimo magodimong goba seo se lego tlase lefaseng goba seo se lego ka meetseng ka tlase ga lefase. O se ke wa di khunamela goba wa gokeletšwa go di hlankela, gobane nna Jehofa Modimo wa gago ke Modimo yo a nyakago boineelo bjo bo feletšego.” (Ekisodo 20:4, 5) Ka ge Modimo a nyaka “boineelo bjo bo feletšego,” ga a kgahlišwe ke ge re mo rapela ka diswantšho, medingwana, dihlwadieme goba maswao.

  • “Nka se abelane tumišo ya ka le diswantšho.” (Jesaya 42:8, Easy-to-Read Version) Modimo o hloile bao ba mo rapelago ka diswantšho. Ge ba bangwe ba Baisiraele ba be ba leka go mo rapela ka seswantšho sa namane, Modimo o ile a re ba dirile “sebe se se šišimišago.”—Ekisodo 32:7-9, Easy-to-Read Version.

  • “Ga se ra swanela go nagana gore Modimo o swana le gauta, silifera goba leswika, go swana le selo se se betlilwego ka bokgabo le go thalwa ke motho.” (Ditiro 17:29) Ka go se swane le borapedi bja boheitene, bjoo gantši bo dirišago diswantšho tšeo di “betlilwego ka bokgabo le go thalwa ke motho,” Bakriste ba swanetše go “sepela ka tumelo, e sego ka go bona,” go etša ge Beibele e bolela.—2 Bakorinthe 5:7.

  • “Itišeng go medingwana.” (1 Johane 5:21) Taelong yeo e neilwego setšhaba sa Isiraele le Bakriste, Beibele e pepentšha maaka a thuto ya gore Modimo o dumela re mo rapela ka diswantšho le maswao a bodumedi.