Dipeakanyo tša go bula

Kgetha leleme

Eya go menyu wa bobedi

Eya go dikagare

Dihlatse tša Jehofa

Sepedi

Na Modimo o Gona?

Na Modimo o Gona?

Karabo ya Beibele

Ee, o gona, Beibele e nea bohlatse bjo bo kgodišago bja gore Modimo o gona. E re kgothaletša go ba le tumelo go Modimo, e sego ka go fo dumela dipolelo tša bodumedi, eupša ka go diriša ‘matla a rena a tlhaologanyo.’ (Baroma 12:1; 1 Johane 5:20) Ela hloko dintlha tše di latelago tšeo di neago mabaka a theilwego Beibeleng:

  • Go ba gona ga legohle leo le rulagantšwego gabotse leo go phelwago go lona go bontšha gore go na le Mmopi. Beibele e re: “Ke therešo gore ntlo e nngwe le e nngwe e agwa ke motho, eupša yo a agilego dilo ka moka ke Modimo.” (Baheberu 3:4) Le ge taba ye e kwagala e bile e le bonolo, batho ba bantši bao ba rutegilego ba hwetša mantšu a a le matla. *

  • Ka ge re le batho, re na le kganyogo e tseneletšego ya go kwešiša morero wa bophelo, e lego mohuta wa tlala woo o dulago o le gona le ge re kgotsofaditše dinyakwa tša rena tša nama. Se ke seo Beibele e se bitšago go “nyaka dilo tša moya,” gomme se se akaretša kganyogo ya go tseba le go rapela Modimo. (Mateo 5:3; Kutollo 4:11) Go nyaka go tseba ga rena Modimo ke bohlatse bja gore o gona e bile go laetša gore ke Mmopi yo lerato yo a nyakago gore re kgotsofatše senyakwa seo.—Mateo 4:4.

  • Beibele e na le diporofeto tšeo di ilego tša ngwalwa mengwaga e makgolo e sa le pele gomme tša phethega ka mokgwa wo di boletšwego ka gona. Go nepagala ga yona le ditaba ka botlalo tša mabapi le diporofeto tše go bontšha gore di be di etšwa mothopong o phagamego.—2 Petro 1:21.

  • Modimo o be a file bangwadi ba Beibele tsebo ka ditaba tša thutamahlale tšeo di bego di sa kwešišwe ke batho ba mehleng ya bona. Ka mohlala, mehleng ya bogologolo batho ba bantši ba be ba dumela gore lefase le thekgilwe ke diphoofolo tša bjalo ka tlou, kolobe ya naga goba pholo. Go fapana le seo, Beibele e re Modimo o ‘fegile lefase lefeeleng.’ (Jobo 26:7) Ka mo go swanago, Beibele ka mo go nepagetšego e hlalosa sebopego sa lefase e le ntikodiko goba nkgokolo. (Jesaya 40:22) Batho ba bantši ba nagana gore tlhaloso e kwagalago ya gore bangwadi ba Beibele ba kwešiše ditaba tše ke gore ba hweditše tsebišo yeo go Modimo.

  • Beibele e araba dipotšišo tše dintši tše thata, tšeo ge e ba di sa arabje ka tsela e kgotsofatšago di ka dira gore motho e be moilamodimo. Ka mohlala: Ge e ba Modimo a na le lerato gomme a na le matla, ke ka baka la’ng a dumelela tlaišego le bokgopo lefaseng? Ke ka baka la’ng bodumedi bo tutuetša dilo tše mpe go e na le tše dibotse?—Tito 1:16.

^ par. 4 Ka mohlala, setsebi sa dinaledi e lego Allan Sandage o ile a bolela se mabapi le legohle, o itše: “Ke hwetša e le mo go belaetšago kudu gore thulaganyo e bjalo ya legohleng e tšweletše tlhakatlhakanong. Go swanetše go ba go na le mothopo o mogolo wa thulaganyo. Go nna Modimo ga a hlalosege, eupša ke tlhaloso ya mohlolo wa go ba gona ga dilo, lebaka leo ka lona go nago le selo se itšego go e na le gore go se be le selo.”

Ithute ka mo go oketšegilego

Therešo ke Efe ka Modimo?

Na o nagana gore Modimo o tshwenyegile ka wena? Ithute ka semelo sa gagwe le kamoo o ka batamelago kgaufsi le yena.

“Ke Kgodišegile Gore go na le Mmopi”

Frédéric Dumoulin o be a selekišitšwe ke bodumedi gomme a ba moilamodimo. Go ithuta Beibele le kamoo diphedi di hlamilwego ka gona go mo kgodišitše bjang gore go na le Mmopi?