Eya go dikagare

Eya go menyu wa bobedi

Dihlatse tša Jehofa

Sepedi

Na Mokriste o Swanetše go ya Ngakeng?

Na Mokriste o Swanetše go ya Ngakeng?

Karabo ya Beibele

Ee. Jesu o ile a šišinya gore balatedi ba gagwe ba ka tsoma kalafo ge a be a re: “Batho ba ba phetšego gabotse ga ba nyake ngaka, eupša ba babjago ba a e nyaka.” (Mateo 9:12) Le ge Beibele e se puku ya tša kalafo, e nea melao ya motheo go hlahla bao ba nyakago go kgahliša Modimo.

Seo o ka ipotšišago sona

1. Na ke kwešiša mohuta wa kalafo yeo ngaka e nyakago go nnea yona? Beibele e re eletša ka gore re nyakišiše tsebišo e ka botwago go e na le go fo “dumela mantšu ka moka.”—Diema 14:15.

2. Na ke swanetše go kwa gore dingaka tše dingwe tše pedi goba tše tharo di re’ng ka mohuta wo wa kalafo? Go ba le “baeletši ba bantši” ke ga bohlokwa ge e ba o babja kudu.—Diema 15:22.

3. Na mohuta wo wa kalafo o thulana le taelo ya Modimo ya go “ila . . . madi”?—Ditiro 15:20.

4. Na ngaka yeo ke yago go yona e hlahloba le go alafa ka go dirišana le meoya e mebe? Beibele e iletša “go dirišana le meoya e mebe.” (Bagalatia 5:19-21) Go bona ge e ba ngaka e dirišana le meoya e mebe, ipotšiše dipotšišo tše di swanago le tše:

  • Na ngaka e botšiša meoya e mebe?

  • Na ngaka e re bolwetši bja gago bo bakilwe ke badimo bao ba galefilego goba o loilwe ke manaba a gago?

  • Na e diriša dihlabelo, dipolelo tša maleatlana goba metlwae e mengwe ya go dirišana le meoya e mebe goba dilo tša mohuta woo ge e lokišeletša dihlare?

5. Na ke tshwenyegile ka mo go sa hlokagalego ka boemo bja ka bja tša maphelo? Beibele e eletša ka gore: “Anke go lekalekana ga lena go tsebje bathong bohle.” (Bafilipi 4:5) Go ba yo a lekalekanego go tla go thuša gore o tshwenyege ka “dilo tše bohlokwa kudu,” tše bjalo ka dilo tša moya.—Bafilipi 1:10; Mateo 5:3.