Dipeakanyo tša go bula

Kgetha leleme

Eya go menyu wa bobedi

Eya go dikagare

Dihlatse tša Jehofa

Sepedi

Na Modimo o tla Ntshwarela?

Na Modimo o tla Ntshwarela?

Seo Beibele e se bolelago

Ee, Modimo o tla go swarela ge e ba o gata megato e swanetšego. Beibele e re Modimo o “ikemišeditše go lebalela” e bile o “lebalela kudu.” (Nehemia 9:17; Psalme 86:5; Jesaya 55:7) Ge Modimo a re swarela, o dira seo ka mo go feletšego. Dibe tša rena di a ‘phumolwa.’ (Ditiro 3:19) Modimo o re: “Nka se sa gopola sebe sa bona.” (Jeremia 31:34) Ge a re swaretše, ga a re gopotše dibe tša rena e le gore a re otlele tšona.

Lega go le bjalo, go swarela ga Modimo ga se seka sa gore o a fokola. Ga a ke a fetola melao ya gagwe e lokilego. Ka baka leo, dibe tše dingwe ga a di swarele.—Joshua 24:19, 20.

Seo o ka se dirago gore Modimo a go swarele

  1. Lebelela sebe sa gago e le go roba melao ya Modimo. Lege ba bangwe ba ka kwešwa bohloko ke seo o se dirilego, sa pele o swanetše go gopola gore ge e le gabotse o senyeditše Modimo.Psalme 51:1, 4; Ditiro 24:16

  2. Ipolele dibe go Modimo ka thapelo.Psalme 32:5; 1 Johane 1:9.

  3. O swanetše go nyamišwa ke sebe sa gago. Ka gobane “go nyama ka tsela ya Modimo” go lebiša boitsholong, goba go dira gore o sokologe. (2 Bakorinthe 7:10) Go akaretša go itsholela dilo tšeo di dirilego gore o dire sebe.Mateo 5:27, 28.

  4. Tlogela mokgwa wa gago, ke gore, o “sokologe.” (Ditiro 3:19) Se se ra gore o swanetše go phema go dira sebe se se swanago gantši, goba o tla swanelwa ke fetoša monagano wa gago le tsela yeo o dirago dilo ka yona.Baefeso 4:23, 24.

  5. Tšea megato ya go lokiša tshenyo yeo o e bakilego. (Mateo 5:23, 24; 2 Bakorinthe 7:11) Kgopela batho bao o ba kwešitšego bohloko tshwarelo ke moka o dire sohle seo o ka se kgonago go lokiša boemo.—Luka 19:7-10.

  6. Rapela Modimo gore a go swarele motheong wa topollo ya Jesu. (Baefeso 1:7) O swanetše go swarela bao ba go senyeditšego e le gore thapelo ya gago le yona e arabje.—Mateo 6:14, 15

  7. Ge e ba sebe sa gago e le se segolo, boledišana le motho yo a swanelegago gore a go thuše ka mangwalo a Beibele le go go rapelela.Jakobo 5:14-16.

Pono e fošagetšego mabapi le go swarelwa ke Modimo

Modimo o ile a swarela Dafida sebe sa bootswa le go bolaya

“Ke sentše kudu gore nka swarelwa.”

Ge e ba re latela ditaelo tšeo re filwego tšona ka Biebeleng, Modimo o tla re swarela ka gobane tsela yeo a swarelago ka yona ke e kgolo kudu e bile e feta dibe tša rena. O kgona go swarela dibe tše dikgolo le tšeo di dirilwego gantši.Diema 24:16; Jesaya 1:18.

Ka mohlala, Kgoši Dafida wa Isiraele o ile a swarelwa sebe sa bootswa le go bolaya. (2 Samuele 12:7-13) Moapostola Paulo yoo le yena a bego a nagana gore ke modiradibe wa mafelelo mo lefaseng le yena o ile a swarelwa. (1 Timotheo 1:15, 16) Gaešita le Bajuda ba bogologolo bao ba ilego ba bolaya Jesu, e lego Mesia, Modimo o ile a ba swarela ge ba be ba fetola ditsela tša bona.Ditiro 3:15, 19.

“Ge e ba nka ipolela go moruti, dibe tša ka di tla phumolwa.”

Ga go na motho yoo a nago le matla a go lebalela dibe tša motho yo mongwe tšeo a di diretšego Modimo. Le ge go ipolela go motho yo mongwe go dira gore o ikwe o le kaone, ke Modimo feela yoo a ka swarelago dibe.Baefeso 4:32; 1 Johane 1:7, 9.

Ge e ba go le bjalo, Jesu o be a reng ge a be a botša baapostola ba gagwe gore: “Ge e ba le lebalela batho dibe, ba lebaletšwe tšona; ge e ba le sa ba lebalele, ga ba di lebalelwe”? (Johane 20:23) O be a hlalosa matla a moswananoši ao a bego a tla a nea baapostola ge ba be ba hwetša moya o mokgethwa.Johane 20:22.

Go etša ge a holofeditše, baapostola ba ile ba hwetša mpho yeo ge moya o mokgethwa o be o tšhollelwa go bona ka 33 C.E. (Ditiro 2:1-4) Moapostola Petro o ile a diriša matla ao ge a be a ahlola Ananiase le Safira. Ka mohlolo Petro o ile a kgona go tseba ka leano la bona le lebe, gomme kahlolo ya gagwe e be e bontšha gore sebe sa bona se be se ka se swarelwe.—Ditiro 5:1-11.

Mpho yeo ya mohlolo ya moya o mokgethwa go swana le ya go fodiša le go bolela ka maleme, e ile ya fela ka morago ga lehu la baapostola.—1 Bakorinthe 13:8-10. Ka go re’alo, ga gona motho yoo lehono a ka phumolago dibe tša motho yo mongwe.

Ithute ka mo go oketšegilego

Thapelo—Seo e ka go Direlago Sona

O ka letela’ng ge e ba o itlwaetša go rapela ka mehla?

O ka Batamela Kgauswi le Modimo Bjang?

Tseba ge e ba Modimo a theetša dithapelo ka moka, re swanetše go rapela bjang, le gona ke eng seo re ka se dirago go batamela kgauswi le Modimo.