Eya go dikagare

Eya go menyu wa bobedi

Dihlatse tša Jehofa

Sepedi

Na Modimo o Gohle?

Na Modimo o Gohle?

Karabo ya Beibele

Modimo o kgona go bona dilo ka moka le go gata mogato le ge e le kae moo a nyakago. (Diema 15:3; Baheberu 4:13) Lega go le bjalo, Beibele ga e rute gore Modimo o gohle goba o gona le dilong tšohle. Go e na le moo, e re ruta gore ke Modimo yo a phelago le gore o na le moo a dulago gona.

  • Sebopego sa Modimo: Modimo ke moya. (Johane 4:24) Batho ba ka se kgone go mmona. (Johane 1:​18) Dipono tša mabapi le Modimo tšeo di lego ka Beibeleng ka mehla di bolela ka yena a le lefelong le itšego. Le ka mohla ga go bolelwe ka yena a le gohle.—Jesaya 6:1, 2; Kutollo 4:2, 3, 8.

  • Moo Modimo a dulago gona: Modimo o dula lefelong la moya, leo le diretšwego dibopiwa tša moya. Lefelong leo, Modimo o na le ‘lefelo leo a dulago go lona magodimong.’ (1 Dikgoši 8:30) Beibele e bolela gore nakong e nngwe dibopiwa tša moya ‘di ile tša tla tša ema pele ga Jehofa,’ * e lego seo se bontšhago gore ge e le gabotse Modimo o na le moo a dulago gona.​—Jobo 1:6.

Ge e ba Modimo a se gohle, na ruri a ka ba le taba le nna?

Ee. Modimo o tloga a na le taba le yo mongwe le yo mongwe wa rena. Le ge Modimo a dula lefelong la moya, o kgona go bona batho ka moka mo lefaseng bao ba tlogago ba nyaka go mo kgahliša gomme o a ba thuša. (1 Dikgoši 8:39; 2 Dikoronika 16:9) Jehofa o bontšha gore o na le taba le batho ba gagwe ka ditsela tše di latelago:

  • Ge o rapela: Jehofa o kgona go kwa thapelo ya gago ka nako yona yeo o mo rapelago.​—2 Dikoronika 18:31.

  • Ge o gateletšegile: “Jehofa o kgauswi le ba dipelo tše di robegilego; O phološa ba meoya e nyamilego o šoro.”—Psalme 34:18.

  • Ge o nyaka tlhahlo: Jehofa o “tla dira gore o be le temogo gomme [a] go ruta” a diriša Lentšu la gagwe, e lego Beibele.​—Psalme 32:8.

Maaka a mabapi le gore Modimo o gohle

Maaka: Modimo o gohle tlholong.

Therešo: Modimo ga a dule lefaseng, le gona ga a dule legohleng leo re le bonago. (1 Dikgoši 8:27) Ke therešo gore dinaledi le tlholo e nngwe di “bolela ka letago la Modimo.” (Psalme 19:1) Lega go le bjalo, Modimo ga a dule tlholong ya gagwe go swana le ge mothadi wa diswantšho a sa dule diswantšhong tšeo a di thadilego. Eupša, seswantšho se ka re botša dilo tše itšego ka motho yo a se thadilego. Ka mo go swanago, tlholo e re botša ka ‘dika tše di sa bonagalego’ tša Mmopi, tše bjalo ka matla a gagwe, bohlale le lerato.​—Baroma 1:20.

Maaka: Modimo o swanetše go ba gohle gore a tsebe dilo ka moka le go ba Ramatlaohle.

Therešo: Moya o mokgethwa wa Modimo ke matla a gagwe a šomago. Modimo a ka diriša moya wa gagwe o mokgethwa go dira selo le ge e le sefe, le ge e le kae, ka nako le ge e le efe, go sa hlokagale gore a be moo ka boyena.​—Psalme 139:7.

Maaka: Psalme 139:8 e ruta gore Modimo o gona gohle ge e re: “Ge e ba nka rotogela legodimong, o tla ba o le moo; le ge nka ala bolao bja ka Bodulabahu, le gona moo o tla ba gona.”

Therešo: Lengwalo le ga le bolele ka lefelo leo Modimo a lego go lona. Le re botša ka tsela ya theto gore ga go na lefelo leo le lego kgole kudu gore Modimo a ka palelwa ke go re šireletša.

^ par. 5 Jehofa ke leina la Modimo leo le lego ka Beibeleng.