Eya go dikagare

Eya go menyu wa bobedi

Dihlatse tša Jehofa

Sepedi

Na Mmušo wa Modimo o ka Pelong ya Motho?

Na Mmušo wa Modimo o ka Pelong ya Motho?

Karabo ya Beibele

Aowa, Mmušo wa Modimo ga se boemo bjo bo lego ka dipelong tša Bakriste. * Beibele e hlalosa lefelo la kgonthe la wona ka go o bitša gore ke “Mmušo wa magodimo.” (Mateo 4:17) Ela hloko kamoo Beibele e bontšhago gore mmušo wo ke yona pušo ya kgonthe yeo e bušago e le legodimong.

Beibele ga e rute gore Mmušo wa magodimo o ka pelong ka kgopolo ya gore o buša ka gare ga pelo ya motho. Lega go le bjalo, e bontšha gore “lentšu la Mmušo” goba “ditaba tše tše dibotse tša Mmušo” di ka kgoma e bile di swanetše go kgoma dipelo tša rena.—Mateo 13:19; 24:14.

Polelwana e rego “Mmušo wa Modimo o gare ga lena” e bolela’ng?

Batho ba bangwe ba ile ba gakantšhwa ke lefelo leo Mmušo wo o lego go lona ka baka la tsela yeo Luka 17:21 e fetoletšwego ka yona diphetolelong tše dingwe tša Beibele. Ka mohlala, Beibele ya Sepedi e re “mmušô wa Modimo o ka mo teng xa lena.” E le gore re kwešiše temana ye ka tsela ya maleba, re swanetše go hlahloba mantšu a dikologilego taba ye.

Mmušo wa Modimo o be o se ka dipelong tša baganetši bao e lego babolayi le bao ba nago le dipelo tše thata

Jesu o be a bolela le Bafarisei, e lego sehlopha sa baetapele ba bodumedi bao ba bego ba mo ganetša le bao ba bego ba rera go mmolaya. (Mateo 12:14; Luka 17:20) Na ke mo go kwagalago go nagana gore Mmušo wo e be e le boemo bjo bo bego bo le ka dipelong tša bona tše thata? Jesu o ba boditše gore: “Ka gare le tletše boikaketši le go hloka molao.”—Mateo 23:27, 28.

Diphetolelo tše dingwe di hlalosa ka mo go nepagetšego mantšu a Jesu a lego go Luka 17:21 ka gore: “Mmušo wa Modimo o na le lena.” (Mongwalo o sekamego ke wa rena; Contemporary English Version) Phetolelo ya Lefase le Lefsa e re “Mmušo wa Modimo o gare ga lena.” Mmušo wa magodimo o be “o na le” Bafarisei bao goba o le “magareng” ga bona, ka kgopolo ya gore Jesu, yena yo a bego a kgethilwe ke Modimo gore e be Kgoši, o be a na le bona.—Luka 1:32, 33.

^ ser. 3 Dikereke tše dintši tša Bakriste di ruta gore Mmušo wa Modimo o ka gare ga motho goba o ka pelong ya gagwe. Ka mohlala, kua United States, kereke ya Southern Baptist Convention e boletše gore Mmušo wa Modimo ke “pušo ya Modimo ka pelong le bophelong bja motho.” Ka mo go swanago, Mopapa Benedict XVI pukung ya gagwe ya Jesus of Nazareth, o boletše gore “Mmušo wa Modimo o tla ka pelo e theetšago.”

Ithute ka mo go oketšegilego

DIPOTŠIŠO TŠA BEIBELE DI A ARABJA

Mmušo wa Modimo ke Eng?

Ela hloko lebaka leo ka lona mmušo wa Modimo o phagametšego mebušo e mengwe ka moka.