Eya go dikagare

Eya go menyu wa bobedi

Dihlatse tša Jehofa

Sepedi

Legodimo ke Eng?

Legodimo ke Eng?

Karabo ya Beibele

Ka Beibeleng lentšu “legodimo” le hlaloswa ka ditsela tše tharo, e lego (1) magodimo a kgonthe; (2) lefelo la moya; (3) le go swantšhetša boemo bjo bo phagamego goba bolaodi. Gore o tsebe gore go bolelwa ka legodimo lefe, o tla thušwa ke ditemana tšeo di dikologilego taba yeo o e balago. *

  1. Magodimo a kgonthe. “Magodimo” a ke ao re šupago go ona ge re le mo lefaseng, moo go fokago phefo, go fofago dinonyana, go nago le maru a nešago pula goba lehlwa le moo magadima a bonagalago. (Psalme 78:26; Diema 30:19; Jesaya 55:10; Luka 17:24) Le gona a ka šupa moo go lego “letšatši, kgwedi le dinaledi.”Doiteronomio 4:19; Genesi 1:1.

  2. Lefelo la moya. Lentšu “legodimo” gape le ka šupa go lefelo la moya goba moo go dulago dibopiwa tša moya, e lego lefelo leo le phagametšego kudu legohle la rena. (1 Dikgoši 8:27; Johane 6:38) Legodimong le, go dula Jehofa yo e lego “Moya” gomme o dula le dibopiwa tša gagwe tša moya e lego barongwa. (Johane 4:24; Mateo 24:36) Ka dinako tše dingwe, “magodimo” a ka mothofatšwa gomme a šupa go barongwa bao ba botegago, e lego ‘phuthego ya bakgethwa.’Psalme 89:5-7.

    Le gona Beibele e diriša “magodimo” go šupa ka go lebanya karolo e nngwe ya lefelo la moya moo Jehofa a dulago gona, e lego ‘lefelo la gagwe la bodulo.’ (1 Dikgoši 8:43, 49; Baheberu 9:24; Kutollo 13:6) Ka mohlala, Beibele e boletše e sa le pele gore Sathane le batemona ba gagwe ba be ba tla rakwa legodimong, ba se sa dumelelwa go tsena lefelong la Jehofa la bodulo. Lega go le bjalo, Sathane le batemona ba gagwe e sa le dibopiwa tša moya.Kutollo 12:7-9, 12.

  3. Go swantšhetša boemo bjo bo phagamego goba bolaodi. Mangwalo a diriša “legodimo” go swantšhetša maemo a phagamego, kudukudu matla a motho a bolaodi. Maemo ao e ka ba a:

Legodimong go bjang?

Legodimong go dirwa mediro e mentši kudu. Go na le barongwa ba dimilione tše dikete ‘bao ba phethago lentšu la Jehofa.’Psalme 103:20, 21; Daniele 7:10.

Beibele e hlalosa gore legodimong go na le seetša se segolo. (1 Timotheo 6:15, 16) Moporofeta Hesekiele o ile a bona pono ya legodimo leo le ‘phadimago,’ Daniele yena o bone pono ya legodimo leo le nago le “molapo wa mollo.” (Hesekiele 1:26-28; Daniele 7:9, 10) Legodimo ke le lekgethwa, goba le hlwekile le gona ke le lebotse.Psalme 96:6; Jesaya 63:15; Kutollo 4:2, 3.

Beibele e hlalosa legodimo ka tsela e kgahlišago le e boifišago. (Hesekiele 43:2, 3) Lega go le bjalo, ga go kgonege gore batho ba kwešiše legodimo ka botlalo, ka ge re sa bopelwa gore re le kwešiše.

^ par. 3 Lentšu la Seheberu leo le fetoletšwego e le “legodimo” go bonagala le etšwa modung wa lentšu “phagamego,” goba “godimodimo.” (Diema 25:3) Bala puku ya The New Brown, Driver, Briggs Hebrew and English Lexicon of the Old Testament, go letlakala 1029.

^ par. 9 Cyclopedia yeo e ngwadilwego ke McClintock le Strong e hlalosa gore magodimo a mafsa ao go bolelwago ka ona go Jesaya 65:17 a emela “pušo e mpsha, e lego mmušo o mofsa.”—Bolumo IV, letlakala 122.

Ithute ka mo go oketšegilego

DIPOTŠIŠO TŠA BEIBELE DI A ARABJA

Ke Bomang Bao ba Yago Legodimong?

Batho ba tlwaetše go bolela maaka a gore batho ka moka bao ba lokilego ba ya legodimong. Ke eng seo ge e le gabotse Beibele e se rutago?

DIPOTŠIŠO TŠA BEIBELE DI A ARABJA

Hele ke Eng? Na ke Moo Batho ba Tlaišetšwago sa Ruri?

Na badiradibe ba otlwa mollong wa dihele? Na hele ke moputso wa sebe? Bala Mangwalo gore o hwetše dikarabo tša dipotšišo tše.