Eya go dikagare

Eya go menyu wa bobedi

Dihlatse tša Jehofa

Sepedi

Ke Bomang Bao ba Yago Legodimong?

Ke Bomang Bao ba Yago Legodimong?

Karabo ya Beibele

Modimo o kgethile palo e itšego ya Bakriste ba botegago bao ka morago ga gore ba hwe ba tlago go tsošetšwa go phela legodimong. (1 Petro 1:3, 4) Ge ba šetše ba kgethilwe, ba swanetše go dula ba itshwere gabotse gore ba swanelege go ya legodimong.—Baefeso 5:5; Bafilipi 3:12-14.

Bao ba yago legodimong ba yo dira’ng moo?

Ba tla hlankela le Jesu e le dikgoši le baperisita mengwaga e 1 000. (Kutollo 5:​9, 10; 20:6) Ba tla ba karolo ya “magodimo a mafsa” goba mmušo wa legodimong woo o tlago go buša “lefase le lefsa” goba batho. Dikgoši tšeo tša legodimong di tla thuša batho go boela boemong bjo bobotse bjoo Modimo a bego a bo rerile go tloga mathomong.—Jesaya 65:17; 2 Petro 3:13.

Ke batho ba bakae bao ba tlago go tsošetšwa go yo phela legodimong?

Beibele e re ke batho ba 144 000 feela bao ba tlago go tsošetšwa go yo phela legodimong. (Kutollo 7:4) Moapostola Johane ponong ya gagwe yeo e ngwadilwego go Kutollo 14:1-3, o ile a bona “Kwana e eme Thabeng ya Tsione e na le ba dikete tše lekgolo-masomenne-nne (144 000).” Ponong ye, “Kwana” e emela Jesu yo a tsošitšwego bahung. (Johane 1:29; 1 Petro 1:19) ‘Thaba ya Tsione’ yona e swantšhetša maemo a phagamego a Jesu le ba 144 000 bao ba tlago go buša le yena legodimong.—Psalme 2:6; Baheberu 12:22.

Bao ‘ba biditšwego le go kgethwa’ go yo buša le Kriste Mmušong woo ba bitšwa “mohlatswana.” (Kutollo 17:14; Luka 12:32) Se se bontšha gore ke ba banyenyane ge ba bapetšwa le palo ka moka ya dinku tša Jesu.—Johane 10:16.

Maaka ao a bolelwago mabapi le bao ba yago legodimong

Maaka: Batho ka moka bao ba lokilego ba ya legodimong.

Therešo: Modimo o holofetša gore batho ka moka bao ba lokilego ba tlo phela mo lefaseng ka mo go sa felego.—Psalme 37:11, 29, 34.

  • Jesu o itše: “Ga go motho yo a kilego a rotogela legodimong.” (Johane 3:13) Ka mantšu ao, o be a bontšha gore batho ba ba lokilego bao ba hwilego pele ga gagwe, ba go swana le Aborahama, Moshe, Jobo le Dafida ga se ba ya legodimong. (Ditiro 2:29, 34) Lega go le bjalo, ba be ba na le kholofelo ya go tlo tsošetšwa go phela mo lefaseng.—Jobo 14:13-15.

  • Tsogo ya go tsošetšwa go yo phela legodimong e bitšwa ‘tsogo ya pele.’ (Kutollo 20:6) Seo se bolela gore go tla ba le tsogo e nngwe. Tsogo yeo e tla ba ya batho bao ba tlago go tsošetšwa go phela mo lefaseng.

  • Beibele e ruta gore ka tlase ga Mmušo wa Modimo, “lehu le ka se hlwe le sa ba gona.” (Kutollo 21:3, 4) Kholofetšo ye ya go tsošwa ga bahu e tla direga mo lefaseng ka ge legodimong go sa nka gwa hwa motho.

Maaka: Motho yo mongwe le yo mongwe a ka ikgethela ge e ba a nyaka go yo phela legodimong goba mo lefaseng.

Therešo: Modimo ke yena a kgethago gore ke Bakriste bafe ba ba botegago bao ba tlago go hwetša “moputso wa pitšo ya godimo,” e lego kholofelo ya go yo phela legodimong. (Bafilipi 3:14) Motho ga a kgethwe ka ge a nyaka goba a rata go yo phela legodimong.—Mateo 20:20-23.

Maaka: Kholofelo ya go tlo phela ka mo go sa felego mo lefaseng ke ya maemo a tlasana, le gona ke ya bao ba sa swanelwego ke go ya legodimong.

Therešo: Bao ba tlago go phela ka mo go sa felego mo lefaseng, Modimo o ba bitša “batho ba ka,” “bahlaolwa ba ka” le “bašegofatšwa ba Jehofa.” (Jesaya 65:21-23) Ba tla ba le tokelo ya go phethagatša morero wa Jehofa wa mathomong ka batho, e lego wa gore ba phele ka mo go sa felego paradeiseng mo lefaseng.—Genesi 1:28; Psalme 115:16; Jesaya 45:18.

Maaka: Palo yeo go bolelwago ka yona ya 144 000 go Kutollo ke ya seswantšhetšo, e sego ya kgonthe.

Therešo: Le ge dipalo tše dingwe tšeo di lego ka pukung ya Kutollo e le diswantšhetšo, tše dingwe ke tša kgonthe. Ka mohlala, e bolela ka “maina a lesomepedi a baapostola ba lesomepedi ba Kwana.” (Kutollo 21:14) Ela hloko mehlala yeo e bontšhago gore palo ye ya 144 000 ke ya kgonthe.

Kutollo 7:4 e bolela ka “palo ya ba ba swailwego [goba, bao go kgonthišeditšwego gore ba yo phela legodimong] e le dikete tše lekgolo-masomenne-nne (144 000).” Ditemana tšeo di lego kgauswi le temana ye, di bolela ka sehlopha se sengwe sa bobedi seo se hlaloswago ka gore ke “lešaba le legolo leo go sego motho yo a kgonago go le bala.” Modimo o tla phološa “lešaba [leo] le legolo.” (Kutollo 7:9, 10) Ge nkabe palo ye ya 144 000 e le ya seswantšhetšo, gomme e bolela ka sehlopha seo se se nago palo, gona go be go ka se be le phapano magareng ga dihlopha tše tše pedi. *

o oketša moo, palo ye ya 144 000 e hlaloswa e le batho “ba ba [rekilwego] gare ga batho ba le bjalo ka dithakangwaga.” (Kutollo 14:4) Lentšu “dithakangwaga” le ra gore sehlopha se senyenyane sa bao ba kgethilwego. Le hlalosa gabotse bao ba tlago go buša le Kriste legodimong, ba buša batho ba bantšintši bao palo ya bona e sa tsebjego.—Kutollo 5:10.

^ par. 21 Ka mo go swanago, Moprofesara Robert L. Thomas ge a ngwala mabapi le palo ya 144 000 yeo go boletšwego ka yona go Kutollo 7:4 o itše: “Ye ke palo ya kgonthe ka go se swane le yeo e sego ya bolelwa go 7:9. Ge e ba e tšewa e se ya kgonthe, gona palo e nngwe le e nngwe ka pukung ye e tla ba ya seswantšhetšo.”—Kutollo 1-7: An Exegetical Commentary, letlakala 474.