Dipeakanyo tša go bula

Kgetha leleme

Eya go menyu wa bobedi

Eya go dikagare

Dihlatse tša Jehofa

Sepedi

Nka Itšhireletša Bjang Gore ke se Tshwenywe ka Ditaba tša Thobalano?

Nka Itšhireletša Bjang Gore ke se Tshwenywe ka Ditaba tša Thobalano?

Karabo ya Beibele

Ela hloko ditšhišinyo tše tšeo di theilwego bohlaleng bjo bo hwetšwago ka Beibeleng:

  1. Itshware gabotse. Thabela bašomigotee le wena le go ba hlompha, eupša phema bogwera bjoo bo tlago go ba gogela gore ba boledišane le wena ka tša thobalano.—Mateo 10:16; Bakolose 4:6.

  2. Apara ka go se solege. Go apara ka tsela e tsošago maikwelo a fošagetšego go dira gore batho ba nagane gampe ka wena. Beibele e kgothaletša gore re apare “ka go se solege le ka go hlaphogelwa ga monagano.”—1 Timotheo 2:9.

  3. Kgetha bagwera ba gago ka bohlale. Ge e ba o fetša nako e ntši o na le batho bao ba se nago bothata goba bao ba thabelago go bapala ka lerato goba ka thobalano, ba tla nagana gore o swana le bona.—Diema 13:20.

  4. Gana dipolelo tše sa hlwekago. Ge poledišano e thoma go ba le “dikanegelo tše di sa hlwekago, dipolelo tša bošilo goba metlae e lešago dihlong,” tloga bathong bao o nago le bona.—Baefeso 5:4, God’s Word Bible.

  5. Phema maemo ao a tla go beago kotsing. Ka mohlala, eba šedi ge o kgopelwa go dula mošomong ka morago ga dinako tša mošomo go se na lebaka leo le kwagalago.—Diema 22:3.

  6. Bolela ka go tia le ka go lebanya. Ge e ba o tshwenywa ka ditaba tša thobalano, botša motho yo a go tshwenyago ka go lebanya gore ga o thabele seo a se dirago. (1 Bakorinthe 14:9) Ka mohlala, o ka re: “Ke tloga ke sa lokologe ge o duletše go ithekga ka nna. O se sa bušeletša.” O ka ngwalela motho yo a go tshwenyago lengwalo wa mo hlalosetša seo se diragetšego, kamoo o ikwago ka gona ka sona le seo o nyakago gore se direge nakong e tlago. Mo hlalosetše gabotse gore boemo bja gago bo theilwe ditumelong tša gago tša boitshwaro le tša bodumedi.—1 Bathesalonika 4:3-5.

  7. Nyaka thušo. Ge e ba o tšwela pele o tshwenywa, botša mogwera yo o mmotago, setho sa lapa, mošomigotee le wena goba motho yo a nago le phihlelo ya go thuša batho bao ba tshwenywago ka ditaba tša thobalano. (Diema 27:9) Batho ba bantši bao ba ilego ba tshwenywa ka ditaba tša thobalano ba hweditše thušo ka go rapela. Gaešita le ge e ba o kile wa rapela, o se ke wa nyatša thušo yeo o ka e hwetšago go Jehofa, “Modimo wa khomotšo yohle.”—2 Bakorinthe 1:3.

Go tshwenywa ka ditaba tša thobalano go dira gore batho ba dimilione ba se thabele go ba mošomong, eupša Beibele e ka thuša.

 

Ithute ka mo go oketšegilego

Nka Dira’ng ge ke Gobošwa ka Thobalano?

Ithute seo go gobošwa ka thobalano e lego sona le seo o ka se dirago ge o gobošwa ka thobalano.

Mathata ao a Welago Basadi

Lefaseng ka bophara, banenyana le basadi ba kgongwa ke bošoro le go kgethollwa ga basadi maphelong a bona ka moka. Ka baka la’ng?