Dipeakanyo tša go bula

Kgetha leleme

Eya go menyu wa bobedi

Eya go dikagare

Dihlatse tša Jehofa

Sepedi

Beibele e Re’ng ka Easter?

Beibele e Re’ng ka Easter?

Karabo ya Beibele

Go keteka Easter ga se gwa thewa Beibeleng. Lega go le bjalo, ge o hlahloba histori ya yona, o tla hwetša seo ge e le gabotse Easter e se bolelago—ke motlwae woo o theilwego meletlong ya bogologolo ya pelego. Ela hloko dintlha tše di latelago.

  1. Leina: Encyclopædia Britannica e re: “Ga go tsebje moo leina la Seisemane la Easter le tšwago gona; moruti wa Anglo-Saxon e lego Venerable Bede wa lekgolong la seswai la nywaga o ile a le thea go modimogadi wa seruthwane e lego Eostre.” Dipuku tše dingwe di le tswalanya le Astarte, e lego modimogadi wa pelego wa Mofenikia yoo a bego a dirišana le Ishtar wa Mobabilona.

  2. Mebutla: A ke maswao ao a emelago pelego “ao a bego a dirišwa menyanyeng ya bogologolo le maswaong a meletlo ya boheitene ya seruthwane ya Yuropa le Bohlabela bja Magareng.—Encyclopædia Britannica.

  3. Mae: Go ya ka Funk & Wagnalls Standard Dictionary of Folklore, Mythology and Legend, go tsongwa ga mae a Easter ao go naganwago gore a tlišwa ke mmutla wa Easter, “ga se feela papadi, eupša ke karolwana ya tirelo ya pelego.” Ditšo tše dingwe di be di dumela gore lee la Easter leo le kgabišitšwego “le be le kgona gore ka mohlolo le tlišetše batho lethabo, katlego, bophelo bjo bobotse le tšhireletšego.”—Traditional Festivals.

  4. Diaparo tše difsa tša Easter: Go dumediša modimogadi wa Seruthwane wa Moscandanavia goba Eastre o se wa apara seaparo se sefsa go be go lebelelwa e le go hloka tlhompho le go ipakela madimabe.”—The Giant Book of Superstitions.

  5. Ditirelo tša go hlaba ga letšatši: Di tswalanywa le meletlo ya bogologolo ya barapedi ba letšatši “yeo e bego e ketekwa letšatšing le letelele la seruthwane e le go amogela letšatši le matla a lona a go tliša bophelo bjo bofsa dimeleng.”—Celebrations—The Complete Book of American Holidays.

The American Book of Days e hlalosa gabotse mathomo a Easter ka gore: “Ga go na pelaelo gore mehleng ya ge Kereke e be e sa tšwa go thewa e ile ya amogela meetlo ya kgale ya boheitene gomme ya e dira ya Bokriste.

Beibele e kgala mokgwa wa go rapela Modimo re latela metlwae yeo e sa mo thabišego. (Mareka 7:6-8) Bakorinthe ba Bobedi 6:17 e re: “Jehofa o re: ‘Ka gona tšwang gare ga bona, le itlhaole le lese go kgwatha selo se se sa hlwekago.’” Easter ke letšatši la maikhutšo la boheitene leo bao ba nyakago go kgahliša Modimo ba swanetšego go phema go le keteka.

 

Ithute ka mo go oketšegilego

Segopotšo sa Lehu la Jesu

Ngwaga o mongwe le o mongwe, batho ba dimilione ba bokana gotee go gopola lehu la Jesu. O laletšwa gore o tlo kwa kamoo tiragalo ye e bohlokwa e go kgomago ka gona.

Ke ka Baka La’ng Dihlatse tša Jehofa di sa Keteke Easter?

Ba bantši ba lebelela Easter e le moletlo wa Bokriste. Ke ka baka la’ng Dihlatse tša Jehofa di sa e keteke?